އެފްރިކާގެ މޮޅު ކުޅުންތެރިޔާގެ އެވޯރޑަށް މާނޭ، ސަލާހު އަދި މެންޑީ ވާދަކުރަނީ

ކޮންފެޑެރޭޝަން އޮފް އެފްރިކަން ފުޓްބޯލްއިން ހޮވާ އެފްރިކާގެ މޮޅު ކުޅުންތެރިޔާގެ އެވޯރޑަށް ވާދަކުރާ ލިސްޓްގައި ސަލާހުއާއި, މާނޭގެ އިތުރުން މެންޑީވެސް ހިމެނިއްޖެއެވެ.

އެވޯޑަށް ވާދަކުރާ ތިން ކުޅުންތެރިންގެ ތެރޭގައި އެންމެފަހުން އެވޯޑް ހޯދި، ލިވަރޕޫލް ދޫކޮށް ބަޔާން މިއުނިކަށް ބަދަލުވެފައިވާ ސެނެގާލްގެ ސާދިއޯ މާނޭއާއި, ލިވަޕޫލްގައި މާނޭއާއެކު ކުރިއަށް ކުޅެމުން އައި މިސްރު ފޯވާރޑް މުހައްމަދު ސަލާހުއާއި, މާނޭއާއެކު އެފްރިކަން ކަޕް އުފުލާލި ޗެލްސީ ކީޕަރު މެންޑީ ހިމެނެއެވެ. އެވޯޑަށް ވާދަކުރާ 10 ކުޅުންތެރިން އިއުލާންކުރިއިރު މެންޗެސްޓަރ ސިޓީއާއެކު ޕްރިމިއަރ ލީގު އުފުލާލި އަލްޖީރިޔާގެ ރިޔާދު މާރޭޒްއާއި, ދާދިފަހުން ޗެލްސީއަށް ބަދަލުވި ސެނެގާލް ޑިފެންޑަރ ކުލިބަލީވެސް ހިމެނުނެވެ.

އެފްރިކާގެ އެންމެ މޮޅު ގައުމީ ޓީމްގެ އެވޯރޑަށް ވާދަކުރަނީ ކެމަރޫންއާއި, މިސްރާއި, ސެނެގާލްއެވެ. އެންމެ މޮޅު ފިރިހެން ކުޅުންތެރިޔާއަށް ވާދަކުރާ ތިން ކުޅުންތެރިން ކުރިއަށް އޮތް ސީޒަންގައި ފެންނާނީ ތިން ކްލަބަކުންނެވެ. ސަލާހު ލިވަރޕޫލްގައި މަޑުކުރަން ވަނީ އެއްބަސްވުން އާކޮށްފައެވެ. ޗެލްސީގެ ގޯލް ކުރިއަށް އޮތް ސީޒަންގައިވެސް ބަލަހައްޓާނީ މެންޑީއެވެ. މާނޭއަށް އޮތީ ބަޔާންގައި ލެވާންޑޯސްކީ އަދާކުރި ދައުރާ ހަވާލުވެ, ބަޔާންއަށް ގޯލްތައް ޖަހައިދިނުމެވެ.