ސ. ހުޅުދޫއާއި ހުޅުމީދޫ ބަނދަރުގެ މަސައްކަތް ހުއްޓާލަން އީޕީއޭއިން އަންގައިފި
20 ޖުލައި 2022 | ބުދަ 13:44ހުޅުދޫއާއި ހުޅުމީދޫ ބަނދަރުގެ މަސައްކަތް ވަގުތުން ހުއްޓާލަން ވަނީ އަންގާފައި
ހުޅުމީދޫ މިފްކޯ ބަނދަރު ތަރައްގީކުރުން
އައްޑޫ ސިޓީ ހުޅުދޫއާއި ހުޅުމީދޫގެ ބަނދަރު ތަރައްގީކުރުމަށް ކުރަމުން އަންނަ މަސައްކަތްތައް ހުއްޓާލަން އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ)އިން އަންގައިފިއެވެ.
އެ އިދާރާއިން ބުދަ ދުވަހު ނެރުނު ބަޔާނެއްގައި ވަނީ، އެ މަޝްރޫއުތައް ފެށުމުގެ ކުރިން އެ މަސައްކަތުގެ ސަބަބުން ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ގަބޫލުކުރިކަމުގެ ލިޔުމާ ޚިލާފަށް މަސައްކަތްކުރަމުން އަންނާތީ، ހުޅުދޫއާއި ހުޅުމީދޫގެ ބިން ހިއްކުމާއި ފަޅު ކޮނުމުގެ އެންމެހާ މަސައްކަތެއް ހުއްޓާލުމަށް ބުދަ ދުވަހު އަންގާފައިވާ ކަމަށެވެ.
ހުޅުދޫ ބަނދަރުގެ މަސައްކަތް ހުއްޓާލަން އެންގިއިރު އެ މަސައްކަތުގެ 90 އިންސައްތައަށްވުރެ ބޮޑު ބައެއް ނިމިފައިވާކަމަށް، އެ މަސައްކަތް ކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ވަނީ ބުނެފައެވެ. މި މަޝްރޫއުގެ ދަށުން، 88،623 ކޮޑިމީޓަރުގެ ސަރަހައްދެއްގެ ބަނދަރު ފުންކުރުމާއި، 114 މީޓަރުގެ ސަރަހައްދެއްގައި ބޭރުތޮށި ލުމާއި، 624 މީޓަރުގެ ސަރަހައްދެއްގައި ރިވެޓްމެންޓް ޖެހުމުގެ މަސައްކަތް އެ ކުންފުނިން އަންނަނީ ކުރަމުންނެވެ.
މީގެ އިތުރުން 742 މީޓަރުގެ ސަރަހައްދެއްގައި އެއްގަމުތޮށި ލުމާއި، 2250 އަކަމީޓަރުގެ ސަރަހައްދެއްގައި ޕޭވްމަންޓް ހެދުމާއި، މަގު ބައްތި ހަރުކުރުމުގެ މަސައްކަތްވެސް އެ މަޝްރޫއުގެ ތެރޭގައި ހިމެނެއެވެ. މި މަސައްކަތް 2020 ވަނަ އަހަރު ޑިޒައިން އެންޑް ބިލްޑުގެ އުސޫލުން އެމްޓީސީސީއާ ހަވާލުކޮށްފައިވަނީ 66.3 މިލިއަން ރުފިޔާއަށެވެ.
ހުޅުމީދޫގެ މިފްކޯ ބަނދަރު ތަރައްގީކުރުމުގެ މަސައްކަތްވެސް ހަވާލުކޮށްފައިވަނީ އެމްޓީސީސީއާއެވެ. އެ މަޝްރޫއުގެ ދަށުން 471،380 ކޮޑިމީޓަރުގެ ސަރަހައްދެއްގެ ބަނދަރު ފުން ކުރުމާއި 1788 ކޮޑިމީޓަރުގެ ބިން ހިއްކުމާއި 97 މީޓަރުގެ ސަރަހައްދެއްގައި އެއްގަމުތޮށި ލުމުގެ މަސައްކަތް ދަނީ ކުރަމުންނެވެ. މީގެ ތެރެއިން ބިން ހިއްކުމުގެ މަސައްކަތް ނިމިފައިވާކަމަށް އެމްޓީސީސީން މީގެ ކުރިން ވަނީ ބުނެފައެވެ.
