ރައީސުލްޖުމްހޫރިއްޔާގެ ޚާއްސަ ސްކޮލަރޝިޕް 6 ދަރިވަރަކަށް، ހައި އެޗީވަރސް ސްކޮލަރޝިޕް 79 ދަރިވަރުންނަށް
ރައީސުލްޖުމްހޫރިއްޔާގެ ހާއްސަ ސްކޮލަރޝިޕަކީ ދައުލަތުން ހަރަދުކޮށްގެން ދޭ އެންމެ ޝަރަފުވެރި ސްކޮލަރޝިޕް
ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު
ރައީސުލްޖުމްހޫރިއްޔާގެ ޚާއްސަ ސްކޮލަރޝިޕް 6 ދަރިވަރަކަށް ދެއްވައިފިއެވެ.
މި ސްކޮލަރޝިޕްތައް ހަވާލުކޮށްފައިވަނީ އަންގާރަ ދުވަހުގެ ރޭ ޣިޔާޘުއްދީން އިންޓަރނޭޝަނަލް ސްކޫލުގައި، ރައީސުލްޖުމްހޫރިއްޔާ ދެއްވާ ހާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕް ޙަވާކުރުމަށް ބޭއްވި ޖަލްސާގައެވެ. މި ޖަލްސާގައި ރައީސުލްޖުމްހޫރިއްޔާގެ ހާއްސަ ސްކޮލަރޝިޕް 6 ދަރިވަރަކު ހޯދާފައިވާއިރު ހައި އެޗީވަރސް ސޮކލަރޝިޕް 79 ދަރިވަރަކަށް ވަނީ ލިބިފައެވެ.
މަތީ ސާނަވީ އިމްތިހާނުން އެއްވަނަ ދަރަޖާގައި ފާސްވާ ދަރިވަރުންނަށް ރައީސުލްޖުމްހޫރިއްޔާ ދެއްވާ ހާއްސަ ސޮކޮލަރޝިޕަކީ ދިވެހިރާއްޖޭގެ ރައީސުލްޖުމްހޫރިއްޔާގެ ނަންފުޅުގައި ދެވޭ އެންމެ ހާއްސަ ސްކޮލަރޝިޕެވެ. މިއީ ދައުލަތުން ޚަރަދުކޮށްގެން ދޭ އެންމެ ޝަރަފުވެރި ސްކޮލަރޝިޕްވެސްމެއެވެ.
މި ސްކޮލަރޝިޕް ހޯދުމުގެ ފުރުސަތު ލިބެނީ ރާއްޖޭގެ ސްކޫލް މަދަރުސާތަކުގެ މަތީ ސާނަވީ އިމްތިހާން ނިންމާ ދަރިވަރުންގެ ތެރެއިން، ސްކޫލް މަދަރުސާގައި ކިޔަވައިދިން އޭލެވެލްގެ 3 މާއްދާއިންނާއި އެސްއެސްސީ އިމްތިހާނުގެ އިސްލާމް އަދި ދިވެހި މާއްދާއާއެކު 5 މާއްދާއިން އޭ ސްޓަރ ހޯދާ ދަރިވަރުންނަށާއި ޝަހާދާ ސާނަވިއްޔާ އިމްތިހާނުން "އިމްތިޔާޒު"ގެ ދަރަޖައިގައި ފާސްވާ ދަރިވަރުންނަށެވެ. އެއީ އެދަރިވަރަކު އޯލެވެލްގެ އިނގިރޭސިން ދަށްވެގެން ސީ ފާސް ނުވަތަ އެފެންވަރުގެ އެހެން ފާހެއް ހާސިލްކޮށްފައިވާނަމައެވެ.
ރައީސުލްޖުމްހުރިއްޔާގެ ހާއްސަ ސްކޮލަރޝިޕް މިއަހަރު ކާމިޔާބު ކުރި 6 ދަރިވަރުންނަކީ ވެސް އަންހެން ދަރިވަރުންނެވެ. އެއީ ސެންޓަރ ފޯރ ހަޔަރ ސެކަންޑްރީ އެޑިއުކޭޝަން (ސީއެޗްއެސްސީ) ގެ 5 ދަރިވަރަކާއި ކުޅުދުއްފުށި ސިޓީގެ ޖަލާލުއްދީން ސްކޫލުގެ ދަރިވަރެކެވެ. މި ދަރިވަރުންނާ ސްކޮލަރޝިޕްގެ ލިޔުން ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހުއެވެ.
