ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އިން އިންތިޒާމުކޮށްގެން ހަޔަރ އެޑިޔުކޭޝަން ވޮލީބޯޅަ މުބާރާތެއް ބާއްވަން ނިންމައި އިއުލާންކޮށްފިއެވެ.

މި މުބާރާތަކީ އެމްއެންޔޫއެސްޔޫ އާއި ވޮލީބޯލް ފެމިލީ އެސޯސިއޭޝަން (ވީއޭއެފް)އާ ގުޅިގެން ބާއްވާ މުބާރާތެކެވެ. މުބާރާތުގައި ރާއްޖޭގެ ކޮލެޖު، ޔުނިވަރސިޓީ އަދި ހައި ސްކޫލްތަަކަށް ބައިވެރިވެވޭނެއެވެ. އަންހެން އަދި ފިރިހެން ދެ ޖިންސުގެ މެދުގައި ކުރިއަށް ގެންދާ މި މުބާރާތް ކުރިއަށް ދާނީ އަންނަ އޯގަސްޓު މަހުގެ 25 ން 31 ގެ ނިޔަލަށެވެ. މުބާރާތުގައި ބައިވެރިވުމުގެ ސުން ގަޑިއަކީ ޖުލައި މަހުގެ 31 ވަނަ ދުވަހުގެ 18:00 ގެ ކުރިންނެވެ. މުބާރާތުގައި ބައިވެރިވުމަށް އެދޭ ފޯމު އެ ޖަމިއްޔާގެ ވެބްސައިޓުން ލިބެން ހުންނާނެކަމަށް އެމްއެންޔޫއެސްޔޫ އިން ބުނެއެވެ.

މުބާރާތުގެ މަޤްސަދަކީ ދިވެހިރާއްޖޭގެ މަތީ ތައުލީމު ހާސިލްކުރާ ދަރިވަރުންގެ މެދުގައި އެކުވެރިކަން އާލާކޮށް، ވޮލީބޯޅައިގެ ޤަވާއިދަށް ދަރިވަރުން އަހުލުވެރިކޮށް، ވޮލީގެ ފޯރި އިތުރުކުރުން ކަމަށް އެމްއެންޔޫއެސްޔޫ އިން ބުނެއެވެ. މުބާރާތް ކުރިއަށް ގެންދިޔަމަށް އެމްއެންޔޫއެސްޔޫއިން ވަނީ 8 މެމްބަރުންގެ މައްޗަށް އެކުލެވޭ ހިންގާ ކޮމެޓީއެއް އެކުލަވާލާފައެވެ. މީގެ އިތުރުން މުބާރާތުގެ ޑިސިޕްލިނަރީ ކޮމެޓީގެ ގޮތުގައި ވަނީ ފަސް މެމްބަރުންގެ ކޮމެޓީއެއް އެކުލަވާލާފައެވެ.

އެމްއެންޔޫއެސްޔޫ އިން އިންތިޒާމުކުރާ މި މުބާރާތުގައި ބައިވެރިވެވޭނީ ކޮލެޖު، ޔުނިވަރސިޓީ އަދި ހައި ސްކޫލްތަކުގައި 2022 ވަނަ ައަހަރު ރެޖިސްޓަރވެގެން ކިޔަވަމުންދާ ކުދިންނަށެވެ. އަދި މުބާރާތުގައި ކުޅެވޭނެ އުމުރަކީ އޯގަސްޓު މަހުގެ އެއް ވަނަ ދުވަހުގެ ނިޔަލަށް 28 އަހަރު ނުފުރޭ ކުޅުންތެރިންނަށެވެ.

މުބާރާތާ ގުޅޭ ގޮތުން ވާހަކަ ދައްކަމުން މުބާރާތުގެ ހިންގާ ކޮމެޓީގެ ރައީސް އަދި އެމްއެންޔޫއެސްޔޫގެ ނައިބު ރައީސް ސުޢައިދު ޔޫނުސް ވިދާޅުވީ, މިއީ ކޮލެޖަކުން އިސް ނަގައިގެން ހަޔަރ އެޑިޔުކޭޝަނަށް ހުޅުވާލައިގެން ބޭއްވޭ ފުރަތަަމަ ވޮލީ މުބާރާތް ކަމަށެވެ. މީގެ އިތުރުން މުބާރާތުގެ އިދާރީ ހުރިހާ މަސައްކަތެއް ނިމި، މިހާރު އޮތީ ބައިވެރިވުމުގެ މަރުހަލާގައި ކަމަށެވެ. އިތުރަށް އޭނާ ވިދާޅުވީ މި މުބާރާތަކީ ތަފާތު، ފޯރިގަދަ މުބާރާތަކަށް ވާނެ ކަމަށް އުންމީދު ކުރާކަމަށެވެ. އަދި ރާއްޖޭގެ ހަޔަރ އެޑިޔުކޭޝަންގައި ހިމެނޭ ހުރިހާ ކޮލެޖު، ޔުނިވަރސިޓީ އަދި ހައި ސްކޫލް ތަކުން މުބާރާތުގައި ބައިވެރިވާނެ ކަމަށް އުންމީދުކުރާކަމަށެވެ. ހަމައެހެންމެ މުބާރާތުގައި ޒުވާން ހުނަރުވެރި އެތައް ކުޅުންތެރިންތަކެއް ފެންނާނެކަން ޔަގީންކުރާ ކަމަށް އޭނާ ވިދާޅުވިއެވެ.