ށ. އަތޮޅަށް އާރްޓީއެލް ތައާރަފުކުރުން: މި މަސް ނިމުމުގެ ކުރިން ޓެސްޓު ދަތުރުތައް ބާއްވަނީ
ހއ. އަދި ހދ. އަތޮޅަށް މިހާރު އާރުޓީއެލް ވަނީ ތައާރަފުކޮށްފައި
ހއ އަތޮޅުގައި އާރުޓީއެލް ފެށުމަށް ގެންދިޔަ ފެރީތައް
ރާއްޖެ ޓްރާންސްޕޯޓް ލިންކް (އާރްޓީއެލް) ދަތުރުތައް ށ. އަތޮޅަށް ފެށުމަށް، ބާއްވަންޖެހޭ ޓްރަޔަލް ދަތުރުތައް މި މަސް ނިމުމުގެ ކުރިން ފަށަން މަސަައްކަތްކުރަމުންދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
ދަތުރުފަތުރުގެ ނިޒާމުން މުޅި ރާއްޖެ ގުޅުވާލުމަށް ސަރުކާރުން ފަށާފައިވާ ބިޔަ ޕްރޮޖެކްޓުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށްގެންދާއިރު، އެމްޓީސީސީން ގެންދަނީ އަތޮޅަކަށް ފަހު އަތޮޅަކަށް މި ޚިދުމަތް ތައާރަފުކުރަމުންނެވެ. މިހާރރު ހދ. އަދި ހއ. އަތޮޅަށް މި ޚިދުމަތް ތައާރަފުކޮށްފައިވާއިރު، ދެން އާރުޓީއެލްގެ ޚިދުމަތް ތައާރަފުކުރެވިގެންދާނީ ށ. އަތޮޅަށެވެ.
މި ޚިދުމަތް ތައާރަފުކުރުމާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އާޒިމް ވިދާޅުވީ މި މަސް ނިމުމުގެ ކުރިން ޓްރަޔަލް ދަތުރުތައް ފަށަން މަަަސައްކަތްކުރަމުންދާއިރު، އޮގަސްޓު މަސް ތެރޭގައި ށ. އަތޮޅަށް މި ޚިދުމަތް ފެށިގެން ދާނެ ކަމަށް ބެލެވޭ ކަމަށެވެ،
އާޒިމް ވިދާޅުވީ މި ޚިދުމަތް އަތޮޅުތަކުގައި ފަށާއިރު، އެ އަތޮޅެއްގެ ރައްޔިތުންނަށް މައުލޫމާތުތައް ހިއްސާނުކޮށް ޚިދުމަތް ނުފަށާ ކަމަށެވެ. އެމްޓީސީސީގެ ފަރާތުން ރަށްރަށަށް ގޮސް، އެ ރަށްރަށުން ޚިދުމަތް ލިބޭނެ ގޮތްތަކާއި، އެޕްލިކޭޝަން ބޭނުންކުރާނެ ގޮތްތަކާއި، ޓިކެޓް ނަގާނެ ގޮތްތަކާއި، މި ހުރިހާ ކަމެއް ރައްޔިތުންނަށް އޮޅުން ފިލުވައިދޭ ކަމަށް އާޒިމް ވިދާޅުވިއެވެ. އެ މުވައްޒަފުންނަކީ ރަނގަޅަށް ޓްރެއިން ކުރެވިފައިވާ މުވައްޒަފުން ކަމުގައިވެސް އާޒިމް ފާހަގަކުރެއްވިއެވެ.
އާޒިމް ވިދާޅުވީ ތަކުލީފަކާ ނުލާ ހިތްފަސޭހަ ދިރިއުޅުމެއް ހޯދައިދިނުމަކީ ރައީސުލްޖުމްހޫރިއްޔާ އެންމެ ބޮޑަށް ކުރައްވާ އެއް މަސައްކަތްޕުޅު ކަމަށެވެ. އެ ސަރަހައްދުގެ ރައްޔިތުން މީގެ ކުރިން ޑޮކްޓަރަށް ދައްކަން ކުރާ ދަތުރަށްވެސް 3،000 ނުވަތަ 4،000 ރުފިޔާ ޚަރަދުކުރަންޖެހޭކަމަށާއި، އެމީހުން އުޅުނީ އެހާވެސް ދަތި ހާލުގައި ކަމަށް އާޒިމް ވިދާޅުވިއެވެ.
އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯރކްއަކީ މުޅި ރާއްޖެއަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕެޝަލް ޕްލޭން (2020-2040)ގައި ހިމެނޭ ތިން ޒޯނާއި 6 ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯރކުން 6 ރީޖަންގައި އެކުލެވޭ ހުރިހާ ރަށްތަކެއް ގުޅާލެވޭއިރު، އެއް ރީޖަން އަނެއް ރީޖަނާވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވާލެވޭނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް"، "ނަން-ކޮމިއުޓް ލިންކް"، އަދި "ހައިވޭ ލިންކް" މެދުވެރިކޮށެވެ.
ކޮމިއުޓް ލިންކްއަކީ އެ ރީޖަނެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ޚާއްސަކުރެވިފައިވާ ލިންކެވެ. ނަން-ކޮމިއުޓް ލިންކްއަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ޚާއްސަކޮށްފައިވާ ލިންކެވެ. އަދި ހައިވޭ ލިންކަކީ އެއް ރީޖަން އަނެއް ރީޖަނާ ގުޅުވައިދޭ މައި ދަތުރުފަތުރުގެ ހަބެވެ. އިންޓެގްރޭޓެޑް ނޭޝަނަލް ޕަބްލިކް ފެރީ ނެޓްވޯރކްގައި ހިމެނޭ ދެވަނަ ޚިދުމަތަކީ ކާގޯ ނުވަތަ މުދާ އުފުލާ ފެރީގެ ޚިދުމަތެވެ. މި ޚިދުމަތަކީ، އެ ރީޖަންއެއްގައި ހިމެނޭ ހުރިހާ ރަށްތަކާއި އެންމެ ކައިރީގައި އޮންނަ ކޮމަރޝަލް ހަބް ގުޅުވައިދޭނެ ޚިދުމަތެކެވެ.
