ނ. ހެނބަދޫގައި މިހާރު ކުރިއަށްދާ ޖޯޝް ޗެމްޕިއަންޝިޕް 2022ގައި ލަވެންޑަރ ޔުނައިޓެޑް ބަލިކޮށް އެފްސީ ބްރަދަރސް ތާވަލުގެ އެއްވަނާގައި ހަމަޖެހިލައިފިއެވެ.
މިއަދު ހަވީރު ކުޅުނު މި މެޗު ބްރަދަރސް ކާމިޔާބުކުރީ 3-1ންނެވެ. މެޗުގައި ފުރަތަމަ ލަނޑުޖަހައި ލީޑު ނެގީ ލަވެންޑަރއިންނެވެ. ފުރަތަމަ ހާފުގެ ކުރީކޮޅުގައި ލަވެންޑަރއަށް ލީޑު ނަގައިދިނީ ފަރުހާން ޒަކަރިއްޔާއެވެ. ނަމަވެސް ފުރަތަމަ ހާފު ނިމުމުގެ ކުރިން ބްރަދަރސް ވަނީ ފަހަތުންއަރާ ލަނޑެއް ޖަހައި ނަތީޖާ ހަމަހަމަކޮށްފައެވެ. ބްރަދަރސްއަށް ނަތީޖާ ހަމަހަމަކޮށްދިނީ އިބްރާހީމް ޝަރީފުއެވެ.
ބްރަދަރސްގެ އަނެއް ދެލަނޑު ޖެހީ ދެވަނަ ހާފުގައެވެ. އެޓީމަށް ލީޑު ނަގައިދިނީ މެޗުގެ މޮޅު ކުޅުންތެރިޔާ އަބްދުލްޣަނީއެވެ. އަދި މެޗުގެ ފަހު މިނެޓުގައި ލީޑު ފުޅާކޮށްދިނީ މުހައްމަދު ވަހީދު (ކޮކީ)އެވެ.
މި ނަތީޖާއާއެކު ތާވަލުގެ އެއްވަނާގައި ބްރަދަރސް އޮތީ ކުޅުނު ތިން މެޗު ކާމިޔާބުކޮށްގެން ލިބުނު 9 ޕޮއިންޓާއެކުއެވެ. ތިން މެޗުން ލިބުނު ތިން ޕޮއިންޓާއެކު ލަވެންޑަރ އޮތީ ތާވަލުގެ ތިންވަނާގައެވެ.
މުބާރާތުގައި މާދަމާ ބައްދަލުކުރާނީ ޔަންގް ޝޫޓާސްއާއި އެފްސީ ހާގަނޑެވެ.
