ޑިބާލާ ހޯދުމަށް ރޯމާއިން ރަސްމީކޮށް ބިޑުކޮށްފި

އާޖެންޓީނާގެ ފޯވާޑް ޕައުލޯ ޑިބާލާ ހޯދުމަށް އިޓާލިއަން ލީގުގެ ރޯމާއިން ރަސްމީކޮށް ބިޑު ހުށަހަޅައިފިއެވެ.

ނިމުނު ސީޒަނަށް ފަހު ޔުވެންޓަސް ދޫކޮށްލަން ނިންމާފައިވާ ޑިބާލާއަކީ ފްރީ އެޖެންޓެކެވެ. ޔުވެންޓަސްއާއެކު އޭނާ ހަދާފައިވާ އެއްބަސްވުމުގެ މުއްދަތު ވަނީ ނިމުނު ޖޫން މަހުގެ ނިޔަލަށް ހަމަވެފައެވެ. އެއާއެކު އޭނާ ހޯދުމުގެ މަސައްކަތް ކުލަބުތަކުން ވަނީ ފަށައިފައެވެ. އޭގެ ތެރޭގައި ރޯމާގެ އިތުރުން މެންޗެސްޓަރ ޔުނައިޓެޑު ހިމެނޭ ކަމަށް ރިޕޯޓުތައް ބުނެއެވެ.

ޑިބާލާ ހޯދުމުގެ މަސައްކަތް ރޯމާއިން ކުރަނީ، އޭނާ އަކީ އެ ޓީމުގެ ކޯޗު ހޯސޭ މޮރީނިއޯ ބޭނުންވާ ކުޅުންތެރިޔަކަށް ވުމުންނެވެ. ކުޅިވަރު ނޫސްވެރިޔާ ފެބްރިޒިއޯ ރޮމާނޯ ބުނި ގޮތުގައި ޑިބާލާ ހޯދުމަށް ރޯމާއިން ހުށަހެޅީ ތިން އަހަރު ދުވަހުގެ އެއްބަސްވުމެކެވެ. އެހެންކަމުން ޑިބާލާ ރޯމާއަށް ބަދަލުވެއްޖެ ނަމަ، 2025 ވަނަ އަހަރުގެ ޖޫން މަހުގެ ނިޔަލަށް އޭނާ އެ ޓީމުގައި މަޑު ކުރާނެއެވެ. މީގެ އިތުރުން ރޯމާއިން ހުށަހެޅި އެއްބަސްވުމުގައިވާ ގޮތުން، ޑިބާލާއަށް މުސާރައިގެ ގޮތުގައި އަހަރަކު ހަ މިލިއަން ޔޫރޯ ލިބޭނެއެވެ. ރޯމާއިން ހުށަހެޅި ބިޑާ މެދު ޑިބާލާ ވަރަށް އަވަހަށް ގޮތެއް ނިންމާނެއެވެ.

އާޖެންޓީނާގެ ކުލަބެއް ކަަމަށްވާ އިންސްޓިޓުޓޯއިން 2011 ވަނަ އަހަރު ސީނިއަރ ކެރިއަރު ފެށި 28 އަހަރުގެ ފޯވާޑް، އެ ޓީމު ދޫކޮށް 2012 ވަނަ އަހަރު ބަދަލުވީ އިޓަލީގެ ޕަލާމޯއަށެވެ. އެ ޓީމަށް ތިން އަހަރު ދުވަހު ކުޅުމަށްފަހު، ޑިބާލާ ދެން ބަދަލުވީ އޭނާގެ އެންމެ ފަހުގެ ކުލަބް ޔުވެންޓަސްއަށެވެ. ޔުވެންޓަސްއަށް ކުޅެދިން ހަތް އަހަރުގެ ތެރޭގައި އޭނާ ވަނީ އެ ޓީމަށް 293 މެޗު ކުޅެދީ 115 ލަނޑު ޖަހާފައެވެ. މީގެ އިތުރުން ޑިބާލާ ވަނީ ޔުވެންޓަސްއާއެކު އިޓާލިއަން ލީގު، އިޓާލިއަން ކަޕް އަދި އިޓާލިއަން ސުޕަ ކަޕް ކާމިޔާބުކޮށްފައެވެ. އޭނާ ވަނީ ޔުވެންޓަސްއާއެކު 17-2016 ވަނަ އަހަރުގެ ޔުއެފާ ޗެމްޕިއަންސް ލީގުގެ ރަނަރަޕްކަން ހޯދާފައެވެ.

އާޖެންޓީނާގެ ޤައުމީ ޓީމަށް 2015 ވަނަ އަހަރުން ފެށިގެން ކުޅެމުން އަންނަ ޑިބާލާ ވަނީ ޤައުމީ ޓީމަށް 34 މެޗު ކުޅެދީ ތިން ލަނޑު ޖަހާފައެވެ. އާޖެންޓީނާއާއެކު އޭނާ ވަނީ ކޮންމެބޯލް ޔުއެފާ ކަޕް އޮފް ޗެމްޕިއަންސް ކާމިޔާބުކޮށްފައެވެ. އެއީ ޔޫރޯ ފުޓްބޯޅަ މުބާރާތުގެ ޗެމްޕިއަނުންނާއި ކޮޕަ އެމެރިކާގެ ޗެމްޕިއަނުން ވާދަކުރާ ސުޕަ ކަޕް މެޗެކެވެ.