ސަރުކާރުން 800 މިލިއަން ރުފިޔާގެ ލޯނެއް ނެގިކަން ފަޅާއަރައިފި
14 ޖޫން 2017 | ބުދަ 07:47ބީއެމްއެލްއިން 800 މިލިއަން ރުފިޔާގެ ލޯނު ނެގީ ސިވިލް ސާރވިސް މުވައްޒަފުންނަށް މުސާރަ ދިނުމަށް ކަމަށް ގަފޫރު ވިދާޅުވި
ކުޅުދުއްފުށި އުތުރު ދާއިރާގެ މެމްބަރު ގަފޫރު
ބޭންކް އޮފް މޯލްޑިވްސް (ބީއެމްއެއެލް) އިން 800 މިލިއަން ރުފިޔާގެ ލޯނެއް ސަރުކާރުން ނަގާފައިވާކަން ފަޅާއަރައިފިއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވާހަކަ ދައްކަވަމުން ކުޅުއްދުފުށި އުތުރު ދާއިރާގެ މެމްބަރު އަބްދުލްގަފޫރު މުސާ ވިދާޅުވީ ސިވިލް ސާރވިސް މުވައްޒަފުންނަށް މުސާރަ ދޭނެ ފައިސާ ނެތިގެން ބިއެމްއެލްއިން 800 މިލިއަން ރުފިޔާ ސަރުކާރުން ނަގާފައިވާ ކަމަށާއި އެކަމާއިގުޅޭގޮތުން އަންގާރަ ދުވަހު ބޭއްވި މާލިއްޔަތު ކޮެމެޓީގެ ބައްދަލުވުމުގައި މަޝްވަރާ ކުރެވިފައިވާކަަމަށެވެ.
ގަފޫރު އެގޮތަށް ވިދާޅުވުމުން، އެ ލޯނު ސަރުކާރުން ނަގާފައިވާކަން މަޖިލީހުގައި ހިމެނޭ ސަރުކާރަށް ނިސްބަތްވާ އެއްވެސް މެމްބަރަކު ދޮގުކުރައްވާފައެއް ނުވެއެވެ.
ނަމަވެސް ސަރުކާރަށް ނިސްބަތްވެވަޑައިގަންނަވާ، ފޭދޫ ދާއިރާގެ މެމްބަރު އިބްރާހީމް ދީދީ ވިދާޅުވީ އޭނާއަކީވެސް މާލިއްޔަތު ކޮމެޓީގެ މެމްބަރެއް ކަމަށާއި އެ ލޯނު ނަގާފައިވަނީ ސަރުކާރު ކުންފުށިތަކުން ކުރީގެ ސަރުކާރުތަކުން ނަގާފައިވާ ލޯނުތައް ދެއްކުމަށް ކަމަށެވެ.
ގަފޫރު ވިދާޅުވީ މިއަހަރުގެ ދައުލަތުގެ ބަޖެޓްގައި ސިވިލް ސާރވިސް މުވައްޒަފުންގެ މުސާރައާއެކު މުޅި ދައުލަތުގެ ބަޖެޓްގެ ގޮތުގައި 27 ބިލިއަން ރުފިޔާއަށްވުރެ ބޮޑު ބަޖެޓެއް ކަނޑައަޅައި، އެބަޖެޓަށް ފައިސާ ހޯދާނެ ގޮތްތައް ވެސް ކަނޑައަޅާފައިވާ ކަމަށެވެ. ގަފޫރު ވިދާޅުވީ، އާމްދަނީ ހޯދުމަށް ބަޖެޓްގައި ކަނޑައެޅި ގިނަ ކަންކަން ކުރަމުންދާއިރު ދައުލަތުގެ ބަޖެޓްގައި ފައިސާ ނެތުން އެއީ ވަރަށް ބޮޑު މައްސަލައެއް ކަމަށެވެ. އަދި އެފައިސާތައް ވަންނަ ތަނެއް ހޯދަން ޖެހޭ ކަމަށްވެސް ގަފޫރު ވިދާޅުވި އެވެ.
ސަރުކާރުން ކުރާ ޚަރަދަކާއި އާމްދަނީއާ ނުބައްދަލު، 27 ބިލިއަން ރުފިޔާގެ ބަޖެޓެއް ފާސްކޮށްފައިވާނެ މިއަހަރަށްވެސް. އަދި ބަޖެޓަށް ފައިސާ ހޯދާނެ ގޮތްތައްވެސް ހިމަނާފަވާނެ. ކޮބައިތޯ އެލާރި. އެ ބަޖެޓަގައި ބީއެމްއެލުން 800 މިލިއަން ރުފިޔާގެ ލޯނުގެ ވާހަކައެއް ނެތް. ކުރަންހުރި އެއްވެސް މަސައްކަތެއް ނުކުރެވޭ، އެކަމަކު ބަޖެޓްހުރި ހުރިހާ ލާރިއެއް ހުސްވޭ. ކޮންތާކަށްތޯ އެލާރި ވަންނަނީ
މީގެއިތުރުން ގަފޫރު ވިދާޅުވީ ބީއެމްއެލުން 800 މިލިއަން ރުފިޔާގެ ލޯނެއް ނަގާފައިވާއިރު، އެ ލޯނު ދައްކަން ސަރުކާރުން ސޮވަރެން ގެރެންޓީ ދީގެން ރާއްޖޭން ބޭރުން 200 މިލިއަން ޑޮލަރުގެ ލޯނެއް ނެގުމަށް ނިންމާފައިވާއިރު އެއީވެސް މިއަހަރަށް ފާސްކުރި ދައުލަތުގެ ބަޖެޓްގައި ހިމަނާފައިވާ ލޯނުތަކެއްްވެސް ނޫން ކަމަށެވެ.
