ކޮވިޑާ ގުޅިގެން ރާއްޖޭގެ ބޯޑަރު ބަންދުކުރެއްވީވެސް، އަދި އަލުން ހުޅުއްވެވީވެސް ބައެއް ފަރާތްތަކުގެ ވިސްނުމާ ދެކޮޅަށްކަމަށް ރައީސް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ފަތުރުވެރިކަމުގެ އިސް ފަރާތްތަކާއެކު
ކޮވިޑް-19ގެ ތެރޭގައި ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވުމަށް ސަރުކާރުން ނިންމި ނިންމުމަކީ ރަނގަޅު ނިންމުމެއް ކަމަށާއި، އޭގެ ފައިދާ މިހާރު ފެންނަމުންދާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް މަޓީން ބޭއްވި އެވޯޑް ހަފްލާގައި ވާހަކަފުޅުދައްކަވަމުން ރައީސް ވިދާޅުވީ، ކޮވިޑާ ގުޅިގެން ބައިނަލްއަގުވާމީ ފްލައިޓުތައް ކެންސަލްކުރުމާއި ބޯޑަރު ބަންދުކުރުން ވެގެންދިޔައީ ދަތިކަމަކަށް ކަމަށެވެ. ބޯޑަރު ބަންދުކުރީ ބައެއް ފަރާތްތަކުގެ ވިސްނުމާ ދެކޮޅަށްކަންވެސް ރައީސް ފާހަގަކުރެއްވިއެވެ.
ރައީސް ވިދާޅުވީ ރާއްޖޭގެ ބޯޑަރު ބަންދުކުރިތާ 3 މަސް ދުވަސް ފަހުން އަލުން ހުޅުވާލީވެސް ބައެއް ފަރާތްތަކުގެ ވިސްނުމާ ދެކޮޅަށް ކަމަށެވެ. ނަމަވެސް އެއީ ރަނގަޅު ނިންމެވުމަށްކަމަށާއި މިއަދު ރާއްޖޭގެ ފަތުރުވެރިކަން މިއޮތް ހިސާބަށް އާދެވުނީ އެ ނިންމުމުގެ ސަބަބުންކަން ރައީސް ފާހަގަ ކުރެއްވިއެވެ.
ރައީސް ވިދާޅުވީ ރާއްޖޭގެ ފަތުރުވެރިކަން ކުރިއަރައިގެންދާއިރު މިހާރު އޮތް އެންމެ ބޮޑު ގޮންޖެހުމަކީ އެއަރޕޯޓުގައި ޖާގައިގެ ދަތިކަން ކަމަށެވެ. މި މައްސަލަ ހައްލުކުރުމަށް ވެލާނާ އިންޓަރނޭޝަން އެއަރޕޯޓުގެ މަސައްކަތްތައް މިހާރު ކުރަމުންގެންދާ ކަމަށާއި، އާ ޓަރމިނަލް ހުޅުވުމުން އަހަރަކު 7.2 މިލިއަން ފަތުރުވެރިންނަށް ރާއްޖެއިން މަރުހަބާކިޔޭނެކަމަށް ރައީސް ވިދާޅުވިއެވެ.
މީގެ އިތުރުން ރާއްޖޭގެ އެކި ސަރަހައްދުތަކުގައި ހުޅުވަމުންދާ ރީޖަނަލް އެއަރޕޯޓްތަކުގެ ސަބަބުން ވެސް ފަތުރުވެރިކަމަށް ފައިދާވާނެ ކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ ރާއްޖޭގެ ފަތުރުވެރިކަމަށް ދިމާވާ ގޮންޖެހުންތައް ނައްތާލަން މަސައްކަތް ކުރަންޖެހޭކަމަށެވެ. އަދި ފަތުރުވެރިކަމުގެ ދާއިރާގެ ފަރާތްތަކާ ގުޅިގެން ސަރުކާރުން މަސައްކަތްކުރާނެކަމަށާއި، ދާއިރާ ކުރިއެރުވުމަށް ސަރުކާރުގެ ފުރިހަމަ އެއްބާރުލުން ލިބޭނެކަމަށްވެސް ރައީސް ވިދާޅުވިއެވެ.
