ރާއްޖޭގެ އިގުތިސާދަށް ކުއްލި އިންގިލާބީ ބަދަލެއް ގެނައީ ފަތުރުވެރިކަމުން: ރައީސް
ފަތުރުވެރިކަމުގެ ސަބަބުން އިގުތިސާދީ އެހެނިހެން ދާއިރާތައް ފުޅާވެގެންދިޔަކަން ފާހަގަކުރެއްވި
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރާއްޖޭގެ އިގުތިސާދަށް ކުއްލި އިންގިލާބީ ބަދަލެއް އައީ ފަތުރުވެރިކަމުގެ ސަބަބުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރުނބާ މޯލްޑިވްސްގައި އާދީއްތަ ދުވަހު މަޓީން ބޭއްވި އެވޯޑް ހަފްލާ ޝަރަފުވެރިކުރައްވައި ވާހަކަފުޅުދައްކަވަމުންނެވެ. އެ ޖަލްސާގައި ރައީސް ވިދާޅުވީ، ރާއްޖޭގައި ފަތުރުވެރިކަމުގެ ކުރިން އިގުތިސާދީ ހަރަކާތްތައް ހިންގިނަމަވެސް، އިގުތިސާދަށް ކުއްލިއަކަށް ބޮޑު އިންގިލާބީ ބަދަލެއް އައީ ފަތުރުވެރިކަން ފެށުމުންކަމަށެވެ.
ރައީސް ވިދާޅުވީ ފަތުރުވެރިކަން ފެށުމާއެކު ރާއްޖޭގައި ކުރިން ކުރަމުން އައި އިގުތިސާދީ ހަރަކާތްތަކަށް ވެސް ކުރިއެރުން ލިބިފައިވާކަމަށެވެ. އެގޮތުން، ދަނޑުވެރިކަމާއި މަސްވެރިކަމަށް އިތުރު މާރކެޓްތައް ލިބި، އިމާރާތްކުރުމުގެ ދާއިރާވެސް ފުޅާވެފައިވާކަން ރައީސް ފާހަގަކުރެއްވިއެވެ.
މީގެއިތުރުން، ރާއްޖޭގައި ފަތުރުވެރިކަން ފެށުމާއެކު، ރާއްޖޭގައި ކުރިން ނެތް އެތަކެއް ދާއިރާއަކުން ވަޒީފާގެ ފުރުސަތުތައް ހުޅުވިގެން ދިޔަކަމަށްވެސް ރައީސް ވިދާޅުވިއެވެ. އަދި އެ ދާއިރާއާ ގުޅުނު ފަރާތްތަކުގެ ބުރަ މަސައްކަތުން، "މޯލްޑިވްސް" އަކީ މިއަދު މުޅި ދުނިޔޭގެ ފަތުރުވެރިކަމުގައި ބްރޭންޑެއް ކަމަށްވެސް ރައީސް ފާހަގަކުރެއްވިއެވެ.
ރައީސް ވިދާޅުވީ ރާއްޖެ މިއަދު މި ދެކޭ ދުވަސްތަކަކީ ފަތުރުވެރިކަމުގެ ދާއިރާގައި އިސްކޮށް ހަރަކާތްތެރިވާ ބޭފުޅުންނާއި އެ ދާއިރާ ތައާރަފުކުރުމުގައި އުޅުއްވި ބޭފުޅުންގެ މިންނެތް މަސައްކަތްކަމަށެވެ. އެހެންކަމުން ސަރުކާރު އޮތީ އެ ފަރާތްތަކާއެކު ކަމަށާއި، ސިނާއަތް ކުރިއެރުވުމަށް ކުރާ މަސައްކަތުގައި ސަރުކާރުން އެއްބާރުލުން ދެއްވާނެކަމަށްވެސް ރައީސް ވިދާޅުވިއެވެ.
ރައީސް ވަނީ ރާއްޖޭގައި ފަތުރުވެރިކަން ތައާރަފު ކުރެއްވުމަށް ހެލްތު މިނިސްޓަރ އަހުމަދު ނަސީމާއި ހުސައިން އަފީފާއި މުހައްމަދު އުމަރު މަނިކު (އެމްޔޫ މަނިކު) އަދި ޖޯޖް ކޯބިން ކުރެއްވި މަސައްކަތަށްޓަކައި އެބޭފުޅުންނަށް ޝުކުރު އަދާކުރައްވާފައެވެ. އަދި މިއީ އެ ބޭފުޅުން ރާއްޖެއަށް ކުރެއްވި އަގުހުރި ޚިދުމަތެއް ކަމަށާއި، އެ ޚިދުމަތުގެ ހަގީގީ އަގު ވަޒަން ނުކުރެވޭނެ ކަމަށާއި، މުޅި ގައުމު މިވަނީ އެ ބޭފުޅުންގެ ޚިދުމަތަށް ދަރަނިވެރިވެފައި ކަމަށް ރައީސް ވިދާޅުވިއެވެ.
