މަރު ކޮމިޝަނަށް އަހަނދު ހާޒިރުކޮށް ސުވާލުކޮށްފި

ނޫސްވެރިޔާ އަހުމަދު ރިލްވާންގެ މައްސަލަ އާއި ޔާމީން ރަޝީދުގެ މައްސަލައިގެ ތުހުމަތުގައި ހައްޔަރުކޮށްފައިވާ އަހުމަދު އިސްމާއިލް (އަހަނދު) ގެ ބަޔާން ނެގުމުގެ މަސައްކަތް މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަން (މަރު ކޮމިޝަނުން) ކުރިއަށް ގެންގޮސްފިއެވެ.

މަރު ކޮމިޝަނަށް އަހަނދު ހާޒިރު ކޮށްފައިވަނީ ހޮނިހިރު ދުވަހުގެ ހަވީރު 15:00 ގައެވެ. މަރު ކޮމިޝަނުން ވަނީ އޭނާގެ ވަކީލުންގެ ހާޒިރުގައި ތަހުގީގަށް ބޭނުންވާ ސުވާލުތައް އޭނާއާ ކޮށްފައެވެ.

އޭގެ އިތުރުންވެސް މި މައްސަލައިގައި ދެމީހަކު ހައްޔަރުކުރިއެވެ. އެއީ އިސްމާއިލް އަބްދުލްރަހީމް (އިސޫ)އާއި، އަހުމަދުމުއާޒް (ގަޓުމުއާ) އެވެ. އެ ދެމީހުންވެސް މަރު ކޮމިޝަނަށް ހާޒިރުކޮށް ތަހުގީގަށް ބޭނުންވާ ސުވާލުތައް ވަނީ ކޮށްފައެވެ. އެގޮތުން މުއާޒް ހާޒިރު ކޮށްފައިވަނީ ބުރާސްފަތި ދުވަހުއެވެ. އަދި އިސޫ ހާޒިރު ކޮށްފައިވަނީ ހުކުރު ދުވަހުއެވެ.

އެ 3 މީހުން ހައްޔަރު ކޮށްފައިވަނީ 26 ޖޫން 2022 ގައެވެ. އަދި 3 މީހުންވެސް މިހާރު ތިބީ ޝަރީއަތް ނިމެންދެން ބަންދުކޮށްފައެވެ.

ފުލުހުން ބުނާ ގޮތުގައި އެ 3 މީހުން ހައްޔަރުކޮށްފައިވަނީ ރިލްވާނާއި ޔާމީން ރަޝީދުގެ މަރާއި ގުޅިގެން ޖިނާއީ ކުށްތައް ރާވައި ހިންގުމުގައާއި، އެކަމަށް މަގުފަހި ކުރުވުމަށް ޓެރަރިޒަމްގެ އަމަލުތަކެއް ހިންގާފައިވާކަމަށް ތުހުމަތު ކުރެވޭތީއެވެ.

ނޫސްވެރިޔާ އަހުމަދު ރިލްވާންގެ މައްސަލައިގެ ތަހުޤީޤު މަރު ކޮމިޝަނުން އެއްކޮށް ނިންމައި، މިއަހަރު މެދުތެރޭގައި ރައީސަށް ހުށައަޅުއްވާނެކަމުގެ ޔަޤީންކަން މަރު ކޮމިޝަނުން ވަނީ ދީފައެވެ. އެ މައްސަލައާ ގުޅިގެން މިހާތަނަށް ކޮމިޝަންގެ ފަރާތުން 200އަށްވުރެ ގިނަ މީހުންނާ ސުވާލުކޮށްފައިވެއެވެ. އަދި ބޭރުގެ ފައިނޭންޝަލް އެކްސްޕަރޓެއްގެ އެހީގައި މާލީ މުއާމަލާތްތައް އެނަލައިޒް ކޮށްފައިވެއެވެ.

މަރު ކޮމިޝަން އުފައްދާފައިވަނީ 2018 ވަނަ އަހަރުއެވެ. ކޮމިޝަން އުފެއްދި ފަހުން މިހާތަނަށް ކޮމިޝަނުގެ މަސައްކަތް އުއްމީދުކުރެއްވި މިންވަރަށްވުރެ މާ ބޮޑުތަން ލަސްކަމަށް ރައީސް ސޯލިހުވެސް ވިދާޅުވާއިރު، ދައުލަތުން އެތައް ޚަރަދެއް ކޮށްގެން ހިންގާ މި ކޮމިޝަނުން ކުރާ މަސައްކަތްތައް ރައްޔިތުންނަށް ނޭނގުމަކީވެސް ގިނަ ބަޔަކު ކުރާ ޝަކުވާއެކެވެ.

އެގޮތުން އަހަރުން އަހަރަށް އެތައް މިލިއަން ރުފިޔާއެއް ދައުލަތުން އެ ކޮމިޝަނަށް ޚަރަދު ކުރެއެވެ.

ރިލްވާނު ގެއްލުވާލިތާ 7 އަހަރަށްވުރެ ގިނަ ދުވަސްވެފައިވާއިރު، އަދިވެސް އެކަމުގެ ފަހަތުގައި ހިމެނޭ މީހުން އިންސާފުގެ ކުރިމައްޗަށް ގެނެވިފައެއް ނުވެއެވެ. ރިލްވާން ރަހީނުކޮށް، ޑިންގީއަކަށް ލައިގެން ގެންގޮސް ދޯންޏަކަށް އެރުވުމަށް ފަހު ޝަހާދަތް ލައިދިނުމަށް ފަހު މަރާލާފައިވާކަން މިހާތަނަށް ހޯދުނު ހެކިތަކުން އެނގިފައިވާ ކަމަށް ކޮމިޝަނުން ބުނިތާވެސް ގިނަ ދުވަސްތަކެއް ފާއިތުވެގެން ގޮސްފިއެވެ.

އަދި މިހާތަނަށް އެކަމުގައި އެޅުނު ފިޔަވަޅެއް، ހޯދުނު ކުރިއެރުމެއް އޮތް ކަމަކަށް ނުފެނެއެވެ. ނަމަވެސް އޭރު ކޮމިޝަނުން ބުނަމުން ގޮސްފައިވަނީ، ފޮރިންސިކް އެނަލައިސިސް ރިޕޯޓާއި، ފައިނަލް ރިޕޯޓުން މަރާލުމަށް ފައިސާދިން ވިޔަފާރިތަކުގެ މައުލޫމާތާއި، އެ މައްސަލައިގެ ޝާމިލްވާ ހުރިހާ ފަރާތްތަކާއި، ހުރިހާ މައުލޫމާތެއް އެނގިގެންދާނެ ކަމަށެވެ. އެ ފަހުންވެސް އެތައް ދުވަސްތަކެއް ވޭތުވެގެން ދިޔައީއެވެ.