މެންޗެސްޓަރ ސިޓީއަށް ކުޅެމުން އަންނަ ޕޯޗުގަލްގެ އެޓޭކިން މިޑްފީލްޑަރު ބެނާޑޯ ސިލްވާ ބާސެލޯނާއަށް ދޫކުރަން އެ ޓީމުން ބޭނުންނުވާ ކަމަށް މީޑިއާ ރިޕޯޓުތަކުގައި ބުނެފިއެވެ.

ބާސާއިން އަންނަނީ ސިލްވާ ހޯދުމުގެ މަސައްކަތް ކުރަމުންނެވެ. ސިލްވާއާ ގުޅޭ ގޮތުން ސިޓީގެ ކޯޗު ޕެޕް ގާޑިއޯލާ މީގެ ކުރިން ބުނީ ސިޓީގައި ހުންނަން އޭނާ ބޭނުންނުވާނަމަ، އެ ޓީމުން އޭނާ ދޫކޮށްލާނެ ކަމަށެވެ. ބާސާއިން ސިލްވާ ހޯދުމުގެ މަސައްކަތް ކުރަމުން އަންނައިރު، އެޓީމުން އޭނާގެ ޑީލް ކާމިޔާބުކުރުމަކީ ގާތް ކަމެއް ކަމަށް ބައެއް މީޑިއާތަކުގައި ރިޕޯޓުކޮށްފައިވެއެވެ.

މޮނާކޯ ދޫކޮށް 2017 ވަނަ އަހަރު ސިޓީއަށް ބަދަލުވި ސިލްވާ އަކީ އެ ޓީމުގެ ކޮންޓްރެކްޓުގެ ދަށުގައި ހުރި ކުޅުންތެރިޔެކެވެ. ސިޓީއާއެކު އޭނާ ހަދާފައިވާ އެއްބަސްވުމުގައި ބާކީ ތިން އަހަރު އެބަ އޮތެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ރިޕޯޓުތައް ބުނާ ގޮތުގައި ސިލްވާ އަކީ ކޯޗު ގާޑިއޯލާގެ ޕްލޭންގައި ހިމެނޭ މުހިންމު ކުޅުންތެރިޔެކެވެ. އެހެންކަމުން ސިޓީން އޭނާ ދޫކޮށްލުމުގެ ވިސްނުން މިހާރު ނުގެންގުޅޭ ކަމަށެވެ. ސިލްވާ ގެންދަން ބޭނުންވާނަމަ، އޭނާގެ ރިލީޒް ކްލޯސްގެ ގޮތުގައި 80 މިލިއަން ޔޫރޯއަށް ސިޓީން ޑިމާންޑު ކުރާނެ ކަމަށް ވެސް ރިޕޯޓުތައް ބުނެއެވެ.

ކުރިއަށް އޮތް ސީޒަނަށް ތައްޔާރުވުމުގެ ގޮތުން ސިޓީން މިހާރު ވަނީ ފަރިތަކުރުންތައް ފަށައި، އެމެރިކާއަށް ޓުއަރ ދަތުރެއް ކޮށްފައެވެ. އެ ދަތުރުގައި ސިލްވާ ވަނީ ޓީމުގައި ބައިވެރިވެފައެވެ.

ސިޓީއަށް ބަދަލުވެ އެ ޓީމުގައި ހޭދަކުރި ފަސް އަހަރުގެ ތެރޭގައި ސިލްވާ ވަނީ އެ ޓީމަށް ކުޅެދިން 251 މެޗުގައި 48 ލަނޑު ޖަހާފައެވެ. އޭނާ ވަނީ ސިޓީއާއެކު އިނގިރޭސި ޕްރިމިއަރ ލީގު، އެފްއޭ ކަޕް، ކަރަބޯ ކަޕް އަދި އެފްއޭ ކޮމިއުނިޓީ ޝީލްޑް ކާމިޔާބުކޮށްފައެވެ. މީގެ އިތުރުން އޭނާ ވަނީ ސިޓީއާއެކު 21-2020 ވަނަ އަހަރުގެ ޔުއެފާ ޗެމްޕިއަންސް ލީގުގެ ފައިނަލްގައި ކުޅެފައެވެ.