ޖޯ ބައިޑަން ސައުދީއަށް، ވަލީއަހުދްއާއި ބައްދަލު ކުރެއްވި ގޮތުން ފާޑުކިޔުން!
ބައިޑަން ވަނީ މުޙައްމަދު ބިން ސަލްމާން އަށް ވަރަށް ގިނަ ފަހަރު ފާޑު ވިދާޅުވެފައި
ޖޯ ބައިޑެން ސައުދިގެ ވަލީއަހުދް އާއި ބައްދަލު ކުރައްވަނީ
މެދުއިރުމައްޗަށް ކުރައްވާ ދަތުރުފުޅެއްގައި އެމެރިކާގެ ރައީސް ޖޯ ބައިޑަން ސައުދީއަރަބިއްޔާއަށް ވަޑައިގަންނަވައިފިއެވެ.
އެ މަނިކުފާނު ސައުދީއަށް ވަޑައިގެންނެވީ ހުކުރު ދުވަހުއެވެ. ޖިއްދާއިން އެމަނިކުފާނަށް މަރުޙަބާ ވިދާޅުވީ މައްކާ ޕްރޮވިންސްގެ ގަވަރުނަރ ޕްރިންސް ޚާލިދު އަލް ފައިސަލްއެވެ.
އެމެރިކާގެ ރައީސް ސައުދީއަށް ވަޑައިގެން ހަކަތަ ސަޕްލައި ކުރުމާއި އިންސާނީ ޙައްގުތަކާއި ސެކިއުރިޓީއާއި ގުޅުންހުރި ކަންކަމާ ބެހޭ ގޮތުން އެ ޤައުމުގެ ސަރުކާރާ މަޝްވަރާ ކުރައްވާނެއެވެ. އަދި މިއީ ދެ ޤައުމުގެ ގުޅުން އިތުރަށް ބަދަހި ކުރެއްވުމަށް ކުރައްވާ ދަތުރުފުޅެއް ކަމަށް ވެސް ރޮއިޓަރސް އިން ރިޕޯޓް ކުރެއެވެ.
ޖޯބައިޑަން ވަނީ އެމަނިކުފާނު ވެރިކަމާ ހަވާލުވެ ވަޑައިގެންނެވުމުގެ ކުރިންވެސް ސައުދީގެ ވަލީއަހުދު މުޙައްމަދު ބިން ސަލްމާން އާއި ގުޅޭގޮތުން އެތައް ފަހަރަކު ނުރުހުން ފާޅުކުރައްވައި ވާހަކަފުޅު ދައްކަވާފައެވެ. އެއީ ވޮޝިންގޓަން ޕޯސްޓްގެ ލިއުންތެރިޔާ ޖަމާލް ޚަޝޯގީގެ މަރާއި މުޙައްމަދު ބިން ސަލްމާންއާއި ގުޅުމެއް އޮތްކަމަށް ދެކެވޭ ވާހަކަތަކަށް ތާއީދު ކުރައްވައެވެ.
ބައިޑަންގެ މި ދަތުރުފުޅުގައި އެމަނިކުފާނު ވަނީ ސައުދީގެ ރަސްގެފާނު ސަލްމާން އާއި ދަރިކަލުން މުޙައްމަދު ބިން ސަލްމާން އާއި ވެސް ބައްދަލު ކުރައްވާފައެވެ. ޖިއްދާގައި ސައުދީގެ ރަސްގެފާނާއެކު ބޭއްވެވި ބައްދަލުވުމުގައި ދެ ޤައުމުގެ ގުޅުން އިތުރަށް ބަދަހި ކުރުމާ ގުޅޭ ގޮތުން މަޝްވަރާ ކުރެއްވިއެވެ.
ކިންގ ސަލަމާން އާއި ބައްދަލު ކުރެއްވުމުގެ ކުރިން ބައިޑަން ބައްދަލް ކުރެއްވީ ވަލީއަހުދު މުޙައްމަދު ބިން ސަލްމާން އާއިއެވެ. އެ ދެ ބޭފުޅުން ބައްދަލު ކުރެއްވި ގޮތާ ގުޅިގެން ގިނަ ބަޔަކު ވަނީ ފާޑު ކިޔާފައެވެ. އެގޮތުން، މުޙައްމަދު ބިން ސަލްމާން އަށް ފާޑުވިދާޅުވި ރައީސަކު އެމަނިކުފާނާ "ފިސްޓް ބަމްޕް" ކުރުމުން ގިނަ ބަޔަކަށް އެކަން ގަބޫލެއް ނުކުރެވުނެވެ.
ވަލީއަހުދް އާއިއެކު ބޭއްވި ބައްދަލުވުމުގައި ޚަޝޯގީގެ މަރާ ގުޅޭގޮތުން ވާހަކަދެއްކެވި ކަމަށް ބައިޑަން ވަނީ ވިދާޅުވެފައެވެ. އޭޕީ ނިއުސް ގައި އިންސާނީ ޙައްގުތަކަކީ އަބަދުވެސް އިސްކަން ދެއްވާނެ ކަމެއްކަމަށާއި އެފަދަ މައްސަލަތަކުގައި އެމެރިކާގެ ރައީސަކު ހަނު ނުހުންނަވާނެ ކަމަށް ބައިޑަން ވިދާޅުވި ކަމަށް އެމަނިކުފާނާ ހަވާލާދީ ވަނީ ބުނެފައެވެ.
ޚަޝޯގީ މަރާލާފައިވަނީ ސައުދީގެ ވަލީއަހުދުގެ އެންގެވުމަށްކަމަށް ރިޕޯޓްތައް ބުނި ނަމަވެސް އެމަނިކުފާނު ވަނީ އެކަން ދޮގުކުރައްވާފައެވެ.
