މާރާމާރީއެއްގައި ބިދޭސީއަކަށް ތޫނު އެއްޗަކުން ހަމަލާދީފި
ބިދޭސީ މީހާގެ ހާލު ސީރިއަސް
މޯލްޑިވްސް ޕޮލިސް ސާވިސްގެ ހެޑް ކުއާޓާރ، ޝަހީދު ހުސެއިން އާދަމް ބިލްޑިންގ
ބ. އަތޮޅުގެ ފަޅު ރަށެއްގައިދެ ބިދޭސީއެއްގެ މެދުގައި ހިންގި މާރާމާރީއެއްގައި އެކަކަށް ތޫނު އެއްޗަކުން ހަމަލާދީފިއެވެ.
ފުލުހުން ބުނީ ބ. އަތޮޅު ފަޅުރަށެއްގައި ދެ ބިދޭސީއެއްގެ މެދުގައި މާރާމާރީ ހިންގައި އެތަނުން އެކަކަށް ތޫނު އެއްޗަކުން ހަމަލާދީފައިވާ ކަމުގެ މައުލޫމާތު ބުރާސްފަތި ދުވަހުގެރޭ 21:57 އެހާއިރު ފުލުހުންނަށް ލިބިފައިވާކަމަށެވެ.
މާރާމާރީގައި އަނިޔާވެފައިވަނީ 45 އަހަރުގެ މީހަކަށް ކަމަށާއި، އޭނާއަށް ބ. އޭދަފުށީ ހޮސްޕިޓަލުގައި ފަރުވާދެމުންދާކަމަށް ފުލުހުން ބުނެފައިވެއެވެ. އަދި އެމީހާގެ ހާލު ސީރިއަސް ކަމަށް ހޮސްޕޓަލުން ފުލުހުންނަށް މައުލޫމާތުދޭ ކަމަށް ފުލުހުން ބުނެއެވެ.
މި މާރާމާރީއާ ގުޅިގެން 43 އަހަރުގެ ބިދޭސީއަކު ވަނީ ހައްޔަރުކޮށްފައެވެ. އަދި ފުލުހުން ގެންދަނީ މި މައްސަލަ އިތުރަށް ތަހުގީގުކުރަމުންނެވެ.
