އަލަމްގިރް ހައްޔަރުކުރީ އެއްޖިއްސުން ގުޅުންހިންގުމާއި ބްލެކްމެއިލިންގގެ މައްސަލައިގައި: ފުލުހުން

ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގިރް ހައްޔަރުކުރީ އެއްޖިންސުން ގުޅުން ހިންގުމާއި ބްލެކްމެއިލްކުރުމުގެ މައްސަލައިގައިކަމަށް ފުލުހުން ބުނެފިއެވެ.

"ރާއްޖެ އެމްވީ"އަށް ފުލުހުން ބުނީ، އަލަމްގިރް މިހާރު ހުރީ ފުލުހުންގެ ތަހުގީގަށް ދޫނިދޫ ކަސްޓޯޑިއަލްގައި ބަންދުގައިކަމަށެވެ. އަދި 2 މައްސަލައިގެވެސް ތަހުގީގު ކުރިއަށްދާކަމަށެވެ.

Advertisement

އަލަމްގިރް ހައްޔަރުކޮށްފައިވަނީ މި މަހުގެ 12 ވަނަ ދުވަހުގެ މެންދުރު 3:35ހާއިރުއެވެ. އޭނާ ހައްޔަރުކުރީ ސިޔާސީ އެކި ފަރާތްތަކާއި ހައި-ޕްރޮފައިލް ފަރާތްތައް ހިމެނޭހެން، ބަޔަކާ އެއްޖިންސުން ގުޅުން ހިންގައި، ބަރަހަނާ ފޮޓޯއާއި ވީޑީއޯ ހުރިކަމަށްބުނެ، އެ ފަރާތްތަކުގެ އަތުން ބޮޑެތި އަދަދުތަކުން ފައިސާ ހޯދަން ޑިމާންޑްކޮށް، ފައިސާ ނުދީފިނަމަ ވީޑިއޯ ލީކުކޮށްލާނެކަމަށް ބުނެ ބިރުދައްކައި އިންޒާރުދީ ބްލެކްމެއިލް ކޮށްފައިވާތީއާއި، އެ ވީޑިއޯއާއި ފޮޓޯ ސިޔާސީ އެކި ފަރާތްތަކަށް ވިއްކައިގެން ބޮޑެތި އަދަދުތަކުން ފައިސާ ހޯދަން އުޅުނުކަމުގެ ތުހުމަތު ކުރެވޭ މައްސަލައިގައި އޭނާގެ ބައިވެރިވުން އޮތްކަމަށް ތުހުމަތުކުރެވޭތީއެވެ. އަދި އެއްޖިންސުން ގުޅުން ހިންގިކަމުގެ ތުހުމަތުވެސް އޭނާގެ މައްޗަށް ކުރެއެވެ.

ފުލުހުން ބުނީ މި މައްސަލަ އިތުރަށް ތަހުގީގުކޮށް އޭނާ ތަހުގީގަށް ދޭ މައުލޫމާތައް ބަލައި، މި މައްސަލަތަކުގައި ހިމެނޭ އިތުރު ފަރާތްތައްވެސް ހައްޔަރުކުރަމުން ގެންދާނެކަމަށެވެ.

އެއް ޖިންސުން ގުޅުންހިންގާ ވީޑިއޯތަކެއްގެ މައްސަލައިގައި ފުލުހުން ވަނީ އަލަމްގިރުގެ އިތުރުން އިތުރު ދެ މީހެއްގެ ޕާސްޕޯޓު ހިފަހައްޓައި ފުރުން މަނާކޮށްފައެވެ. އެއީ ގާނޫނީ ވަކީލު ނާޒިމް ސައްތާރުއާއި ކާނަލް މުހައްމަދު ނަޝީދެވެ.

ސޯޝަލް މީޑިއާގައި ދައުރުވި ވީޑިއޯގައި ފެންނަނީ އޭނާ ނޫންކަމަށް ނާޒިމް ސައްތާރު ފުރަތަމަ ބުނެފައިވެއެވެ. އެ ވީޑިއޯގައި ފެންނަނީ ނާޒިމްކަމަށް ބެލެވޭ މީހަކާއި އަލަމްގިރްކަމަށް ބެލެވޭ މީހަކު އެއްޖިންސުން ގުޅުން ހިންގާ މަންޒަރެވެ. ނާޒިމްއަކީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ ކޮއްކޮއެވެ.

ނާޒިމްގެ އިތުރުން ކާނަލް ނަޝީދުގެ އެފަދަ ވީޑިއޯއެއްވެސް ވަނީ އާންމުވެފައެވެ. އެ ވީޑިއޯއާ ގުޅިގެން ކާނަލް ވިދާޅުވެފައިވަނީ، އެ ވީޑިއޯއިން ފެންނަ ކޮޓަރިއަށް އޭނާ ވަޑައިގެންނެވި ކަމަށާއި، ނަމަވެސް އޭރު އެތަނަށް ވަޑައިގެންނެވީ ވިޔަފާރީގެ ބައްދަލުވުމަކަށް ކަމަށެވެ.

މި މައްސަލައިގައި ފުލުހަކުވެސް ވަނީ ސަސްޕެންޑްކޮށްފައެވެ. އެއީ ފުލުހެއްކަމަށް ބެލެވޭ މީހާގެ ވީޑިއޯއެއްވެސް ސޯޝަލް މީޑިއާގައި އާއްމުވެފައިވަނިކޮށެވެ.