ކުޑަ ކުދިންނާމެދު ކޮށްގެން ނުވާނެ ކަންތައްތައް

ކުޑަކުދިންނަކީ ބޮޑެތި މީހުންގެ އަޅާލުން ވަރަށް ބޮޑަށް ބޭނުންވާ ބައެކެވެ. އެ އުމުރަކީ އެކުދިން ހެދިބޮޑުވަމުން އަންނަ ދުވަސްވަރަށް ވުމާއެކު މި ދުވަސްވަރުގައި އެކުދިން، އެކުދިންނަށް ފެންނަ ކަންކަން ދަސްކުރާނެއެވެ. މީހުން ދައްކާ ވާހަކަ އަޑުއަހާނެއެވެ. ބޮޑެތި މީހުން އުޅޭ ގޮތް ކޮޕީވެސް ކުރާނެއެވެ. ކުރު ގޮތަކަށް ބުނާނަމަ އެކުދިންގެ މި ދުވަސްވަރަކީ އެ ކުދިންގެ މުސްތަގުބަލު ރަނގަޅު ގޮތަކަށް ބިނާކުރުމަށް މުހިންމު ދުވަސްވަރެކެވެ.

އެހެންކަމުން މި ދުވަސްވަރު ކުއްޖަކާމެދު ކޮށްގެންވާނެ ކަންތައްތަކާއި، ކޮށްގެން ނުވާނެ ކަންތައްތައް ހުރެއެވެ. އެއުމުރަކީ އެކުއްޖެއްގެ ކައިރީގައި އުޅޭ އެންމެންގެ ލޯބި އެކުދިންނަށް ބޭނުންވާ އުމުރަކަށް ވާއިރު، އެކުދިން ބަލިވުމުން އަޅާލައި ލޯބި ދޭން ޖެހެއެވެ. އެއްވެސް ހާލެއްގައި އެކުއްޖަކާ ދިމާލަށް ހަޅޭއްލަވައި، ގަނާކޮށް، ގައިގައި ތަޅައި ހާނީއްކަ ކުރުމަކީ ކޮށްގެންވާނެ ކަމެއް ނޫނެވެ.

ހަމަ މިފަދައިން، ކަންކަން ކުރަން ކުދިންނަށް މަޖުބޫރު ކުރުވުމަކީ މަދުން ނަމަވެސް އަހަރުމެންނަށް ކުރެވޭ ކަމެކެވެ. ވަކިން ޚާއްސަކޮށް ކުއްޖާގެ ނުރުހުމުގައި ބޮޑެތި މީހުން ކުދިން ގައިގައި އަތްލާ ހެދުމާއި، ކުއްޖާ ހައްލާލައިގެން އެކުދިންގެ މައުސޫމްކަމުގެ ނާޖާއިޒު ފައިދާ ނަގާތަން އާދެއެވެ. ބަދުއަޚުލާގީ މަންޒަރުތަކާއި ފޮޓޯތަކާއި، ކުރެހުންތަކާއި، އެފަދަ ލިޔުންތައް ކުއްޖާއަށް ދެއްކުމާއި، އެފަދަ ވާހަކަ އެކުދިންނާ ދެއްކުމަކީ ކޮށްގެން ވާނެ ކަމެއް ނޫނެވެ. އަދި ކުދިންގެ އުމުރާ އެކަށީގެންނުވާ މަސައްކަތް އެކުދިން ލައްވާ ކުރުވާ، އަދި ބައެއް ފަހަރު ކުޑަކުދިން ޚާދިމުންގެ ގޮތުގައިވެސް ބޭނުންކޮށްގެން ނުވާނެއެވެ.

ބޮޑެތި މީހުންނަކީ އެކުދިންގެ ނަފްސާނީ ބޭނުންތައް ފުއްދައިދޭ ބަޔަކަށް ވާންޖެހެއެވެ. ކުދިން ދައްކާ ވާހަކަތަކަށް ސަމާލުކަން ދިނުމާއި، އެކުދިންނާ ވާހަކަދައްކައި އެކުދިންނާއެކު ވަގުތު ހޭދަކުރަންޖެހެއެވެ. ބޮޑެތި މީހުންގެ ހިތްހަމަޖެހުމަށް ކުޑަކުދިންނާ ދިމާކޮށް، މަލާމަތްކޮށް ލަދުގަންނަވާލައިގެން ނުވާނެއެވެ. އެކުއްޖާއަށް ކުރެވޭ ކަންކަމަށް ހިތްވަރު ދިނުމުގެ ބަދަލުގައި ކުއްޖާ ދެރަކޮށްލުމަކީ އަމިއްލަ ނަފްސަށް އޮންނަ އިތުބާރު ކުޑަވެގެންދާނެ ކަމެކެވެ.

އަހަރުމެން ބޮޑެތި މީހުންނަށް ދިމާވާ ކަންކަމުގެ ރުޅިވެރިކަން ކުޑަކުދިންނަށް ފިލުވައިލުމަކީ އޭގެ ވަރަށް ނުރަނގަޅު އަސަރެއް އެކުދިންގެ ނަފްސާނީ ދުޅަހެޔޮކަމަށް ކޮށްފާނެ ކަމެކެވެ. ކުއްޖާއާ ދިމާއަށް ހަޑިހުތުރު ބަހުން އެއްޗެހި ކިއުން ފަދަ ކަންކަމަކީވެސް އަހަރުމެންގެ ތެރެއިން ފެންނަ ވަރަށް ނުރަނގަޅު ކަމެކެވެ. އެކުދިން ބަލަހައްޓާނޭ މީހަކު ކައިރީގައި ނެތި ދޫކޮށްލާފައި ބޭތިއްބުމާއި، އެކުދިންގެ އަސާސީ ބޭނުންތައް ފުއްދައި ނުދިނުމަކީ އެއްވެސް ހާލަތެއްގައި ކޮށްގެން ވާނެ ކަމެއް ނޫނެވެ. މިގޮތުން ކިޔަވައި ނުދިނުމާއި، ގައިން ތާހިރުނުކުރުމާއި، ކާން ނުދިނުމާއި، ފޭރާން ނުދިނުމަކީ ކޮށްގެން ވާނެ ކަމެއް ނޫނެވެ.

އަހަރުމެންގެ ދެލޮލުގެ ނޫރު ފަދަ ކުޑަކުދިން ހެދި ބޮޑުވަމުން އަންނައިރު، އެކުދިންގެ ވަށައިގެން އުޅޭ އެންމެންނަކީވެސް އެކުދިންގެ ކަންކަމަށް ސަމާލުކަންދީ، އެކުދިންނަށް ލޯބި ދޭ ބަޔަކަށް ވާންޖެހެއެވެ. ރަނގަޅު މުޖުތަމައެއް އަދި ރަނގަޅު ޖީލެއް ބިނާކުރަން މަސައްކަތްކުރާއިރު، ޖީލެއް ބިނާވެގެން އަންނަ ހިސާބަކީ މިއީއެވެ. މި ދުވަސްވަރު ދެވޭ ތަރުބިއްޔަތަކީ މުޅި އުމުރަށް ދެމިގެންދާނެ ތަރުބިއްޔަތެއްކަން ޔަގީނެވެ.