މާދަމާ ފަށާ ދެވަނަ ޑިވިޝަން ފުޓްބޯޅަ މުބާރާތުގައި ވާދަކުރާ ބުރު ސްޕޯޓްސް ކްލަބަށް ގެނައި ބިދޭސީ ކުޅުންތެރިންނާއެކު އެއްބަސްވުމުގައި ސޮއިކޮށްފިއެވެ.

ސޮއިކުރުމުގެ ރަސްމިއްޔާތު މިއަދު ބާއްވާފައިވަނީ ޑިޕަބްލިކް ޑިޕަބްލިކް ކެފޭގައެވެ. ބިދޭސީ ކުޅުންތެރިން ރަސްމީކޮށް ޓީމާ ގުޅުމުގެ އިތުރުން ބުރުގެ ކުޅުންތެރިންނަށް ޖަރޒީ ހަވާލުކުރުންވެސް މިއަދު ވަނީ ކުރިއަށް ގެންގޮސްފައެވެ.

މިދިޔަ އަހަރުގެ ތިންވަނަ ޑިވިޝަންގެ ޗެމްޕިއަން، ބުރު ދެވަނަ ޑިވިޝަނަށް ތައްޔާރުވަމުން އަންނައިރު، ޓީމުގައި ބިދޭސީ ހަތަރު ކުޅުންތެރިން ހިމަނާފައިވެއެވެ. އެއީ ސަރބިއާގެ ސްޓްރައިކަރު ސްޓެފަން ޑުރިކް، މިސްްރުގެ މިޑްފީލްޑަރު އަހުމަދު މުހައްމަދު ގަބެއްލާ މުހައްމަދު އަދި ބްރެޒިލްގެ ޑިފެންޑަރު ބްރޫނޯ އަރާބެލް ޕަސެމާނީގެ އިތުރުން އުޒްބަކިސްތާނުގެ މިޑްފީލްޑަރު މިރްޖާލޯލް ކަސީމޯވްއެވެ.

އަދި ފުރަތަމަ ޑިވިޝަނަށް ކުޅެފައިވާ 11 ކުޅުންތެރިންނާއި، ދެވަނަ ޑިވިޝަނަށް މީގެ ކުރިން ކުޅުނު ފަސް ކުޅުންތެރިންގެ އިތުރުން މިދިޔަ އަހަރު އޮތް ތިންވަނަ ޑިވިޝަން މުބާރާތުގެ މޮޅު ކުޅުންތެރިޔާ މުހައްމަދު ތަސްނީމް (ތައްތި) ވެސް ބުރު ޓީމުގައި ހިމެނެއެވެ.

މުބާރާތުގައި ބުރުގެ ފުރަތަމަ މެޗު އޮންނާނީ ބުރާސްފަތި ދުވަހުއެވެ. މި މެޗުގައި ބުރު ނުކުންނާނީ ކުޑަ ހެންވޭރާ ދެކޮޅަށެވެ.