ކޮމިޓީގައި 8 މެންބަރުން ތިބޭނެ
އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުން
މުދައްރިސުންގެ ކަންކަން ބެލެހެއްޓުމަށް, 8 ބޭފުޅުން ހިމެނޭ މަތީ ފެންވަރުގެ ކޮމިޓީއެއް އެކުލަވާލަން ހުށަހަޅައިފިއެވެ.
މިގޮތަށް ހުށަހަޅާފައިވަނީ ރާއްޖޭގެ ސްކޫލްތަކުގައި ކިޔަވައިދޭނެ މުދައްރިސުން ލިބުމުގައާއި، ލިބިފައިވާ މުދައްރިސުން ކިޔަވައިދިނުމުގައި ދެމިތިބުމަށް ދިމާވެފައިވާ ދަތިތަކާއި ގޮންޖެހުންތަކުގެ ސަބަބުތައް ދެނެގަތުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ އެދިވަޑައިގަތުމަކަށް ކުރި ދިރާސާގެ ރިޕޯޓުގައެވެ.
މި ރިޕޯޓުގައި ބުނެފައިވަނީ، މުސާރަ ބޮޑުވުމަކީ ދާއިރާއަށް ޝައުގު އިތުރުކުރުވުމަށް ވަރަށް މުހިންމު ކަމެއް ކަމަށެވެ. ނަަމަވެސް އޭގެ ފަހުން ބޮޑުވި މުސާރައިން ކުރި އަސަރު ދާނީ ކުޑަވަމުން ކަމަށާއި، މަސައްކަތަށް އައިސްފައިފާ ބަދަލުތަކުން، އުނގަންނައި ދިނުމާއި ގުޅުން ނުހުންނަ ކަންކަމުގައި ގިނަ ވަގުތު އަވަދިނެތި މުދައްރިސުން އުޅެން ޖެހުމުން ސްޓްރެސް ވުމާއި ބާރންއައުޓަށް މަގުފަހިވާކަން ހާމަވާ ކަމަށެވެ.
އަދި ފެންވަރު ރަނގަޅު މުދައްރިސުން ހޯދައި، ދާއިރާގައި ދެމެހެއްޓޭނެ ގޮތަކަށް މުދައްރިސުންގެ ވަރކްލޯޑާއ ވަރކް-ލައިފް ބެލެންސްގެ ކަންކަން މުރާޖާކޮށް ގެންނަން ޖެހޭ އިސްލާހީ ބަދަލުތައް ނުގެނެވިއްޖެނަމަ، ވަޒީފާ އަދާކޮށްގެން ލިބެން ބޭނުންވާ ހިތްހަމަޖެހުން ނުލިބި، އާއިލާއަށް ވަގުތު ނުދެވި އަދި ދާއިރާ ދޫކޮށްފައި ދާ ދިއުމަށް ވެސް ހައްލެއް ނުލިބި ހިނގައިދާނެކަމަށެވެ.
އެހެންކަމުން މިކަންކަން ހައްލުކުރުމަށް 4 ހުށަހެޅުމަކަށް ރިއާޔަތްކޮށް، މިކަން ހައްލުކުރުމުގެ ގޮތުން ހުށަހަޅާފައިވަނީ، މި 4 ހުށަހެޅުމުގައި ވާ ކަންކަން ބަލައި، ހިންގަންޖެހޭ ކަންތައްތައް މިހާރަށްވުރެ އެފިޝެންޓްކޮށް ހިންގުމަށްޓަކައި މަތީ ފެންވަރުގެ ފަންނީ ޚާއްސަ ކޮމިޓީއެއް އުފެއްދުމަށެވެ. މި ކޮމިޓީއަށް 'ޓީޗަރ އެންހޭންސްމަންޓް ކޮމިޓީ' ނުވަތަ އެކަށީގެންވާ ނަމެއް ކަނޑައެޅުމަށް ވަނީ ބުނެފައެވެ.
1 - މުދައްރިސުންނާއި ތައުލީމީ ދާއިރާގައި ފަންނީ މަސައްކަތްކުރާ ފަރާތްތަކަށް، ކުރާ މަސައްކަތާ އެކަށޭނެ ރަނގަޅު މުސާރައަކާއި އިނާޔަތްތައް ހަމަޖެއްސުން
2 - ސްކޫލްތަކުގައި އިތުރަށް ތިބިކަމަށް ފާހަގަކުރެވޭ މުދައްރިސުންނާމެދު އަމަލުކުރާނެ ގޮތެއް ކަނޑައެޅުން
3 - މުވައްޒަފުން ރެކްރޫޓްކުރުމަށް ދިމާވާ މައްސަލަތައް ހައްލުކުރުން
4 - މުދައްރިސުންގެ ވަރކް-ލައިފް ބެލެންސް ހާސިލް ކުރުމަށް މަގުފަހިކުރުން
މި ކޮމިޓީ އެކުލެވިގެންވަނީ 8 މެންބަރުންގެ މައްޗަށް ކަމަށް ދިރާސާ ރިޕޯޓުގައި ވަނީ ހުށަހަޅާފައެވެ.
މި ކޮމިޓީގެ އިދާރާއަކީ މިނިސްޓްރީ އޮފް އެޑިއުކޭޝަނެވެ. މި ކޮމިޓީއަކީ ސިވިލްސަރވިސް ކޮމިޝަނާއި މިނިސްޓްރީ އޮފް އެޑިއުކޭޝަނާ އެކުގައި ގުޅިގެން މުދައްރިސުންގެ ކަންކަން ރަނގަޅުކުރުމުގެ ނިޔަތުގައި އެކުލަވާލާ ކޮމިޓީއެކެވެ. މުދައްރިސުންގެ ވަޒީފާގެ މަސްއޫލިއްޔަތުތައް މުރާޖާކޮށް، މުދައްރިސުންގެ ވަރކްލޯޑަކީ މަސައްކަތުގެ ވަގުތާ އެކަށީގެންވާ މަސްއޫލިއްޔަތުތަކަކަށް ހަދަންޖެހޭކަން ފާހަގަކޮށްފައިވެއެވެ.
އަދި މި ކޮމިޓީގެ މައިގަނޑު މަސައްކަތްތަކަކަށް ވާނީ މި ރިޕޯޓުގެ ހުށަހެޅުން 1، 2، 3 އަދި 4 ގައި ފާހަގަކޮށްފައިވާ ކަންކަން ރަނގަޅު އިންތިޒާމެއްގެ މަތިން ކުރަމުން ގެންދިއުމާއި، އެކަމާ ގުޅުންހުރި ހުރިހާ ފަރާތްތަކާއެކު އެކަމަށް މަގުފަހިކުރުން ކަމުގައި މި ރިޕޯޓުގައި ބުނެފައިވެއެވެ.
