ފަހު މެޗުގައިވެސް މެލޭޝިޔާ އަތުން ބަލިވެ ރާއްޖެއަށް މުބާރާތް ނިމިއްޖެ
9 ޖުލައި 2022 | ހޮނިހިރު 06:39ފައިނަލްގައި ވާދަކުރާނީ މެލޭޝިޔާއާއި ބޫޓާން
ރާއްޖެ ފަހު މެޗުގައި މެލޭޝިޔާއާ ވާދަކުރި މެޗުގެ ތެރެއިން
މެލޭޝިޔާގައި މިހާރު ކުރިއަށްދާ ކުއަޑްރަންގިއުލާ ޓީ20 ސީރީސްގެ ލީގު ބުރުގައި ރާއްޖެ ކުޅުނު ފަހު މެޗުގައިވެސް މެލޭޝިޔާ އަތުން ބަލިވެ ރާއްޖޭގެ ގައުމީ ކްރިކެޓް ޓީމު މުބާރާތުން ކަޓައިފިއެވެ.
ފަހު މެޗުގައި ރާއްޖޭގެ މައްޗަށް މެލޭޝިޔާގެ ގައުމީ ކްރިކެޓް ޓީމް ކުރި ހޯދީ 94 ލަނޑުންނެވެ. މެލޭޝިޔާއިން ފުރަތަމަ ކުޅެން އަރައި 20 އޯވަރުގެ ތެރޭގައި ހަތަރު ކުޅުންތެރިން ނުބައިވިއިރު 230 ލަނޑު ހެދިއެވެ. ރާއްޖޭގެ ޓީމަށް 20 އޯވަރުގެ ތެރޭގައި ހަ ކުޅުންތެރިން ނުބައިވެގެން ހެދުނީ 136 ލަނޑެވެ. މެޗުގައި ރާއްޖެއިން އެންމެ ރަނގަޅަށް ކުޅުނީ 29 ބޯޅައިން 50 ލަނޑު ހެދި އާދަމއ ނާސިފް އުމަރެވެ. ޓީމްގައި ހުރި އެންމެ ތަޖުރިބާކާރު ކުޅުންތެރިޔާ އަބްދުﷲ ޝާހިދު 34 ލަނޑު ހެދިއެވެ.
މުބާރާތުގައި ރާއްޖެ މޮޅުވީ ދެ ބުރުގައިވެސް ތައިލެންޑް އަތުންނެވެ. މެލޭޝިޔާއާއި ބޫޓާން އަތުންވެސް ދެ ބުރުގައި ބަލިވެ, ފައިނަލްގެ ފުރުސަތު ގެއްލި، ރާއްޖެއަށް ވަނީ މުބާރާތް ނިމިފައެވެ.
ފައިނަލްގައި ވާދަކުރާނީ މެލޭޝިޔާއާއި ބޫޓާނެވެ. ފައިނަލަށް ދަތުރުކުރީ ކޮންމެ ޓީމެއް ކޮންމެ ޓީމަކާ ދެފަހަރު ވާދަކޮށް ކުރި ހޯދި ދެޓީމެވެ. މުބާރާތުގައި ވާދަކުރަނީ ހަތަރު ޓީމެވެ.
