ޘަޤާފީ ހެދުމުގައި 90 އަށްވުރެ ގިނަ ގައުމުގެ ޘަޤާފީ ސުފުރާ ޓިކްޓޮކަށް

ލުބްނާންގެ ހުޅަނގުގެ ބިޤާ އަވަށަށް ނިސްބަތްވާ ޒުވާން ކައްކާއެއް ކަމަށް ވާ ޢަބީރު އަލް ޞަޣީރު، ޘަޤާފީ ހެދުން އަޅައިގެން ހުރެ، ޓިކްޓޮކަށް ދޫކޮށް، ޘަޤާފީ ކެއުންތަކުގެ ކުރު މަންޒަރުތައް، ދުނިޔޭގެ އެކި ކަންކޮޅުތަކުން ބަލަމުން ދާ މީހުންގެ އަދަދު މިއަދު ގުނާލެވެނީ މިލިއަނުންނެވެ.

ފެޝަނާއި ކެއްކުމަށް ލޯބި ކުރާ ޢަބީރު، ޓިކްޓޮކަށް ދުކޮށްލާ މަންޒަރުތަކުން ކިތަންމެ ހާ ރަނގަޅަކަށްވެސް އެކަން ދޭހަ ކޮށްދެއެވެ. ހުޅަނގު ބިޤާގައި ހެދުން ވިއްކާ ފިހާރައެއް ހިންގައިގެން އާމްދަނީ ހޯދަމުން އަންނަ ޢަބީރު، އެންމެ ލޯބި ކުރަނީ ބަދިގޭގައި ގިނަ ވަގުތުތަކެއް ހޭދަ ކުރުމަށް ކަމަށް ވާ އިރު، އޭނާގެ ޓިކްޓޮކް ވީޑިއޯގައި އެ 2 ރަހަވެސް އެކުލެވެއެވެ.

ޢަބީރުގެ ޓިކްޓޮކް ވީޑިއޯތަކުން ފެންނަ ހުރިހާ މަންޒަރެއްގެ ފަހަތުގައިވެސް މުޅިންހެން އޮތީ ހަމަ އެ ޒުވާނާގެ ހިއްސާއެވެ. ކައްކަން ބޭނުންވާ ސާމާނު ގަތުމާ ހިސާބުން ފެށިގެން ވީޑިއޯ ކުރުމާއި، އެޑިޓްކޮށް ޕޯސްޓް ކުރުމުގެ ޒިންމާވެސް އުފުލަކީ ހަމަ އޭނާއެވެ. ކަމަށް އޮންނަ ލޯތްބެއްގެ ބޮޑު ކަމުންނެވެ.

ޢަބީރުގެ ވީޑިއޯތަކަށް ދުނިޔޭގެ އެކި ހިސާބުތަކުން ބޮޑު ތަރުހީބެއް ލިބެއެވެ. އޭނާގެ ވީޑިއޯއަކަށް 178 މިލިއަން ވިއުޒް ލިބިފައި ވާ ކަންވެސް އެނާ ފާހަގަ ކުރެއެވެ. އެއީ އެމެރިކާގެ މުޅި އާބާދީގެ 2 ބައިކުޅަ 1 ބަޔަށްވުރެވެސް ގިނަ އަދަދެއް ކަން ޢަބީރު ފާހަގަ ކުރެއެވެ.

ޢަބީރު، އޭނާގެ ޓިކްޓޮކް އެކައުންޓް ލޯންޗް ކުރީ 2021 ވަނަ އަހަރުގެ ކުރީކޮޅުގައެވެ. އެންމެ ފުރަތަމަ ހިއްސާ ކުރަން ފެށީ ފެޝަނާ ގުޅޭ ކޮންޓެންޓެވެ. ކާބޯތަކެއްޗަށް ދިޔައީ އޭގެ ފަހުންނެވެ. ޢަބީރު މިހާރު ވަނީ ދުނިޔޭގެ އެކި ކަންކޮޅުތަކުން 90 އަށް ވުރެ ގިނަ ގައުމުގެ ޘަޤާފީ ކެއުންތައް ގެނެސްދީފައެވެ. ނަތީޖާއެއްގެ ގޮތުން މިއަދު އޭނާގެ ޓިކްޓޮކް އެކައުންޓް ފޮލޯ ކުރާ މީހުންގެ އަދަދު ވަނީ 12 މިލިއަނަށް ވުރެ މައްޗަށް އަރާފައެވެ.