އުދަ އެރިތާ ހަފްތާއެއް، ތިމަރަފުއްޓަށް ލިބުނު ގެއްލުމުން އަދިވެސް އަރައިނުގަނެވޭ!

ޖޫން ޖުލައިގެ ވިއްސާރައާއެކު ޖުލައި މަހުގެ 1 ވަނަ ދުވަހު ވަނީ ރާއްޖޭގެ ގިނަ އަދަދެއްގެ ރަށްތަކަށް އުދައިގެ އަސަރުކޮށްފައެވެ. މެދުރާއްޖެތެރެއާއި ދެކުނުގެ ރަށްތަކަށް އުދައިގެ ސަބަބުން ބޮޑެތި ގެއްލުންތަކެއް ލިބިފައިވާއިރު ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މައުލޫމާތު ދޭގޮތުގައި އެންމެ ބޮޑު ގެއްލުމެއް ލިބިފައިވަނީ ތ. ތިމަރަފުއްޓާއި ގދ. މަޑަވެއްޔަށެވެ.

އުދައިގެ ސަބަބުން މަޑަވެއްޔަށް ލިބުނު ގެއްލުމުން މިހާރު ކޮންމެވެސް ވަރަކަށް އަރައިގަނެވި، ރަށް އާއްމު ހާލަތަށް އައިސްފައިވިނަމަވެސް އުދަ އެރިތާ ހަފްތާއެއް ވީއިރު ވެސް ތިމަރަފުއްޓަށް ލިބުނު ގެއްލުމުން އަރައިނުގަނެވެއެވެ. އެ ރަށުގެ ގެތަކަށް ލޮނު ވަނުމުގެ ސަބަބުން ލިބުނު ގެއްލުމާއެކު ދުވާލަކު އެތައް ގެއަކުން ކަރަންޓު ކެނޑޭ ކަމަށް އެރަށު ކައުންސިލުން މައުލޫމާތު ދެއެވެ.

ތިމަރަފުށީ ކައުންސިލްގެ ރައީސް އިސްމާއިލް އިބްރާހިމް "ރާއްޖެ އެމްވީ" އަށް ވިދާޅުވީ ބުރާސްފަތި ދުވަހުގެ ރެއާއި ހުކުރު ދުވަހުވެސް 4ވަރަކަށް ގެއިން ކަރަންޓު ކެނޑުނު ކަމަށެވެ. އަދި އެވްރެޖުކޮށް އުދަ އެރިފަހުން ދުވާލަކު 4 ވަރަކަށް ގެއެއްގައި ކަރންޓުގެ މައްސަލަ ޖެހޭ ކަމަށް އޭނާ ވިދާޅުވިއެވެ. އިސްމާއިލް ވިދާޅުވި ގޮތުގައި އުދައިގެ ސަބަބުން ކަރަންޓު ކެނޑެނީ އެ ރަށުގެ ކަރަންޓު ވިއުގައަކީ ޒަމާންވީ ވިއުގައަކަށްވެފައި ލޮނުގެ އަސަރުކޮށް ވަޔަރުތައް ހަލާކުވެފައިވާތީ ކަމަށެވެ. އޭނާ ވިދާޅުވީ މިވަގުތު ކަރަންޓު ކެނޑޭ ގެތަކަށް ވަގުތީ ގޮތުން ކަރަންޓް ލިބޭނެ ގޮތްތަކެއް ހޯދައިދެވުނު ނަމަވެސް އެކަމަށް ދާއިމީ ހައްލެއް ހޯދަން ޖެހޭ ކަމަށެވެ.

ތިމަރަފުށީގެ 50 އަށްވުރެ ގިނަ ގެއަށް އުދައިގެ ސަބަބުން ބޮޑެތި ގެއްލުންތަކެއް ލިބިފައިވާއިރު އެ ގެތަކަށް ލިބުނު ގެއްލުން މިހާރު ކައުންސިލުން ދަނީ ބަލަމުންނެވެ. އެގޮތުން، ގެތަކުގައި ހިފާ ގެންގުޅޭ ސާމާނާއި ފަރުނީޗަރުތައް ބޭނުން ނުކުރެވޭ ވަރަށް ހަލާކުވެފައިވާއިރު ގެތަކުގެ ފާރުތަކުގައި ރެނދު ލާފައިވާ ކަމަށް ވެސް އިސްމާއިލް ވިދާޅުވިއެވެ.

މީގެ އިތުރުން ކޮވިޑް-19އާ ގުޅިގެން އާމްދަނީ ހޯދާނެ ގޮތްތައް ހޯދުމަށް ތިމަރަފުށީގައި މި ފަހުން ވަނީ ދަނޑުވެރިކަން ވެސް ފަށާފައެވެ. އުދައިގެ ސަބަބުން ދަނޑުތަކަށް ވެސް ބޮޑެތި ގެއްލުން ވެފައިވާ ކަމަށް އެ ރަށު ކައުންސިލުން މައުލޫމާތު ދެއެވެ.

ތިމަރަފުށީގެ ގެތަކަށް ބޮޑެތި ގެއްލުންތައް ލިބިފައިވާއިރު އެ ރަށުގެ އެއަރޕޯޓަށް ވެސް ވަނީ އުދައިގެ ސަބަބުން ގެއްލުން ލިބިފައެވެ. އުދައިގެ ސަބަބުން އެއް ދުވަސް ވަންދެން އެއަރޕޯޓުގެ އޮޕަރޭޝަންތައް ހުއްޓާލަން ޖެހުނުއިރު އެއަރޕޯޓުގެ ބޮޑުބައެއް ގިރަމުންދާ ކަމަށް ވެސް ކައުންސިލުން މައުލޫމާތު ދެއެވެ.

ތިމަރަފުށީހެ އިތުރުން އުދައިގެ ސަބަބުން އެންމެ ބޮޑު ގެއްލުމެއް ލިބުނީ ގދ. މަޑަވެއްޔަށެވެ. އެ ރަށުގެ 54 ގެއަކަށް އުދައިގެ އަސަރު ކޮށްފައިވާއިރު އޭގެ ތެރެއިން 10 ގެއަކަށް ވަނީ ބޮޑެތި ގެއްލުންތަކެއް ލިބިފައެވެ. އެ ގެތަކުގައި ބޭނުންކުރާ ސާމާނާއި ފަރުނީޗަރާއި ސައިކަލުތައް ހަލާކުވެފައިވާއިރު ގެތަކުގައި ރެނދު ލާފައިވާ ކަމަށް އެ ރަށު ކައުންސިލްގެ ރައީސް ފިޔާޒް ހަަން "ރާއްޖެ އެމްވީ" އަށް ވިދާޅުވިއެވެ.

ފިޔާޒު ވިދާޅުވި ގޮތުގައި 10 ގޭގެ ތެރެއިން ކޮންމެ ގެއަކަށް ލިބުނު ގެއްލުން 4 ލައްކަ ރުފިޔާއަށްވުރެ ބޮޑު ވާނެ ކަމަށް ލަފާ ކުރެވެއެވެ. އެއީ އެ ގެތަކަކީ ދަނޑު ހައްދާ ގެތަކަށްވުމާއެކު އަގުބޮޑު މުދާވެސް ބޭނުން ނުކުރެވޭވަރަށް ހަލާކުވެފައި ހުރުމުން ކަމަށް އޭނާ ވިދާޅުވިއެވެ.

އުދަ އެރިއިރު ދެ ރަށް ވެސް އޮތީ އެފަދަ ކަމަކަށް ތައްޔާރު ވެފައެއްނޫނެވެ. ނަމަވެސް އުދަ އަރަން ފެށުމާއެކު ދެ ރަށުގެ ރައްޔިތުން ނުކުމެ ކުރި މަސައްކަތުން މިއަދު ދެ ރަށްވެސް އޮތީ އެފަދަ ހާލަތަކަށް ތައްޔާރުވެފައި ކަމަށް ދެ ރަށުގެ ކައުންސިލުން މައުލޫމާތު ދީފައި ވެއެވެ.