ދެވަަނަ ބުރުގައިވެސް ތައިލެންޑް އަތުން ރާއްޖެ މޮޅު

މެލޭޝިޔާގައި ކުރިއަށްދާ ކުއަޑްރަންގިއުލާ ޓީ20 ސީރީސްގެ ދެވަނަ ބުރުގައިވެސް ރާއްޖެއިން ތައިލެންޑް ބަލިކޮށްފިއެވެ. ފުރަތަމަ ބުރުގައި ރާއްޖެ މޮޅުވީ ހަަމެކަނި ތައިލެންޑް އަތުންނެވެ.

ދެވަނަ ބުރުގައި ތައިލެންޑް އަތުން ރާއްޖޭގެ ޤައުމީ ކްރިކެޓް ޓީމް މޮޅުވީ 41 ލަނޑުންނެވެ. މެޗުގައި ފުރަތަމަ ކުޅެންއަރާ ރާއްޖެއިން ވަނީ 19 ވަނަ އޯވަރުގެ ތެރޭގައި 10 ކުޅުންތެރިން ނުބައިވެގެން 97 ލަނޑު ހަދާފައެވެ. ތައިލެންޑްގެ ހުރިހާ ކުޅުންތެރިން 16.5 އޯވަރުގެ ތެރޭގައި ނުބައިވިއިރު ހެދުނީ 56 ލަނޑެވެ.

މެޗުގައި ރާއްޖެއިން އެންމެ ރަނގަޅަށް ކުޅުނީ 40 ބޯޅައިން 24 ލަނޑު ހެދި ކެޕްޓަން ޔޫސުފް އަޒްޔާން ފަރުހަތުއެވެ. އަހުމަދު ހަސަން 18 ލަނޑު, ހަސަން ހާޒިގު ރަޝީދު 14 ލަނޑު އަދި އަހުމަދު އަމީލް މައުރޫފް 13 ލަނޑު ހެދިއެވެ. ރާއްޖެ ފަހު މެޗުގައި ހޮނިހިރު ދުވަހު ވާދަކުރާނީ މެލޭޝިޔާއާއެވެ. މެލޭޝިޔާ ވަނީ ފައިނަލުން ޖާގަ ހޯދާފައެވެ. ފުރަތަމަ ބުރުގައި ރާއްޖެ މެލޭޝިޔާ އަތުން ވަނީ ބަލިވެފައެވެ.

މުބާރާތުގެ ފައިނަލަށް ދަނީ ކޮންމެ ޓީމެއް ކޮންމެ ޓީމަކާ ދެބުރު ކުޅެ ނިމޭއިރު އެންމެ ކުރީގައި އޮންނަ ދެޓީމެވެ. މުބާރާތުގައި ވާދަކުރާ ހަތަރު ޓީމެވެ.