ޢީދު ބަންދުގައި އެޕާޓްމަންޓު ހުސްކޮށް ހުންނަމަ ފުލުހުންނަށް އަންގަން އިލްތިމާސްކޮށްފި
އީދު ބަންދާ ދިމާކޮށް އާއްމުން ގިނަ ކަންކަމަށް ރައްކާތެރިވުމަށް ވަނީ އެދިފައި
އެކްސިޑެންޓްތަކާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުން
މި ފެށޭ އީދު ބަންދުގައި ގިނަ ބަޔަކު އެކި ރަށްރަށަށް ދަތުރު ކުރާތީ، އެޕާޓްމަންޓް ހުސްކޮށް ހުންނަނަމަ އެ ސަރަހައްދެއްގެ ފުލުހުންނަށް އެކަން އެންގުމަށް އިލްތިމާސްކޮށްފިއެވެ.
ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ސްޕްރިންޓެންޑެންޓް އޮފް ޕޮލިސް ހުސައިން ސަމީރު ވިދާޅުވީ، ކުރިއަށް އޮތީ ބޮޑު ބަންދެއްކަމަށްވާތީ، ގޭގައި ހުންނަތަކެތި ރައްކާތެރިކުރުމަށް ޚާއްސަ ސަމާލުކަމެއް ދޭންޖެހޭކަމަށެވެ. އެގޮތުން، މާލެއިން ބޭރަށް ފުރާނަމަ ގޭގެ ރައްކާތެރިކަން ކަށަވަރުކުރުމަށް އެކަން ފުލުހުންނަށް އެންގުމަށާއި، އާއިލާ މީހަކަށް އެޕާޓްމަންޓަށް ވަދެވޭ ގޮތަށް ހަދާފައި ބެހެއްޓުމަށް އޭނާ އިލްތިމާސްކުރެއްްވިއެވެ.
އަދި އޫދު ބަންދާއި މިނިވަންދުވަހުގެ ބަންދާ ދިމާކޮށް ބޭންކުތައް ބަންދުވާއިރު، ފިހާރަތަކާއި އެހެން ބައެއް ވިޔަފާރިތަކުގެ ފައިސާތައް ޖަމާނުކުރެވި ހުންނާނެކަން ފާހަގަ ކުރައްވައި، އެ ފައިސާއަށް ސަމާލުވުމަށްވެސް އޭނާ އިލްތިމާސްކުރެއްވިއެވެ.
މީގެ އިތުރުން އީދުގެ ކުޅިވަރުތައް ރާވާއިރު އެހެން މީހުންނަށް އުނދަގޫ ނުވާނެހެން ރޭވުމަށް ވެސް ފުލުހުން ވަނީ އިލްތިމާސްކޮށްފައެވެ.
މާލޭގައި ދިރިއުޅޭ ފަރާތްތަކުން އީދު ނަމާދަށް ދާއިރުވެސް ޚާއްސަ ސަމާލުކަމެއް ދިނުމަށް ފުލުހުން އެދެއެވެ. އެގޮތުން، ބޮޑު ޖަމާއަތުގައި ނަމާދުކުރާއިރު އެންމެންނަށް ޕާކުކުރެވޭވަރުގެ ޖާގައެއް ނުދެވޭނެތީ ވީހާވެސް ގިނަ ފަރާތްތަކުން ހިނގާފައި ނަމާދަށް ދިއުމަށް ވަނީ އިލްތިމާސްކޮށްފައެވެ.
