ވިލާ ކޮލެޖްގެ ސްޓުޑެންޓް އެސޯސިއޭޝަން (ވީ.ސީ.އެސް.އޭ)ގެ ފަރާތުން އިންތިޒާމުކޮށްގެން ބާއްވާ ޓްރިޕަލް ތްރެޓް ބާސްކެޓްބޯލް ޓޯނަމެންޓް 2022 (ޓީ.ޓީ.ބީ.ޓީ) ނިންމާލައި، ޗެމްޕިއަން ޓީމުތަކަށް ޓްރޮފީ ހަވާލުކޮށްފިއެވެ.

މުބާރާތުގެ ތްރީ އޮން ތްރީގައި ބުދަ ދުވަހުގެ ރޭ ވަނީ ސެމީ ފައިނަލް މެޗުތަކާއި ފައިނަލް މެޗު ކުޅެފައެވެ. ބުދަ ދުވަހުގެ ރޭ އެންމެ ފުރަތަމަ ކުޅުނީ ފިރިހެން ޑިވިޝަންގެ ސެމީ މެޗުތަކެވެ. ފުރަތަމަ ސެމީގައި ބައްދަލުކުރީ ވިލާ ކޮލެޖާއި މެޕްސް ކޮލެޖެވެ. މި މެޗު 17-10 ން ކާމިޔާބުކުރީ ވިލާ ކޮލެޖެވެ. ދެ ވަނަ ސެމީގައި ބައްދަލުކުރީ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އާއި ސެންޓަރ ފޯރ ހަޔަރ ސެކަންޑްރީ އެޑިއުކޭޝަން (ސީ.އެޗް.އެސް.އީ)އެވެ. މި ސެމީގައި ސީ.އެޗް.އެސް.އީން ވަނީ 8-6 ން އެމް.އެން.ޔޫގެ މައްޗަށް ކުރި ހޯދާފައެވެ.

އަންހެން ޑިވިޝަންގެ ފުރަތަމަ ސެމީގައި ބައްދަލުކުރީ ސީ.އެޗް.އެސް.އީ އާއި އަޙުމަދިއްޔާ އިންޓަރނޭޝަނަލް ސްކޫލެވެ. މި މެޗު ސީ.އެޗް.އެސް.އީން ކާމިޔާބުކުރީ 8-0 ންނެވެ. ދެ ވަނަ ސެމީގައި އެމް.އެން.ޔޫ އިން ވަނީ 8-0 ން ވިލާ ކޮލެޖުގެ މައްޗަށް ކުރި ހޯދާފައެވެ.

ބުދަ ދުވަހުގެ ރޭ ކުޅެވުނުނ ފިރިހެން ޑިވިޝަންގެ ފައިނަލްގައި ބައްދަލުކުރީ ވިލާ ކޮލެޖާއި، ސީ.އެޗް.އެސް.އީ އެވެ. ފައިނަލްގައި ވިލާ އިން ވަނީ 12-7 ން ސީ.އެޗް.އެސް.އީގެ މައްޗަށް ކުރި ހޯދައި ޗެމްޕިއަންކަން ހޯދާފައެވެ. އަންހެން ޑިވިޝަންގެ ފައިނަލްގައި ބައްދަލުކުރީ ސީ.އެޗް.އެސް.އީ އާއި އެމް.އެން.ޔޫ އެވެ. މި ފައިނަލްގައި ސީ.އެޗް.އެސް.އީން ވަނީ 7-6 ގެ ހަނި ނަތީޖާއަކުން އެމް.އެން.ޔޫ ބަލިކޮށް ޗެމްޕިއަންކަން ހޯދާފައެވެ.

ފައިނަލް މެޗުތަކަށްފަހު މުބާރާތުގެ ޗެމްޕިއަން ޓީމުތަކަށް ވަނީ ތަށި ހަވާލުކުރުން ކުރިއަށް ގެންގޮސްފައެވެ. މުބާރާތުގެ ފައިވް އޮން ފައިވްގެ ފިރިހެން ޑިވިޝަންގެ ޗެމްޕިއަންކަން ހޯދީ އެމް.އެން.ޔޫއެވެ. އަންހެން ޑިވިޝަންގެ ޗެމްޕިއަންކަން ހޯދީ ސީ.އެޗް.އެސް.އީއެވެ. ޗެމްޕިއަން ޓީމުތަކަށް ތަށި ހަވާލުކޮށްދެއްވީ ފައިނަލް މެޗުގެ ޝަރަފުވެރި މެހެމާން ދިވެހިރާއްޖޭގެ ޒުވާނުންގެ ކައުންސިލްގެ ރައީސް ޙަސަން ފަރުޙާން މުޙައްމަދެވެ.

މުބާރާތާ ގުޅޭ ގޮތުން ވާހަކަ ދައްކަމުން ވިލާ ކޮލެޖުގެ ދަރިވަރުން އެސޯސިއޭޝަންގެ ރައީސް މޫސާ މީކާއީލް އަހުމަދު ވިދާޅުވީ އިންޑޯރ ބާސްކެޓު ކޯޓު ނުލިބުމުގެ ސަބަބުންނާއި މޫސުން ގޯސްވުމުގެ ސަބަބުން މުބާރާތް ކުރިއަށް ގެންދިޔުމަށް އުނދަގޫތަކެއް ދިމާވި ނަމަވެސް، އެކަންކަމަށް ދޫ ނުދީ ވިލާ ކޮލެޖު ދަރިވަރުންގެ އެސޯސިއޭޝަނުން މުބާރަތް ނިންމާލީ ވަރަށް ފުރިހަމަކަމާއެކުކަމަށެވެެ. މީކާއީލް ވިދާޅުވީ މުބާރާތް ކާމިޔާބުކަމާއެކު ނިންމާލެވުނީ ބައިވެރިވި ޓީމުތަކުގެ ފަރާތުން ލިބުނު ވަރަށް ބޮޑު އެއްބާރުލުމަކާއެކު ކަމަށެވެ. އޭނާ ވިދާޅުވީ މުބާރާތުން ފެނުނު ސަޕޯޓާއެކު ކުރިއަށް އޮތް އަހަރުތަކުގައި ވެސް ހަޔަރ އެޑިއުކޭޝަން ކޮމިއުނިޓީގައި ބާސްކެޓުގެ ފޯރި ގަދަވާނެ ކަމަށް ޔަގީން ކުރާ ކަމަށެވެ. އިތުރަށް މީކާއީލް ވިދާޅުވީ ކުރިއަށް އޮތް އަހަރުގައި ވެސް މުބާރާތް ބާއްވާނެކަމަށާއި، އިރާދަކުރެއްވިއްޔާ މިޔަށްވުރެ ފުރިހަމަ، ކާމިޔާބު މުބާރާތެއް ބާއްވަން މަސައްކަތް ކުރާނެ ކަމަށެވެ.