އެންމެ ފަހުގެ ޗެމްޕިއަން ޗެލެންޖަރސް ބަލިކޮށް، އެކްސިޓޯއިން ފުރަތަމަ ފަހަރަށް ތަށި އުފުލާލައިފި

ރައްޒާގުބެ މެމޯރިއަލް ކަޕްގެ ފައިނަލްގައި އެންމެ ފަހުގެ ޗެމްޕިއަން ޗެލެންޖަރސް ބަލިކޮށް، އެކްސިޓޯއިން ފުރަތަމަ ފަަހަރަށް މުބާރާތުގެ ތަށި އުފުލާލައިފިއެވެ.

އެކްސިޓޯއިން މުބާރާތުގެ ފައިނަލަށް ދަތުރުކުރީ ދެ ވަނަ ސެމީ ފައިނަލްގައި އޯލް އެޓޭކް ބަލިކޮށްގެންނެވެ. ޗެލެންޖަރސް ފައިނަލަށް ދަތުރުކުރީ އެއްވެސް މެޗަކުން ބަލި ނުވެއެވެ.

ބުދަ ދުވަހުގެ ހަވީރު ކުޅުނު ފައިނަލް މެޗު އެކްސިޓޯއިން ކާމިޔާބުކުރީ ޕެނަލްޓީ ޖަހައިގެންނެވެ. މެޗުގެ ފުރިހަމަ ވަގުތު ހަމަވީއިރު ވެސް ދެ ޓީމުން ކުރެ އެއްޓީމަކަށް ވެސް ލަނޑެއް ކާމިޔާބު ކުރެވިފައި ނުވުމުން، ނަތީޖާ ނެރުމަށް ވަނީ ޕެނަލްޓީ ޖަހާފައެވެ. ނަތީޖާ ނެރުމަށް ޖެހި ޕެނަލްޓީގައި އެކްސިޓޯއިން ވަނީ ހަތަރު ޕެނަލްޓީ ކާމިޔާބުކޮށްފައެވެ. އެއީ އެ ޓީމުގެ އާލިމް އަބްދުލް ގައްޔޫމާއި، ނާޖިހު އިބްރާހިމާއި، އިސްމާއިލް މަދީހު އަދި ހުސެއިން ޝަފްރާހުގެ ޕެނަލްޓީތަކެވެ. އެ ޓީމުގެ އަޙުމަދު ރިފްޝާންގެ ޕެނަލްޓީ ވަނީ ކާމިޔާބުނުވެފައެވެ.

ޗެލެންޖަރސްއަށް ކާމިޔާބުކުރެވުނީ ތިން ޕެނަލްޓީއެވެ. އެއީ އެ ޓީމުގެ މުޙައްމަދު ތަސްމީނާއި، އަޙުމަދު ނޫމާން އަދި މުޙައްމަދު ނާއިމްގެ ޕެނަލްޓީތަކެވެ. އެ ޓީމުގެ މުޙައްމަދު ޝަހީމާއި އަޙުމަދު ނިމާލްގެ ޕެނަލްޓީ ވަނީ ނާކާމިޔާބުވެފައެވެ. އެއާއެކު އެންމެ ފަހުގެ ޗެމްޕިއަން ޗެލެންޖަރސްގެ މައްޗަށް އެކްސިޓޯއިން ކުރި ހޯދީ 4-3 ގެ ނަތީޖާއަކުންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ޗެލެންޖަރސްގެ އަޙުމަދު ނޫމާންއެވެ.

މުބާރާތުގެ ފައިނަލް މެޗު ޝަރަފުވެރިކޮށްދެއްވީ ކޮމިޝަނަރ އޮފް ސްޕޯޓްސް ހީނާ އަޙުމަދު ސަލީމްއެވެ. ފައިނަލް މެޗަށްފަހު ވަނީ މުބާރާތުގެ ނިންމުމުގެ ރަސްމިއްޔާތު ބާއްވާފައެވެ. މުބާރާތުގެ އެންމެ އުންމީދީ ކުޅުންތެރިޔަކަށް ހޮވުނީ އަލީ ޒާއިފްއެވެ. އެންމެ މޮޅު ގޯލް ކީޕަރަކަށް ހޮވުނީ ހުސެއިން ޝިފާދުއެވެ. މުބާރާތުގެ އެންމެ ގިނަ ގޯލު ޖެހި ކުޅުންތެރިޔަކަށް ހޮވުނީ އާލިމް އަބްދުލް ގައްޔޫމާއި، މުހައްމަދު އަތީފްއެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އާލިމް އަބްދުލް ގައްޔޫމެވެ. މުބާރާތުގެ ފެއާ ޕްލޭ ޓީމަކަށް ހޮވުނީ ސިކްސް އެކްސްއެވެ.

މި މުބާރާތަކީ އެރަށުގެ ފުޓުބޯޅަ ލެޖެންޑު އަލްމަރުހޫމް އަބްދުއް ރައްޒާގު މޫސާގެ ހަނދާނުގައި 2015 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އެންމެ ފުރަތަމަ މި މުބާރާތް ބާއްވާފައިވަނީ "ތުއްތޮންބެ ކަޕް"ގެ ނަމުގައެވެ. އޭގެ ފަހުން 2019 ވަނަ އަހަރު މުބާރާތުގެ ނަން ވަނީ ރައްޒާގުބެ މެމޯރިއަލް ކަޕަށް ބަދަލުކޮށްފައެވެ.