ވިއްސާރަވުމުން، 10 އޯވަރު ކުޅުނު މެޗުން ރާއްޖެ އަތުން މެލޭޝިޔާ މޮޅު
6 ޖުލައި 2022 | ބުދަ 14:17ފުރަތަމަ ބުރުން އެއްވަނަ ހޯދީ މެލޭޝިޔާ
މެލޭޝިޔާއާއި ރާއްޖެ - މެޗު ފެށުމުގެ ކުރިން
މެލޭޝިޔާގައި މިހާރު ކުރިއަށްދާ ކުއަޑްރަންގިއުލާ ޓީ20 ސީރީސްގައި މެލޭޝިޔާ އަތުން ރާއްޖެ ބަލިވެއްޖެއެވެ.
މެލޭޝިޔާއިން ރާއްޖެ ބަލިކުރީ 8 ވިކެޓުންނެވެ. 20 އޯވަރު ކުޅޭ މުބާރާތުގެ މިމެޗުގައި ކުޅުނީ 10 އޯވަރެވެ. އެއީ ވިއްސާރަވުމުގެ ސަބަބުންނެވެ. މެޗުގައި ރާއްޖެއިން ފުރަތަމަ ކުޅެން އަރައި، އެއް އޯވަރު ނިމުނުތަނާ ވިއްސާރަވުމުގެ ސަބަބުން މެޗު މެދުކަނޑާލިއެވެ. ވިއްސާރަ ހުއްޓާލުމުން އަލުން އަމްޕަޔަރުން މެޗު ފެށީ 10 އޯވަރު ކުޅޭ ގޮތަށެވެ. ބާކީ އޮތް 9 އޯވަރާއެކު، ދިހަ އޯވަރުން ރާއްޖެއަށް ހެދުނީ 8 ކުޅުންތެރިން ނުބައިވެގެން، 57 ލަނޑެވެ. މެލޭޝިޔާއިން ވަނީ 4.2 އޯވަރުގެ ތެރޭގައި ދެ ކުޅުންތެރިން ނުބައިވެގެން 59 ލަނޑު ހަދާފައެވެ.
މުބާރާތުގައި ކޮންމެ ޓީމެއް ކޮންމެ ޓީމަކާ ދެފަހަރު ވާދަކުރާނެއެވެ. ފައިނަލަށްދާނީ އެންމެ ގިނަ ޕޮއިންޓް ހޯދާ ދެޓީމެވެ. ފުރަތަމަ ބުރު ނިމުނުއިރު ތިން މެޗުންވެސް މޮޅުވެ އެއްވަނާގައި އޮތީ މެލޭޝިޔާއެވެ. ރާއްޖެ ފުރަތަމަ ބުރުގައި މޮޅުވީ ތައިލެންޑް އަތުންނެވެ. ދެވަނާގައި އޮތީ ބޫޓާނެވެ. ބޫޓާން ވަނީ ރާއްޖޭގެ އިތުރުން ތައިލެންޑްވެސް ބަލިކޮށްފައެވެ. ފުރަތަމަ ބުރުގައި މޮޅެއް ނުލިބެނީ ތައިލެންޑަށެވެ.
