އާއިލާގެ ޒިންމާދާރު މަގާމުތަކުގައި ތިބެ، ކުޑަ ކުއްޖަކާމެދު ޖިންސީ އަމަލެއް ހިންގިކަމަށް ތުހުމަތުކުރެވޭ މައްސަލާގައި ދެކުނުގެ އަތޮޅެއްގެ ރަށަކުން ހައްޔަރުކުރި ކާފައާއި މުނިކާފަގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން ހުކުމްކޮށްފިއެވެ.

ބުދަ ދުވަހު އެ ކޯޓުގެ އިސްގާޒީ އަހުމަދު ޝަކީލު ކުރެއްވި ހުކުމުގައި ވަނީ، އެ ދެމީހުންގެ މައްޗަށް އުފުލާފައިވާ، އާއިލާގެ މެމްބަރަކު އެ އާއިލާގެ ކުޑަކުއްޖަކާމެދު ޖިންސީ އަމަލެއް ހިންގުމުގެ ކުށުގެ ދައުވާ ސާބިތުވާކަމަށް ނިންމަވާފައެވެ. އެ ކުށުގެ އުގޫބާތެއްގެ ގޮތުން އެ ދެމީހުންވެސް، ގާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާ ކުރާ މީހުންނާމެދު ޚާއްސަ އުސޫލުތަކުން އަމަލު ކުރުމުގެ ގާނޫނު)ގެ ދަށުން 25 އަހަަރަށް ޖަލަށްލުމަށް ގާޒީ ވަނީ ހުކުމްކުރައްވާފައެވެ.

މި މައްސަލައާ ގުޅިގެން އެމީހުން ހައްޔަރުކުރީ 17 ޖެނުއަރީ 2020ގައެވެ.

އެމީހުން ބަންދުގައި ތިބި މުއްދަތު ހުކުމުން އުނި ކުރުމުން، އެމީހުން ތަންފީޒު ކުރަންޖެހޭ ޖަލު އަދަބަކީ 22 އަހަރާއި، 6 މަހާއި 10 ދުވަސްކަމަށް ވަނީ ކަނޑައަޅުއްވާފައެވެ.

އެގޮތުން މި މައްސަލައިގައި ހިމެނޭ ކުޑަކުއްޖާއަށް ޖިންސީ ގޯނާ ކުރިކަމުގެ ތުހުމަތު ކުރެވެނީ އޭނާގެ ބައްޕަ ފަރާތު ކާފަގެ މައްޗަށެވެ. އަދި ކުއްޖާގެ މުނިކާފަ އޭރު ހައްޔަރުކުރީ އޭނާއަކީ ކުޑަކުދިންނަށް ޖިންސީ ފުރައްސާރަކުރުމުގެ ރިކޯޑު އޮންނަ މީހަކަށްވާތީއެވެ.

އެކުއްޖާގެ މުނިކާފަގެ އިތުރުން، ކާފައަކީ ވެސް މީގެކުރިން، ކުޑަކުއްޖަކަށް ޖިންސީ އަނިޔާ ކުރިކަމުގެ ތުހުމަތުގައި ތަހުގީގު ފުރިހަމަކޮށް، ޕްރޮސެކިއުޓަރ ޖެނެރަލްގެ އޮފީހަށް ދައުވާކުރަން ފޮނުވާފައިވާ މީހެއްކަމަށް ފުލުހުން ބުނެއެވެ.

ނަމަވެސް އެމައްސަލަވެސް ކުރިއަށް ނުގޮސް، ރަށު ތެރޭގައި އެ ދެ މީހުންވެސް އުޅެމުންގޮސް، އަމިއްލަ ކާފަދަރިފުޅަށް ޖިންސީ އަނިޔާދިން މައްސަލަ ފެންމަތިވުމާއެކު އާންމުންގެ ގިނަ ބަޔަކު ވަނީ އެކަމުގެ ނުރުހުން ފާޅުކޮށް އޭރު އަޑުއުފުލާފައެވެ.