ހަތް އަހަރަށް ފަހު ޕެރިސް ސެއިންޓް ޖާމަން (ޕީއެސްޖީ) ދޫކޮށްލަން ނިންމި އެންހެލް ޑި މާރިއާ އިޓަލީގެ ޔުވެންޓަސްއަށް ގުޅެން ނިންމައިފިއެވެ.
ޑި މާރިއާ ޔުވެންޓަސްއަށް ގުޅެން ނިންމީ ހިލޭ ޓްރާންސްފާއެއްގައެވެ. އޭނާ ވަނީ ނިމުނު ސީޒަނަށްފަހު ޕީއެސްޖީ ދޫކޮށްލަން ނިންމާފައެވެ. ޕީއެސްޖީ ދޫކޮށްލަން ޑި މާރިއާ ނިންމުމާއެކު ޕީއެސްޖީން ބުނީ ޑި މާރިއާއަކީ ޕީއެސްޖީއަށް ފުލް ކޮމިޓްމަންޓް ދިން, ސަޕޯޓަރުން އަބަދުމެ ހަނދާންކުރާނެ ކުޅުންތެރިއެއްކަމަށެވެ.
ޕީއެސްޖީ ދޫކޮށްލަން ނިންމުމާއެކު އޭނާ ހޯދުމުގެ މަސައްކަތް ޔުވެންޓަސް އިން ފެށި ކަމަށް މީޑިއާ ރިޕޯޓުތައް ވަނީ ބުނެފައެވެ. އެ މަސައްކަތުގެ ތެރެއިން ޔުވެންޓަސް އިން ކުރި ފުރަތަމަ ބިޑު އޭނާ ބަލައިނުގަންނަން ނިންމި ކަމަށް ވެސް މީޑިއާ ރިޕޯޓުތައް ބުންޏެވެ. ނަމަވެސް ޔުވެންޓަސް އިން ދެވަނަ ބިޑެއް ހުށަހަޅާނެ ކަމަށް ވެސް އޭރު މީޑިއާތަކުގައި ރިޕޯޓުކުރިއެވެ. އެއީ އެއް އަހަރު ދުވަހުގެ އެއްބަސްވުމެެއް ކަމަށާއި، މުއްދަތު ހަމަވުމުން އެއްބަސްވުން އައު ކުރުމުގެ ފުރުސަތު ލިބޭ ގޮތަށް ހުށަހަޅާ ބިޑެކެވެ.
އިތުބާރު ކުޅިވަރު ނޫސްވެރިޔާ ފެބްރީޒިއޯ ރޮމާނޯ މިއަދު ބުނި ގޮތުގައި ޔުވެންޓަސްއިން މިހާރު ވަނީ ޑި މާރިއާއާއެކު އެއްބަސްވުމަކަށް އާދެވިފައެވެ. އެއާއެކު އޭނާ މިހަފްތާގެ ތެރޭގައި އިޓަލީއަށް ދަތުރުކުރާނެ ކަމަށް ބެލެވޭ ކަމަށެވެ. މީގެ އިތުރުން ރޮމާނޯ ބުނީ ޑި މާރިއާ ޕީއެސްޖީއަށް ބަދަލުވާނީ އެއް އަހަރު ދުވަހުގެ މުއްދަތަކަށް ކަމަށެވެ. އެކަމާ ގުޅޭ ލިޔެ ކިޔުންތައް މިހާރު ތައްޔާރުކަމަށާއި، އޭގައި ސޮއިކުރުން ވަރަށް އަވަހަށް ކުރިއަށްދާނެ ކަމަށެވެ.
ރޮމާނޯ ބުނި ގޮތުގައި ޑި މާރިއާގެ އިތުރުން ޕައުލް ޕޮގްބާ ވެސް ޔުވެންޓަސް އަށް ބަދަލުވާން އެއްބަސްވެފައިވާ ކަމަށެވެ. އަންނަ ހޮނިހިރު ދުވަހު ޕޮގްބާ ވެސް އިޓަލީގެ ޓިއުރިން އަށް ދަތުކުރާނެ ކަމަށް ރޮމާނޯ ވަނީ ބުނެފައެވެ.
ޑި މާރިއާ ވަނީ ޕީއެސްޖީއާއެކު 18 ތަށި އުފުލާލާފައެވެ. ހަތް އަހަރުގެ ތެރޭގައި 91 ގޯލް އެކްލަބަށް ޖަހައިދިނެވެ. އަދި 111 ގޯލް ޖަހަން ފުރުސަތު ފަހިކޮށްދިނެވެ.
