މާލޭގެ އެކި ސަރަހައްދުތަކުގައި ފުލުހުންގެ އޮޕަރޭޝަންތަކުގައި ގެންގުޅޭ ޑޯގު ސްކޮޑާއެކު މިއަދު ޚާއްސަ ތަމްރީނެއް ކުރިއަށް ގެންދިއުމަށް ހަމަޖެހިއްޖެއެވެ.
މިއަދު މާލޭގައި ކުރިއަށް ގެންދިއުމަށް ހަމަޖެހިފައިވާ ތަމްރީނާއި ގުޅޭގޮތުން ފުލުހުން ބުނީ މި ތަމްރީނަކީ މާލޭގެ އެކި ސަރަހައްދުތަކުގައި ޑޯގު ސްކޮޑާއިއެކު ފުލުހުން ކުރިއަށް ގެންދިއުމަށް ހަމަޖެހިފައިވާ ތަމްރީނެއް ކަމަށެވެ. ނަމަވެސް މި ތަމްރީނާއި ބެހޭ އިތުރު މައުލޫމާތެއް ފުލުހުން ހާމަައެއް ނުކުރެއެވެ.
ކުއްތާ ބޭނުންކޮށްގެން ފުލުހުން މީގެ ކުރިން ވެސް ވަނީ އޮޕަރޭޝަންތައް ހިންގާފައެވެ. އެގޮތުން 2020 ވަނަ އަހަރު ވެސް ޑްރަގް އެންފޯސްމެންޓް ޑިޕާޓްމެންޓްގެ އޮޕަރޭޝަން ޓީމަކުން ކުއްތާ ބޭނުން ކޮށްގެން, މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ތެރޭގައި އޮޕަރޭޝަނެއް ވަނީ ކުރިއަށް ގެންގޮސްފައެވެ.
ފުލުހުން ބުނީ އެމްޕީއެލްގައި ކުރިއަށް ގެންދާ އޮޕަރޭޝަނަކީ ވަކި ޚާއްސަ އޮޕަރޭޝަނެއް ނޫން ކަމަށެވެ. މިއީ ދޭތެރެ ދޭތެރެއިން ކުރިއަށްގެންދާ އޮޕަރޭޝަނެއް ކަމަށް ފުލުހުން ބުނެއެވެ.
ފުލުހުން ގެންގުޅެމުންދާ ކުއްތާތަކަކީ މަސްތުވާތަކެތި ދެނެގަތުމަށް ޚާއްސަކޮށް ތަމްރީން ކޮށްފައިވާ ކުއްތާތަކެކެވެ. އެގޮތުން ކުއްތާ ބޭނުންކޮށްގެން ކުރިއަށްގެންދާ އޮޕަރޭޝަންތަކުގައި ގިނަ އަދަދެއްގެ މަސްތުވާތަކެތި ވެސް އަތުލައިގަނެއެވެ.
