ބަންދުތަކާ ގުޅިގެން، ޝަރުއީދާއިރާއިން ރެކޯޑު ސާފުކުރާ ދުވަސްތަކަށް ބަދަލުތަކެއް

ޖުލައި މަހު އަންނަ ސަރުކާރު ބަންދު ދުވަސްތަކާ ގުޅިގެން ޝަރުއީ ދާއިރާއިން ކުށާއި ދަރަނީގެ ރެކޯޑު ސާފުކުރުމަށް ހަމަޖެހިފައިވާ ދުވަސްތަކަށް ބަދަލު ގެންނަން ނިންމައިފިއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން އަންގާރަ ދުވަހު ކުރި އިއުލާނުގައި ވަނީ، މިހާރު އޮންނަ ގޮތުން ރެކޯޑު ސާފުކުރުމަށް އެދި ހުށަހަޅާތާ 3 ދުވަހުގެ ތެރޭގައި ރެކޯޑު ސާފު ކުރަންޖެހޭކަމަށެވެ. ނަމަވެސް އަޟްހާ އީދާއި މިނިވަން ދުވަހާ ގުޅިގެން ވަރަށް ގިނަ ދުވަސްތަކެއް ބަންދުވާތީ އެ ދުވަސްތަކުގައި ރެކޯޑު ސާފުކުރުމުގައި ބަދަލުތަކެއް އަންނާނެކަމަށެވެ.

އެ އިދާރާއިން ބުނިގޮތުގައި މި ބަދަލާއެކު 5 ޖުލައިގެ ފަހުން ހުށަހަޅާ ފޯމުތަކުގެ ރެކޯޑު ސާފުކޮށްދެވޭނީ އަޟްހާ އީދާ ގުޅިގެން އަންނަ ބަންދު ދުވަސްތަކަށްފަހު ސަރުކާރު ހުޅުވުމުންނެވެ.

މީގެ އިތުރުން 21 ޖުލައިގެ ފަހުން ހުށަހަޅާ ފޯމުތަކުގެ ރެކޯޑު ސާފުކުރުމުގެ މަސައްކަތް ކުރިއަށްދާނީ މިނިވަންދުވަހާ ގުޅިގެން އަންނަ ބަންދަށްފަހު، ސަރުކާރު ހުޅުވުމުންކަމަށް ޖުޑީޝަލް އެޑްމިނިސްޓްރޭޝަނުން ބުނެއެވެ.