ނ. މާޅެންދޫ، ވައިޓް ހައުސް، އަހުމަދު މިރުޒާ އިބްރާހިމް މަރާލި މައްސަލައިގެ މެރުމަށް ޙުކުމް ކޮށްފައިވާ ވ. ފަޒީލާމަންޒިލް، މުހައްމަދު ޝިފާއުގެ ފަރާތުން ހައިކޯޓުގައި އިސްތިއުނާފު ކޮށްފައިވާ މައްސަލައިގެ އަޑުއެހުމެއް ކުރިއަށް ގެންގޮސްފިއެވެ.

މިރުޒާ އަށް ލަކުނޑިބުރިންނާއި ދަގަނޑު ހޮޅިތަކަކުން ހަމަލާދިނީ 2011 ވަނަ އަހަރުގެ އޭޕްރީލް 11 ވަނަ ދުވަހު އެވެ. ވިލިމާލޭ ޕާކް ސަރަހައްދުގައި ހިނގި އެ މާރާމާރީގައި ލިބުނު އަނިޔާތަކާ ގުޅިގެން، މިރުޒާގެ ސިކުނޑި މަރުވިއިރު، އައިޖީއެމްއެޗްގެ ވެންޓިލޭޓަރެއްގައި ބާއްވާފައި އޮއްވާ މިރުޒާ މަރުވީ 2011 ވަނަ އަހަރުގެ އޭޕްރީލް 14 ވަނަ ދުވަހު އެވެ.

މިރުޒާގެ މަރާއި ގުޅިގެން އިތުރު ބައެއްގެ މައްޗަށްވެސް ދައުވާކޮށް، ކުށް ސާބިތުވެފައިވެއެވެ.

މިރުޒާ މަރާލިކަން ޏ. ފުވައްމުލަކު، ޒާވިޔާ، އަބްދުﷲ ނަޒީފްއާއި، ޝިފާއުގެ މައްޗަށް ގާނޫނު އަސާސީގެ 51 ވަނަ މާއްދާގެ 'އ' ގައި ބަޔާންކޮށްފައިވާ ފަދައިން އެއްވެސް ޝައްކެއް ނެތް މިންވަރަށް ސާބިތުވާކަމަށް ކަނޑައަޅައި ކްރިމިނަލް ކޯޓުން ވަނީ ވާރިސުންގެ ބަހާއެކު، އެ ދެ މީހުންގެ މައްޗަށް މަރުގެ ހުކުމް އިއްވާފަ އެވެ. އެއީ 4 އޭޕްރީލް 2017 ގައެވެ. އެ މައްސަލަ އިސްތިއުނާފު ކުރުމުން ނަޒީފުގެ މައްޗަށް ކޮށްފައިވާ ޙުކުމް ހައިކޯޓުން ދެމެހެއްޓީއެވެ.

އެންމެ ފުރަތަމަ ފަނޑިޔާރު މުޙައްމަދު ނިޔާޒު ވަނީ ރައުޔު އިއްވަވާފައެވެ. އަންގާރަ ދުވަހު ކުރިއަށް ދިޔަ އަޑުއެހުމުގައި ފަނޑިޔާރު ނިޔާޒް ވަނީ އޭނާގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން ނިންމި ނިންމުމަށް ތާއީދު ކުރައްވާފައެވެ.

އެހެންނަމަވެސް މި މައްސަލައިގައި ހިމެނޭ މީހުންނަށް މިރުޒާގެ ބައްޕަ ފަހުން ވަނީ މައާފް ދީފައެވެ. އެކަން ހައިކޯޓުގައި ކުރިން ކުރިއަށްދިޔަ އަޑުއެހުމެއްގައި އޭނާ ފާހަގަކޮށްފައިވެއެވެ. ވުމާއެކު، މިހާރު ދަށު ކޯޓުން ކުރި މަރަށް މަރު ހިފުމުގެ އަދަބުގެ ބަދަލުގައި ޝިފާއުއަށް ތައުޒީރީ އަދަބެއް ދެވިދާނެކަން ފަނޑިޔާރު ފާހަގަ ކުރެއްވިއެވެ.

މިރުޒާގެ މަރުގެ ދިޔައިގެ މައްސަލަ ވަކި މައްސަލައެއްގެ ގޮތުގައި ކުރިއަށް ގެންދެވިދާނެކަން ވަނީ ބަޔާންކުރައްވާފައެވެ.

ވުމާއެކު، އޭނާ 17 އަހަރާއި 6 މަސް ދުވަހަށް ޖަލަށް ލުމަށާއި، ވިދިވިދިގެން 2 މަސް ދުވަހު ރޯދަ ހިފުމަށް ވަނީ ޙުކުމް ކުރައްވާފައެވެ.

ބެންޗުގައި ދެން ހިމެނިވަޑައިގަންނަވާ ފަނޑިޔާރު ހުސައިން ޝަހީދުއާއި، މުޙައްމަދު ފައިސަލްވެސް ވަނީ އެ ޙުކުމަށް ތާއީދު ކުރައްވާފައެވެ.