އީދަށް ހާއްސަ ދަތުރުތަކެއް ހއ. އަދި ހދ.ގައި ބާއްވަން އާރުޓީއެލްއިން ނިންމައިފި
އެއަރޕޯޓްތައް ހުންނަ ރަށްތަކަށް ވެސް އިތުރު ދަތުރުތައްކުރާނެ
ރާއްޖެ ޓްރާންސްޕޯޓް ލިންކް (އާރުޓީއެލް)
އަޟްހާ އީދާ ދިމާކޮށް ރަށްރަށަށްދާ ފަރާތްތަކަށް ލުއި ފަސޭހަކޮށް ދަތުރުކުރެވޭނެ ގޮތެއް ހެދުމަށްޓަކައި އިތުރު ފެރީތަކެއް ބާއްވާނެކަމަށް ރާއްޖެ ޓްރާންސްޕޯޓް ލިންކު (އާރުޓީއެލް) އިން ބުނެފިއެވެ.
ހއ. އަތޮޅުގައި އާދީއްތަ ދުވަހު ރަސްމީކޮށް ހައިސްޕީޑް ފެރީގެ ހިދުމަތް ދޭން ފެށުމާއި ގުޅިގެން، ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އެމްޓީސީސީގެ ޓްރާންސްޕޯޓް މެނޭޖަރު އަބްދުﷲ ޝިމާއު ވިދާޅުވީ، އިތުރު ފެރީ ދަތުރުތައް ކުރުމަށް ނިންމާފައިވަނީ އާންމުންނަށް ލުއި ފަސޭހަ ގޮތެއްގައި ދަތުރުތައް ހަމަޖެއްސުމަށް ކަމަށެވެ.
އެގޮތުން ހއ. އަދި ހދ. އަތޮޅުގައި ޝެޑިއުލްކޮށްގެން ކުރިއަށް ގެންދާ ދަތުރުތަކުގެ އިތުރުން ޑިމާންޑަށް ބަލާފައި އިތުރު ދަތުރުތައް ކުރަމުން ގެންދާނެކަމަށެވެ. ވަކިން ހާއްސަކޮށް ހޮޓްސްޕޮޓްތައް ކަމަށްވާ ކުޅުދުއްފުށި ސިޓީ އަދި ހއ. އިހަވަންދޫއާއި އެހެން ރަށްތަކާއި ގުޅުވާލެވިގެން އިތުރު ފެރީ ދަތުރުތައް ކުރާނެކަމަށާއި އެއަރޕޯޓްތައް ހުންނަ ރަށްތަކަށް ވެސް އިތުރު ދަތުރުތައް ކުރާނެ ކަމަށް ޝިމާއު ވިދާޅުވިއެވެ.
ޝިމާއު ވިދާޅުވީ ހއ. އަދި ހދ.ގައި ދެމުންދާ ހައިސްޕީޑް ފެރީގެ ބުކިންގ ވެސް ވަރަށް ބޮޑަށް ފުލްވެފައިވާ ކަމަށެވެ. އެހެންކަމުން ރަށްރަށް ދަތުރުތައް ކުރާ ޑިމާންޑާއި އެއްވަރަށް ކޭޓަރު ކުރުމުގެ މަސައްކަތްވެސް ކުރައްވާނެ ކަމަށެވެ.
އެމްޓީސީސީގެ ޓްރާންސްޕޯޓް މެނޭޖަރު އަލީ ފާތިހު ވިދާޅުވީ ޕްލޭނިންގ މިނިސްޓްރީއާއި ގުޅިގެން އީދާއި އެހެނިހެން ބޮޑެތި ބަންދު ދުވަސްތައް އަންނާނެ ގޮތްތަކާމެދު މިނިސްޓްރީއާއި މަޝްވަރާ ކުރެވެމުންދާ ކަމަށެވެ. އަދި މި މަޝްވަރާތަކާއެކު މަސައްކަތް ފަށާއިރު ފެރީގެ އާންމު ޝެޑިއުލަށް ބުރޫ ނާރާނެހެން ކަންކަން ކުރިއަށް ގެންދެވޭނެ ކަމަށެވެ.
