މާލޭގެ އަމީނީ މަގުގައި ތާރުއަޅައި ތަރައްގީކުރުމަށް ރޯޑް ޑިވެލޮޕްމަންޓް ކޯޕަރޭޝަނާ ހަވާލުކޮށްފިއެވެ.

އެ ކުންފުންޏާ މި މަސައްކަތް ހަވާލުކުރީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި އާދީއްތަ ދުވަހު ބޭއްވި ރަސްމިއްޔާތެއްގައެވެ. މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ ޒީނިޔާ އަހުމަދެވެ. އަދި އާރްޑީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރ މޫސާ އަލީ މަނިކުއެވެ.

މި މަޝްރޫއުގެ ދަށުން ރޯޑް ޑިވެލޮޕްމަންޓް ކޯޕަރޭޝަނުން މުޅި އަމީނީ މަގުގައި ތާރުއަޅާނެއެވެ. އެގޮތުން، މި ޕްރޮޖެކްޓްގައި ހިމެނެނީ 1.7 ކިލޯމީޓަރުގެ މަގުގެ ސަރަހައްދުގައި ތާރުއެޅުމާއި، މަގުގައި ފެން ހިންދާ ނިޒާމު ގާއިމުކުރުމުގެ އިތުރުން މަގު ބައްތި ޖެހުމުގެ މަސައްކަތެވެ.

އާރްޑީސީގެ މެނޭޖިންގ ޑިރެކްޓަރ މޫސާ އަލީ މަނިކު ވިދާޅުވީ މާލޭގެ ކާރުބާރުބޮޑު މަގުތައް ހިތްފަސޭހަ މަގުތަކަށް ބަދަލުކުރުމަށް ސަރުކާރުން ގެންގުޅޭ ވިސްނުން ކުރިއަށް އޮތްތަނުގައި އަމީނީ މަގުންވެސް ފެންނާނެ ކަމަށެވެ. އަދި އެއްބަސްވުމުގެ މުއްދަތުގެ ތެރޭގައި އާއްމުން ބޭނުންވާ ގޮތަށް މަސައްކަތް ނިންމާލެވޭނެ ކަމަށްވެސް އޭނާ ވިދާޅުވިއެވެ.

މި މަސައްކަތް ސަރުކާރުން އާރުޑީސީއާ ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. އެ މަޝްރޫއަށް 84 މިލިއަން ރުފިޔާ ޚަރަދުވާނެކަމަށް ލަފާކުރެވެއެވެ.

އަމީނީ މަގުގެ މަސައްކަތަކީ މާލޭގެ މަގުތައް މަރާމާތުކުރުމަށް ކުރިއަށްގެންދާ ޕްރޮޖެކްޓުގެ ދަށުން ކުރިއަށްގެންދާ މަސައްކަތެކެވެ.