ސްކޮޓްލެންޑްގެ ކުރީގެ ގޯލްކީޕަރު ގޯރަމް މަރުވެއްޖެ
ގޯރަމް މަރުވީ އުމުރުން 58 އަހަރުގައި، ކެންސަރު ބައްޔަށް ފަރުވާ ކުރަމުން ދަނިކޮށް
އޭންޑީ ގޯރަމް މަރުވީ އުމުރުން 58 އަހަރުގައި
ސްކޮޓްލެންޑް ގައުމީ ފުޓްބޯޅަ ޓީމުގެ ކުރީގެ ގޯލްކީޕަރު އެންޑީ ގޯރަމް މަރުވެއްޖެއެވެ.
ގޯރަމް މަރުވީ އުމުރުން 58 އަހަރުގައި ކެންސަރު ބައްޔަށް ފަރުވާ ކުރަމުން ދަނިކޮށެވެ. އޭނާއަށް ކެންސަރު ޖެހިފައިވާކަން އިއުލާނުކުރީ މި އަހަރުގެ އޭޕްރިލް މަހުއެވެ. އޭރު ޑޮކްޓަރުން އޭނާ ދުނިޔޭގައި ހުންނާނެކަމަށް ލަފާކުރީ ހަމަސްދުވަހަށެވެ. ގޯރަމް އޭރު ނިންމީ ކީމޯ ތެރަޕީ ނުނަގާށެވެ. އެއީ ތެރަޕީ ނަގައިގެން އޭނާ ދުނިޔޭގައި ހުރުމުގެ ފުރުސަތު އިތުރުކޮށްދެނީ އިތުރު ތިންމަހަށް ކަމަށްވާތީއެވެ.
ގޯރަމް ވަނީ ސްކޮޓްލެންޑުގެ ގައުމީ ފުޓްބޯޅަ ޓީމަށް ކުޅުމުގެ އިތުރުން ގައުމީ ކްރިކެޓް ޓީމަށްވެސް ކުޅެފައެވެ. އޭނާއަކީ ދެ ކުޅިވަރެއްގައި ސްކޮޓްލެންޑުގެ އެންމެ މަތީ ފަންތީގައި ކުޅުނު ހަމައެކަނި ކުޅުންތެރިޔާއެވެ.
ގޯރަމް ވަނީ އޭނާގެ ރަން ޒަމާނުގައި ކުޅުނު ރޭންޖަރސްއަށް 5 ސްކޮޓިޝް ޕްރިމިއަރ ލީގު، 3 ސްކޮޓިޝް ކަޕް އަދި ދެ ލީގު ކަޕް ހޯދައިދިނުމުގައި މުހިންމު ދައުރެއް އަދާކޮށްފައެވެ. މީގެ އިތުރުން އޭނާ ވަނީ ލޯނު އުސޫލުން 2000/01 ވަނަ ސީޒަންގައި އިނގިރޭސިވިލާތުގެ މެންޗެސްޓަރ ޔުނައިޓެޑަށްވެސް ކުޅެފައެވެ. އެފަހަރުގެ މުބާރާތުގައި ޔުނައިޓެޑާއެކު ގޯރަމް ވަނީ އިނގިރޭސި ޕްރިމިއަރ ލީގު ކަމިޔާބު ކޮށްފައެވެ.
