ހަމީދާއި އަންހެނުންގެ ފަޅުވެފައިވާ ހަޔާތަށް 20 އަހަރު ފަހުން ލިބުނު އަލިކަން

ޒަވާޖީ ހަޔާތެއް ދެމީހަކު ފަށަނީ ފޮނި އުއްމީދުތަކަކާއެކުއެވެ. އާއިލާއެއް ބިނާކޮށް, އުމުރުގެ ބާކީ ބައި އެކީގައި ހޭދަކުރުމަށެވެ. ނަމަވެސް ފޮނި އުއްމީދުތަކާއެކު ފަށާ މިފަދަ ޒަވާޖީ ހަޔާތަށް މަދުން ނަމަވެސް ފަނޑުކަން ގެނުވާ ކަންކަން ހުރެއެވެ. އެފަދަ އެއް ކަމަކީ އެކައިވެންޏަކަށް ދަރިއަކު ނުލިބުމެވެ. ދަރިން ނުލިބުމަށް ގިނަ ސަބަބު ތަކެއް ހުރިއިރު، ގިނަ ބަޔަކަށް އެކަން ނޭނގުނަސް، ބައްޔެއްގެ ސަބަބުން ވެސް ދަރިން ލިބުމުން މަހުރޫމްވެފައިވާ އެތައް ބަޔަކު އެބަތިއްބެވެ.

ކައިވެންޏަކަށްފަހު ދެމަފިރިން އެންމެ ބޮޑަށް ދެކޭނެ އެއް ހުވަފެނަކީ އިތުރު މެމްބަރަކު އެ އާއިލާއަށް ގެނައުމުގެ ހުވަފެނޭ ބުންޏަސް ދޮގަކަށް ނުވާނެއެވެ. ނަމަވެސް ދަރިމައިވުމުގައި މައްސަލަތައް ކުރިމަތިވެ އެކަން ތަހައްމަލުކުރަންޖެހޭ ދެމަފިރިން ރާއްޖޭގައިވެސް މަދެއްނޫނެވެ.

މި ހިތާމަ ތަހައްމަލްކުރި އެއްބަޔަކީ ބ. ތުޅާދޫ، އާވެހިގެ، އަބްދުލް ހަމީދު އުސްމާނުގެ ދެމަފިރިންނެވެ. ހަމީދާއި، އޭނާގެ އަންހެނުން 20 އަހަރަށްވުރެ ގިނަ ދުވަހު ދަރިއެއް ހޯދުމަށް މަސައްކަތްކުރި ނަމަވެސް އެންމެފަހުން އެ ދެމަފިރިން ނިންމީ ދައުލަތުގެ ބެލުމުގެ ދަށުގައި ހުރި ކުޑަ ކުއްޖެއްގެ ގާނޫނީ ބެލެނިވެރިކަން ހޯދުމަށެވެ.

ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން އާންމުކޮށްފައިވާ މިފަދަ ވީޑިއޯއްގައި ހަމީދު ކިޔައިދިން ގޮތުގައި ފަޅުވެފައިވާ އޭނާގެ ދިރިއުޅުން ބަދަލުވެގެންދިޔައީ ކުއްޖާ ލިބުނު ދުވަހުން ފެށިގެންނެވެ. އެއީ އުފާވެރި ދުވަހެއް ކަމަށާއި، އެދުވަހުގެ އިހުސާސްތައް ބުނެދޭންވެސް ނޭނގޭކަން ފާހަގަކުރިއެވެ. މިއީ 20 އަހަރު ދުވަސްވަންދެން ހަމީދު އުއްމީދު ކުރަމުން އައި ކުޑަކުޑަ އާއިލާއަށް ދިރުން ގެނުވައިދިން ދުވަހެވެ.

ހަމީދު ދަރިފުޅާއެކު ދުވަސްތައް ގުނަމުންދާއިރު، އޭނާ ދަނީ ދަރިފުޅަށްޓަކައި ބުރަ މަސައްކަތްތަކެއް ވެސް ކުރަމުންނެވެ. އާމްދަނީ ހޯދުމަށް އަމިއްލަ މަސައްކަތް ކުރިނަމަވެސް ދަރިފުޅާއެކު ގިނަ ވަގުތުތަކެއް ހޭދަކުރެއެވެ. އަދި މުސްތަގުބަލަށް ވިސްނައި ގިނަ ކަންތައްތަކެއް ކުރަމުންދާކަމަށް ވެސް ހަމީދު ބުންޏެވެ.

ފޮސްޓަރިން ކުއްޖަކު ހޯދުމަށް ކުރި މަސައްކަތްތަކުގައި ހަމީދު ވަނީ ގިނަ ކަންތައްތަކެއް ވެސް ތަޖުރިބާކޮށްފައެވެ. ފޮސްޓަރކުރުމުގެ ޕްރޮސެސް ދިގުވުމާއެކު ހިތްނުތަނަވަސްވިކަން ވެސް ފާހަގަކުރިއެވެ. ނަމަވެސް ޗައިލްޑް އެންޑް ފެމިލީ ޕްރޮޓެކްޝަން ސަރވިސްގެ ފަރާތުން ލިބުނު އެއްބާރުލުމާއި، މިހާރު ވެސް ބަހައްޓަމުންދާ ގާތްކަން ހަމީދު ފާހަގަކުރީ އުފަލާއެކުއެވެ.

މި ތުއްތު ކުއްޖާއަށް ހަމީދުގެ އާއިލާއިން ފޮސްޓަރކޮށް ދުޅަހެޔޮ މާހައުލެއްގައި ހެދިބޮޑުވުމުގެ ފުރުސަތު ލިއްބައިދިން ފަދައިން، ދައުލަތުގެ ބެލުމުގެ ދަށުގައި ތިބި އެހެން ކުދިންނަށް ވެސް މިފުރުސަތު ހޯދައިދެވިދާނެއެވެ. ދަރިމައިވުމުގެ މައްސަލައާއި އެކަމަށް ހައްލެއް ހޯދުމަށް އަތުން ބޮޑު ޚަރަދެއް އަބަދުވެސް ހިނގައެވެ. އަދި އެ ޚަރަދު ކޮންމެކޮންމެ މީހަކަށް ނުއުފުލޭނެއެވެ.

ނަމަވެސް އެއްވެސް ކުށެއް ނެތި، ކޮންމެވެސް ބައެއްގެ ސަބަބުން ޔަތީމުވެފައިވާ ނުވަތަ އުޅެމުންދިޔަ މާހައުލަށްވުރެ ރަނގަޅު މާހައުލެއް ހޯދުމަށް ކުޑަކުދިން ދައުލަތަށް ނެގެއެވެ. އެފަދަ ކުދިންނަކީ ވެސް މުޖްތަމައުގެ އެހެން ކުޑަކުދިންނެކޭ އެއްގޮތަށް އަޅާލުމާއި ލޯތްބާއި އޯގާތެރިކަން ބޭނުންވާ ބައެކެވެ. ވަކިން ޚާއްސަކޮށް އާއިލާއެއްގެ ލޯތްބެވެ. މަންމައެއްގެ ލޯތްބެވެ. ބައްޕައެއްގެ ލޯތްބެވެ. ކުށެއް ނެތް އެ މައުސޫމް ކުދިންނަށް ކޮންމެ މީހަކަށްވެސް ކަމެއް ކޮށްދެވިދާނެއެވެ.