ރިޕޯޓް ފޮތް ލިބުމާއެކު ކުދިންގެ މާކްސް އަޅާ ކިޔުން ހުއްޓާލަން ވެއްޖެ!

ކިޔެވުން ނިންމައި ދަރިވަރުންގެ ޕޭޕަރުތައް ދައްކާ ދުވަހަކީ ކުދިންނަށް ހާއްސަ ދުވަހެކެވެ. އެއީ މުޅި ޓަރމުގައި ކުރި ބުރަ މަސައްކަތުގެ ނަތީޖާ އެނގޭ ދުވަސް ކަމަށްވާތީއެވެ. ނަމަވެސް އެ ދުވަހު އެންމެ ބޮޑަށް ކުދިން ކަންބޮޑުވަނީ އެހެން ސަބަބަކާހުރެ އެވެ. އެއީ މަންމަ އާއި ބައްޕަ އެ ކުއްޖަކަށް ލިބޭ މާކްސްއާ މެދު ހިތްހަމަ ޖެހޭނެތޯ އާއި ހިތްހަމަ ނުޖެހި އަޅުވާ ކިޔާނީ ކޮން ކުއްޖެއްގެ މާކްސްއާތޯއެވެ. ބައެއް ކުދިން އިމްތިހާން ދުވަސްވަރު ވެސް މިކަމާ ކަންބޮޑުވެއެވެ.

ބެލެނިވެރިން، ދަރިންގެ ކިޔެވުމާއި އެހެން ދަރިވަރުންގެ ކިޔެވުމާ އަޅާ ކިޔަނީ އެ ކުދިންނަށް ހިތްވަރު ދެވޭ ކަމަށް ދެކިގެންނެވެ. ނަމަވެސް އޭގެ ސަބަބުން އެ ކުއްޖާއަށް ލިބެނީ ހިތްވަރެއް ނޫނެވެ. އޭގެ ބަދަލުގައި ތިމާއަކީ ކިޔެވުމުގައި ދަށް ކުއްޖެއްކަން އިހުސާސް ކުރެވި އެ ކުދިން، އަމިއްލަ ނަފްސަށް އޮންނަ އިތުބާރު ދައްވާން ފަށައެވެ. މީގެ ސަބަބުން ކުއްޖާގެ ކިބައިގައި ގޯސް އާދަތަކެއް އަށަގަނުވައިދޭ ހިސާބަށްވެސް ދެއެވެ.

ހިތްވަރު ދޭ ކަމަށް ވިސްނައި ކްލާހުގައި އިންނަ އެހެން ކުއްޖެއްގެ މޮޅު ވާހަކަތައް އަބަދު ދެއްކުމުގެ ސަބަބުން ބައެއް ފަހަރު ދަރިންގެ ހިތުގައި އެ އަޅާ ކިޔާ ކުއްޖާއާ މެދު ނަފްރަތު ވެސް އުފެދެއެވެ. ބައެއް ކުދިންނަށް މުޅި އުމުރު ދުވަހަށް ވެސް އެ ނަފްރަތުން އަރައިނުގެނެވެއެވެ.

މީގެ އިތުރުން ދުވަހަކުވެސް ތިމަންނާ އެހެން ކުދިންނަށްވުރެ މޮޅު ނުވާނެ ކަމަށް ނިންމައި ކަންކަމުގައި އަވަހަށް "ގިވްއަޕް" ކުރުމުގެ އާދަ ވެސް ބައެއް ކުދިންގެ ގައިގައި އަށަގަނެއެވެ. އެއީ އަމިއްލަ ނަފްސަށް އޮންނަ އިތުބާރު ދަށްވުމުގެ ސަބަބުން ދިމާވާ ކަމެކެވެ.

ހުރިހާ ކުދިން އެއްގޮތެއް ނުވާނެ އެވެ. އެއްބައި ކުދިން ކިޔެވުމަށް މޮޅުއިރު ދެން ތިބޭ ކުދިން އެހެން ކޮންމެ ވެސް ކަމަކުން މޮޅުވުމަކީ އެކަށީގެންވާ ކަމެކެވެ. އެކި ކުދިންގެ ހުނަރުތައް ތަފާތުއިރު ކުދިން އަޅާ ކިޔުމުގެ ސަބަބުން ލިބިފައި ހުންނަ ހުނަރު ފޮރުވައިގެން ތިބޭ ކުދިން ވެސް މަދެއް ނޫނެވެ. އެއީ އެ ހުނަރު ދައްކައިފިނަމަ އެއިން ވެސް ހިތްވަރު ދިނުމުގެ ބަދަލުގައި އެހެން ކުއްޖެއްގެ ހުނަރާ އަޅާ ކިޔައިފާނެތީއެވެ.

ބެލެނިވެރިންގެ ނިޔަތް ރަނގަޅު ނަމަވެސް ކުދިން އަޅާ ކިޔައިގެން ކުރެވެނީ ވަރަށް ގޯސް ކަމެކެވެ. އެ ނޫން ގޮތްތަކަށް ވެސް ކުދިންގެ މެދުގައި ރަނގަޅު ވާދަވެރިކަމެއް އުފައްދައި ކިޔެވުމުގައި ކުރިއެރުމަށް ހިތްވަރު ދެވިދާނެއެވެ. އެގޮތުން، އެ ކުއްޖާ ކުރާ ހިތްވަރަށް ސާބަސް ދީ، ކިޔެވުމުގައި ދަތިތަކެއް ހުރި ނަމަ އެކަން އޮޅުން ފިލުވައި އެކަންކަން ހައްލު ކުރުމަށް މަސައްކަތް ކުރެވިދާނެއެވެ.

ކުއްޖަކު ހުނަރެއް ދައްކާނަމަ އޭނާއާއި އެހެން ކުދިންނާ އަޅާ ކިޔުމުގެ ބަދަލުގައި އެ ހުނަރަކީ ވެސް މުހިންމު ހުނަރެއްކަން ދޭހަވާ ގޮތަށް އެ ކުއްޖާއަށް ހިތްވަރު ދޭންވީއެވެ. މީގެ ސަބަބުން ކުއްޖާ އަމިއްލަ ނަފްސަށް ކުރާ އިތުބާރު ބޮޑުވާނެއެވެ. އެއާއެކު ދިރިއުޅުމުގައި ކާމިޔާބު މީހަކަށްވުމަށް ކުއްޖާއަށް ހިތްވަރު ލިބިގެންދާނެއެވެ.

ޕޭޕަރު ދައްކާ ދުވަހުވެސް ކުއްޖާގެ މާކްސްއާއި އެހެން ކުދިންގެ މާކްސްއާއި އަޅާ ކިޔުމުގެ ބަދަލުގައި އެއަށްވުރެ ރަނގަޅަށް ދެންފަހަރަކު މަސައްކަތް ކުރުމަށް ހިތްވަރު ދެވިދާނެއެވެ.