ހެވީ ވެހިކަލްއާ ގުޅުންހުރި 2 ކޯހެއް މޯލްޑިވްސް ޕޮލިޓެކްނިކުން ތައާރަފުކުރަނީ

ރާއްޖޭގައި ގެންގުޅޭ ހެވީ ވެހިކަލްތަކާ ގުޅުންހުރި ދެ ޕްރޮގްރާމެއް ޖުލައި މަހު ތައާރަފުކުރަން ނިންމާފައިވާކަމަށް މޯލްޑިވްސް ޕޮލިޓެކްނިކުން ބުނެފިއެވެ.

މޯލްޑިވްސް ޕޮލިޓެކްނިކުގެ ޕްރޮގްރާމްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އެސިސްޓަންޓް ލެކްޗަރަރާ އަބްދުއްރައްޒާގު އާދަމް ވިދާޅުވީ ޖުލައި 20 ގައި ޚާއްސަ ދެ ޕްރޮގްރާމެއް ލޯންޗުކުރަން ނިންމާފައިވާކަމަށެވެ. މި ދެ ޕްރޮގްރާމުގެ ތެރެއިން ރާއްޖޭގައި ގެންގުޅޭ ހެވީ ވެހިކަލްތަކާ ގުޅުންހުރި ޚާއްސަ ދެ ޓްރެއިނިންއެއް ދެވިގެންދާނެ ކަމަށް އަބްދުއްރައްޒާގު ވިދާޅުވިއެވެ.

މިއީ ހެވީ ވެހިކަލްތަކުގެ އިންޖީނާއި، މުޅި އޮޕަރޭޓިން ސިސްޓަމްއާ ގުޅުންހުރި ޕްރޮގްރާމްތަކެކެވެ. މިއީ މޯލްޑިވްސް ޕޮލިޓެކްނިކްއާއި، ޓްރެކްޓަރސް ސިންގަޕޯއާ ގުޅިގެން ހިންގާ ދެ ޕްރޮގްރާމެވެ. ޕްރޮގްރާމްގައި ކިޔަވައިދޭނީވެސް ޓްރެކްޓަރސް ސިންގަޕޯއާއި ޕޮލިޓެކްނިކާ ގުޅިގެންނެވެ. މި ޕްރޮގްރާމްތަކަށް ޖުލައި މަހު ތެރޭގައި ހުޅުވާލާނެ ކަމަށް އަބްދުއްރައްޒާގު ވިދާޅުވިއެވެ.

މި ޕްރޮގްރާމުގެ އިތުރުން އެހެން ޕްރޮގްރާމެއްވެސް ޕޮލިޓެކްނިކުން ވަނީ ޑިވެލޮޕްކޮށްފައެވެ. އެއީ ސެޓްފިކެޓް 3 އިން ގްރެފިކް ޑިޒައިނަރއެވެ. މި ޕްރޮގްރާމް މިހާރު އޮތީ އެޕްރޫވަލް މަރުހަލާގައެވެ.