ނަފްސާނީ ބައްޔަށް ފަރުވާ ހޯދާ މީހުން އެޑްމިޓް ކޮށްގެން ފަރުވާ ދެވޭނެ ހާއްސަ ވޯޑެއް އައިޖީއެމްއެޗްގައި ހުޅުވައިފިއެވެ.

މި ވޯޑު ހުޅުވާފައިވަނީ އަންގާރަ ދުވަހުއެވެ. މިއީ މިއަހަރުގެ ރައްޔިތުންގެ މަޖިލިސް ހުޅުވި ޖަލްސާގައި ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު ދެއްވި ރިޔާސީ ބަޔާނުގައި ފާހަގަކުރައްވާފައިވާ ކަންތައްތަކުގެ ތެރޭގައި ހިމެނޭ ނަފްސާނީ ބަލިމީހުންނަށް ފަރުވާދޭ ހާއްސަ ވޯޑު ކަމަށް އައިޖީއެމްއެޗުން ބުނެފައިވެއެވެ.

އެ ހޮސްޕިޓަލުން ނެރުނު ބަޔާނެއްގައި ބުނީ މި ވޯޑު ހިންގާނީ ސެންޓަރ ފޮރ މެންޓަލް ހެލްތުގެ ދަށުން ކަމަށެވެ. އެގޮތުން، އެޑްމިޓް ކޮށްގެން ފަރުވާ ދިނުމަށް 9 އެނދު އެ ވޯޑުގައި ބަހައްޓާފައިވާ ކަމަށް ވެސް ފާހަގަކުރިއެވެ.

މީގެ އިތުުރުން މި ވޯޑުގައި ޑީއެސްކެލޭޝަން ކޮޓަރިއަކާއި ބޭރަށް ނިކުމެވޭ ގޮތަށް ޓެރަހެއް ވެސް ވަނީ ހަދާފައެވެ. އަދި ބަލި މީހުން ދުޅަހެޔޮ ސިއްހަތެއްގައި ތިބުމަށް އެހީތެރިވުމަށް ކަސްރަތު ކުރާ މެޝިންތަކެއް ވެސް އެ ވޯޑުގައި ވަނީ ބަހައްޓާފައެވެ.

އައިޖީއެމްއެޗުން ބުނީ އެ ހޮސްޕިޓަލުން އަބަދުވެސް މަސައްކަތް ކުރަމުންދަނީ ބަލިމީހުންނަށް ދެވޭ ޚިދުމަތްތަކުގެ ފެންވަރުު ރަނގަޅު ކުރުމަށް ކަމަށެވެ.