އެފްއޭއެމް 16 އަހަރުން ދަށުގެ ޔޫތު ޗެމްޕިއަންޝިޕްގެ ފައިނަލުގެ ފުރަތަމަ ޖާގަ ޔުނައިޓެޑް ވިކްޓްރީ (ޔޫވީ)ން ކަށަވަރުކޮށްފިއެވެ.

މުބާރާތުގެ ފުރަތަމަ ސެމީ ފައިނަލުގައި މިއަދު ހަވީރު ބައްދަލުކުރީ ޔޫވީއާއި ކްލަބް އީގަލްސެވެ. މި މެޗު ޔޫވީ ކާމިޔާބުކުރީ 4-0ންނެވެ. ޔޫވީގެ ފުރަތަމަ ތިން ލަނޑު އެޓީމުން ވަނީ ފުރަތަމަ ހާފުގެ 13 މިނެޓުގެ ތެރޭގައި ޖަހާފައެވެ. ޔޫވީގެ ފުރަތަމަ ލަނޑު މެޗުގެ ދެވަނަ މިނެޓުގައި ކާމިޔާބުކޮށްދިނީ އަހުމަދު އަލްތަފް އަޒީމްއެވެ. އަދި މެޗުގެ 10 ވަނަ މިނެޓުގައި މުހައްމަދު އަރުޝަދު ސަލީމް ޔޫވީއަށް ލީޑު ފުޅާކޮށްދިންއިރު، ތިންވަނަ ލަނޑު ޖެހީ އަހުމަދު އަޒުލާން އަލީއެވެ.

ޔޫވީން މެޗުގެ ފުރަތަމަކޮޅުގައި ބޮޑު ލީޑެއް ނެގީ އީގަލްސްގެ ޑިފެންސްލައިނުން ހެދި މިސްޓޭކްތަކެއްގެ ބޭނުން ހިފައިގެންނެވެ. ބައިކޮޅަށް ތިން ލަނޑު ވަތްފަހުން އީގަލްސްގެ ކުޅުން ރަނގަޅުކުރިއެވެ. ފުރަތަމަ ހާފުގައި އީގަލްސުން ލަނޑު ޖެހުމަށް ގިނަ ފުރުސަތުތަކެއް ތަނަވަސްކުރިއެވެ. ނަމަވެސް ފުރުސަތުތަކުގެ ބޭނުން ނުހިފި ބޭކާރުވީއެވެ.

ފުރަތަމަ ހާފުގައި އީގަލްސުން ފޮނުވާލި ހިލޭޖެހުންތައް ގޯލާ އަމާޒުކުރެވިފައި ނުވާއިރު، އިދިކޮޅު ކީޕަރު ޓެސްޓުކޮށްލެވޭ ވަރުގެ ހަމަލާއެއް އީގަލްސަށް ފޮނުވާލެވިފައެއްނުވެއެވެ. ފުރަތަމަ ހާފުގައި އީގަލްސްގައި ތަފާތު މޮޅު ކުޅުމެއް ދެއްކި އަޝްހަމް އިބްރާހީމް މުހައްމަދު ފޮނުވާލި ނުރައްކާތެރި ހަމަލާވެސް އަމާޒުވީ ގޯލުގެ ދަނޑިއަށެވެ. އަޝްހަމް މި މެޗުގައި ލަނޑެއް ޖެހި ނަމަވެސް ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

ދެވަނަ ހާފުގައި އީގަލްސަށް މާ ރަނގަޅު ހަމަލާތަކެއް ނުއުފެއްދުނެވެ. ޔޫވީގެ ފަހު ލަނޑު ދެވަނަ ހާފުގައި އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔާ އަޒުލާންއެވެ.

މުބާރާތުގެ ދެވަނަ ސެމީ ފައިނަލުގައި މިރޭ ވާދަކުރާނީ ވެލެންސިޔާއާއި ޓީސީއެވެ.