ކަނޑުމަތީގައި ދިމާވާ ހާދިސާތަކުގެ ތެރެއިން 98 އިންސައްތަ ހާދިސާ ހިނގަނީ ކަނޑުގަދަ ދުވަސްވަރު ކަމަށާއި ކަނޑުގަދައިރު ދަތުރު ކުރާއިރު ހާއްސަ ސަމާލުކަމެއް ދިނުމަށް ފުލުހުން އެދިއްޖެއެވެ.
ރާއްޖެ ޓީވީގެ ފަލަ ސުރުހީގައި ވާހަކަދައްކަވަމުން ސަބް އިންސްޕެކްޓަރ އޮފް ޕޮލިސް އިބްރާހިމް ނައުފަލް ވިދާޅުވީ ސަލާމަތީ ކަންކަން ފުރިހަމަނުކޮށް ހުރުމުގެ ސަބަބުން ކަނޑުމަތީގެ ގިނަ ހާދިސާތަކެއް ހިނގާފައިވާ ކަމަށެވެ. މިއީ ވަރަށް ބޮޑު ސަމާލުކަމެއް ދޭން ޖެހޭ ކަމެއް ކަމަށާއި ހާއްސަކޮށް ކަނޑުގަދަ ދުވަސްވަރު ދަތުރު ކުރާނަމަ އަޅަން ޖެހޭ މުހިންމު ފިޔަވަޅުތައް އެޅުމާއި ކޮންމެހެން ކުރަން ޖެހޭ ދަތުރުތައް ނޫން ދަތުރުތައް ނުކުރުމަށް އޭނާ އިލްތިމާސް ކުރެއްވިއެވެ.
ނައުފަލް ވިދާޅުވި ގޮތުގައި މިހާތަނަށް އެންމެ ގިނައިން ކަނޑުމަތީގެ ހާދިސާތައް ހިނގާފައިވަނީ ކަނޑުގަދަ ދުވަސްވަރު ކަމަށެވެ. މީގެ ތެރޭގައި ފަޅުވެރިންނާއި ކެޕްޓަނުންގެ ޒިންމާ އަދާ ނުކުރެވި ހިނގާ ހާދިސާތައް ގިނަ ކަމަށާއި އެ ހާދިސާތަކުގައި މީހުން މަރުވުމާއި ގެއްލުން ފަދަ ހިތާމަވެރި ކަންކަން ދިމާވެފައިވަނީ ލައިފް ޖެކެޓް ނާޅައި ތިބުމުން ކަމަށް ވެސް އޭނާ ފާހަގަ ކުރެއްވިއެވެ.
ހާދިސާތަކުގައި މީހުންނަށް ބޮޑަށް ގެއްލުންވެފައި ނުވަތަ ގެއްލިފައި ނުވަތަ ނިޔާވެފައި މިހުންނަކީ ލައިފްޖެކެޓް ނާޅައި ތިބުމުން. ބައެއް އުޅަނދުތަކުގައި ލައިފް ޖެކެޓް ހުއްޓަސް އަތްފޯރާ ހިސާބެއްގައި ނޫން ހުންނަނީ. ގިނަ ފަހަރު ހުންނަނީ ތަނަކަށް ލާ ފޮރުވާފައި. އަސްލު ލައިފް ޖެކެޓުގެ ބޭނުމަކީ ކަމެއް ދިމާވާ އިރު އެ އަތްފޯރާ ހިސާބުގައި ހުރުންސަބް އިންސްޕެކްޓަރ އޮފް ޕޮލިސް އިބްރާހިމް ނައުފަލް
މި ދުވަސްވަރަކީ ސްކޫލް ބޮޑު ޗުއްޓީއަށް ގިނަ ބަޔަކު ފުރާ ދުވަސްވަރަކަށްވުމުން މާލެ ސަރަހައްދަށް ހާއްސަކޮށްގެން އޮޕަރޭޝަނެއް ކުރިއަށްގެންދަން ވެސް ފުލުުހުން ވަނީ ތައްޔާރުވެފައެވެ. މި އޮޕަރޭޝަނަކީ އެމްއެންޑީއެފް އާއި ފުލުހުންގެ މެރިން ޕޮލިސްއާ ގުޅިގެން ކުރިއަށްގެންދާ އޮޕަރޭޝަނެކެވެ.
މި އޮޕަރޭޝަނުގައި ފަސިންޖަރުން ދަތުރު ކުރާ އުޅަނދުތަކާއި މުދާ އުފުލާ އުޅަނދުތައް ފުލުހުން ބަލާނެއެވެ. އެގޮތުން، އެ އުޅަނދެއްގައި ހުންނަން މަޖުބޫރު އާލާތްތައް ނެތްނަމަ ދަތުރައް ނުފުރޭނެ ކަމަށާއި މެޓް އޮފީހުން ދަތުރު ނުކުރުމަށް އެލާޓެއް ނެރެފި ނަމަވެސް ދަތުރު ނުކުރެވޭނެ ކަމަށް ފުލުހުން ބުނެއެވެ.
ފުލުހުން ބުނީ މި ކަމުގައި ރައްޔިތުންގެ ފަރުދީ ޒިންމާވެސް އަދާ ކުރަން ޖެހޭ ކަމަށެވެ. އެގޮތުން ދަތުރު ކުރާ އުޅަނދަށް އަރައި އޭގައި ރައްކާތެރިކަމުގެ ފިޔަވަޅު އަޅާފައިވޭތޯ އާއި ލައިފްޖެކެޓް ހުރިކަން ކަށަވަރު ކުރަން ޖެހޭ ކަމަށާއި ކަނޑައަޅާފައި އޮންނަވަރަށް ވުރެ އިތުރަށް ފަސިންޖަރުން އަރުވާނަމަ އެކަން ކަމާ ބެހޭ ފަރާތްތަކަށް އެންގުން މުހިންމު ކަމަށް ފުލުހުން ބުނެއެވެ.
ފުލުހުން ހިންގާ އޮޕަރޭޝަނުގައި އުޅަނދުތައް ބަލައި ފާސް ކުރުމަށްފަހު އެއީ ރައްކާތެރިކަމުގެ ފިޔަވަޅުތައް ފުރިހަމަކޮށްފައިވާ އުޅަނދެއްނަމަ ސްޓިކާއެއް ދޭނެއެވެ. މިއީ އެ އުޅަނދަކީ ދަތުފަތުރު ކުރުން ރައްކާތެރި އުޅަނދެއްކަން ފަސިންޖަރުންނަށް އަންގައިދިނުމަށް ޖަހާ ސްޓިކާއެކެވެ.
