ރައްޒާގުބެ މެމޯރިއަލް ކަޕްގައި ހަޓް އެފްސީ ކޮޅަށް 10 ލަނޑު ޖަހައި، އޯލް އެޓޭކުން މުބާރާތުގެ ސެމީ ފައިނަލްގެ ދެވަނަ ޖާގަ ހޯދައިފިއެވެ.

މުބާރާތުގެ ސެމީން ޖާގަ ލިބޭނީ ކޮންމެ ޓީމެއް ކޮންމެ ޓީމަކާ ވާދަކޮށް، އެންމެ ގިނަ ޕޮއިންޓު ލިބޭ ތިން ޓީމަކަށެވެ. ލީގު ބުރުގެ އެއްވަނަ ޓީމުގެ ގޮތުގައި ސެމީގެ ފުރަތަމަ ޖާގަ ހޯދީ އެންމެ ފަހުގެ ޗެމްޕިއަން ޗެލެންޖަރސްއެވެ. އޯލް އެޓޭކުން ސެމީގެ ދެ ވަނަ ޖާގަ ހޯދީ ދެ ވަނަ ޓީމުގެ ގޮތުގައެވެ. ސެމީގެ ތިން ވަނަ ޖާގަ ލިބޭ ޓީމެއް ކަށަވަރުވާނީ ބުދަ ދުވަހު އެކްސިޓޯއާއި ސިކްސް އެކްސް ކުޅޭ މެޗަށްފަހުއެވެ. ސެމީގެ ފުރުސަތު ބޮޑީ ސިކްސް އެކްސްއަށެވެ. މެޗު އެެއްވަރުކޮށްލައިގެން ވެސް ސެމީގެ ޖާގަ ހޯދުމުގެ ފުރުސަތު އެ ޓީމަށް އެބައޮތެވެ. ސެމީގެ ޖާގައެއް ބޭނުންވާނަމަ އެކްސިޓޯއަށް ޖެހޭނީ މެޗުން މޮޅުވާށެވެ.

މެޗުގައި އޯލް އެޓޭކްގެ މުހައްމަދު އަތީފް ވަނީ ތިން ލަނޑު ޖަހައި ހެޓްރިކް ހަދާފަައެވެ. އެ ޓީމުގެ ނާއިޝް އާދަމް ވަނީ ދެ ލަނޑު ޖަހާފައެވެ. ދެ އެ ޓީމުގެ ލަނޑުތައް ޖެހީ ޖުމައިލް ޖަމާލް، އަލީ ހާފިޒް، އަހުމަދު ނަބީލް، އަހުމަދު ސަމީރު އަދި އަހުމަދު ޔާސިރުއެވެ. މެޗުގެ މޮޅު ކުޅުންތެރިޔަކަށް ހޮވުނީ އެ ޓީމަށް ތިން ލަނޑު ޖަހައިދިން އަތީފްއެވެ.

މުބާރާތުގެ ސެމީގެ މެޗުތައް ކުރިއަށްދާނީ ޖުލައި އެއްވަނަ ދުވަހާއި ތިން ވަނަ ދުވަހުއެވެ. މުބާރާތުގައި ކުޅޭނީ ދެ ސެމީއެވެ. ފުރަތަމަ ސެމީގައި ބައްދަލުކުރާނީ އެއްވަނަ ޓީމާއި ދެވަނަ ޓީމެވެ. އެއީ ޗެލެންޖަރސްއާއި އޯލް އެޓޭކްއެވެ. މި ސެމީން މޮޅުވާ ޓީމަކަށް ފައިނަލްގެ ޖާގަ ލިބޭނެއެވެ. ބަލިވާ ޓީމު ޖެހޭނީ ތިންވަނަ ޓީމާއެކު، ދެވަނަ ސެމީ ކުޅޭށެވެ. މުބާރާތުގެ ފައިނަލް އޮތީ ޖުލައި ހަވަނަ ދުވަހުއެވެ.