އެކްސިޓޯ ބަލިކޮށް އެއް ވަނައިގައި ޗެލެންޖަރސްއަށް ބޮޑު ލީޑެއް

ރައްޒާގުބެ މެމޯރިއަލް ކަޕްގައި އެކްސިޓޯ ބަލިކޮށް ޗެލެންޖަރސް އިން އެއް ވަނައިގައި ބޮޑު ލީޑެއް ނަގައިފިއެވެ.

މުބާރާތުގައި މިއަދު ހަވީރު އެކްސިޓޯއާ ދެކޮޅަށް ކުޅުނު މެޗު ޗެލެންޖަރސް އިން ކާމިޔާބުކުރީ 1-0 ންނެވެ. މެޗުގައި ޗެލެންޖަރސްގެ ހަމައެކަނި ލަނޑު ޖަހައިދިނީ އަހުމަދު ނޫމާންއެވެ. މިއީ މުބާރާތުގެ ލީގު ބުރުގައި ޗެލެންޖަރސްގެ ފަހު މެޗެވެ. އެ ޓީމު ކުޅުނު ހަތަރު މެޗުގެ ތެރެއިން ތިން މެޗުން މޮޅުވެ އެއް މެޗުން ވަނީ އެއްވަރުވެފައެވެ. ޗެލެންޖަރސް އަކީ މުބާރާތުގެ އެންމެ ފަހުގެ ޗެމްޕިއަނުންނެވެ.

މެޗުން މޮޅުވެ ލިބުނު ތިން ޕޮއިންޓާއެކު ޖުމުލަ 10 ޕޮއިންޓު ހޯދައިގެން ޗެލެންޖަރސް އޮތީ އެއް ވަނަ މަގާމުގައެވެ. ދެ ވަނަ މަގާމުގައި އޮތް އޯލް އެޓޭކަށް ތިން މެޗުން ލިބެނީ ފަސް ޕޮއިންޓެވެ. ތިން ވަނައިގައި އޮތް ސިކްސް އެކްސް އަށް ތިން މެޗުން ހަތަރު ޕޮއިންޓު ލިބޭއިރު، ހަތަރު ވަނަ މަގާމުގައި އޮތް އެކްސިޓޯއަށް ތިން މެޗުން ލިބެނީ ތިން ޕޮއިންޓެވެ. ތިން މެޗުން ވެސް ބަލިވެ، ޕޮއިންޓެއް ނުލިބި ފުލުގައި އޮތީ ހަޓް އެފްސީއެވެ.

ފަސް ޓީމު ވާދަކުރާ މުބާރާތް ކުރިއަށްދާނީ ކޮންމެ ޓީމެއް ކޮންމެ ޓީމަކާ ކުޅެ، އެންމެ ގިނަ ޕޮއިންޓު ލިބޭ ތިން ޓީމު ސެމީ ފައިނަލަށް ދާ ގޮތަށެވެ. ފުރަތަމަ ސެމީގައި ވާދަކުރާނީ އެއްވަނަ ޓީމާއި ދެވަނަ ޓީމެވެ. މި ސެމީން މޮޅުވާ ޓީމަކަށް ފައިނަލްގެ ޖާގަ ލިބޭނެއެވެ. ބަލިވާ ޓީމު ޖެހޭނީ ތިންވަނަ ޓީމާއެކު ދެވަނަ ސެމީ ކުޅެންށެވެ.

މުބާރާތުގައި މާދަމާ ހަޓް އެފްސީ ނިކުންނާނީ އޯލް އެޓޭކް އާއި ދެކޮޅަށެވެ.