ވަޒީރުންނާއި ސުވާލުކުރެވޭ ވަގުތު އިތުރުކުރަން ފާސްކޮށްފި
27 ޖޫން 2022 | ހޯމަ 09:47ވަޒީރާއި އިތުރު ސުވާލުކުރުމާއި، ޖަވާބު ދިނުމުގެ ވަގުތު ކުރިއަށްގެންދާނީ، 30 މިނެޓު ވަންދެން
މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާއާ ސުވާލުކުރެއްވުން
ވަޒީރަކު ދޭ ޖަވާބަކާ ގުޅިގެން، ރައްޔިތުންގެ މަޖިލީހުގެ ގަވާއިދުގެ 78 ވަނަ މާއްދާގެ (ށ) އިސްލާހު ކުރުމަށް އާންމު ކޮމިޓީން ނިންމި ގޮތުގެ ރިޕޯޓަށް ހެންވޭރު ދެކުނު ދާއިރާގެ މެންވަރު ހުސައިން ޝަހީމް ހުށަހެޅުއްވި އިސްލާހު ވޯޓުގައި ބައިވެރިވި މެންބަރުންގެ އަގުލަބިއްޔަތުން ފާސްވެއްޖެއެވެ.
މެންބަރު ޝަހީމް ހުށަހެޅުއްވި އިސްލާހަށް ތާއީދު ކުރެއްވީ ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގެވެ. މި އިސްލާހު ފާސްކުރުމަށް ފެންނަކަމަށް ވޯޓު ދެއްވީ ހާޒިރުވި 28 މެންބަރުންގެ ތެރެއިން ވޯޓުގައި ބައިވެރިވި 23 މެންބަރުންގެ އަގުލަބިއްޔަތުންނެވެ.
މެންބަރު ހުސައިން ޝަހީމް ހުށަހެޅުއްވި އިސްލާހުގައި ބުނެފައިވަނީ ރައްޔިތުންގެ މަޖިލީހުގެ ގަވާއިދުގެ 78 ވަނަ މާއްދާގެ (ހ) ގެ ދަށުން ވަޒީރާއި އިތުރު ސުވާލުކުރުމާއި، ޖަވާބު ދިނުމުގެ ވަގުތު ކުރިއަށްގެންދާނީ، 30 މިނެޓު ވަންދެން ކަމަށެވެ. އަދި އެ 30 މިނެޓު ގުނަން ފަށާނީ، ނޯޓިސް ދިން ސުވާލަށް ވަޒީރު ދޭ ޖަވާބު ދީ ނިމޭ ހިސާބުން ކަމަށެވެ.
މަޖިލީހުގެ އާންމު ކޮމިޓީން ރައްޔިތުންގެ މަޖިލީހުގެ ގަވާއިދުގެ 78 ވަނަ މާއްދާގެ (ށ) އިސްލާހު ކުރުމަށް ހުށަހަޅާފައިވާ ގޮތަކީ، ވަޒީރަކުދޭ ޖަވާބަކާ ގުޅިގެން، މި މައްދާގެ (ހ) ގެ ދަށުން އޭނާއާ އިތުރު ސުވާލުކުރުމާއި، ޖަވާބު ދިނުމުގެ ވަގުތު ކުރިއަށް ގެންދަންވާނީ، 20 މިނެޓް ވަންދެން ކަމަށެވެ. އެ 20 މިނެޓް ގުނަން ފަށާނީ، ނޯޓިސް ދިން ސުވާލަށް ވަޒީރު ދޭ ޖަވާބު ދީ ނިމޭ ހިސާބުންނެވެ. އަދި ސުވާލު ކުރެވޭ ވަޒީރު އިއުތިރާޒު ނުކުރާނަމަ، ވަޒީރާއި އިތުރު ސުވާލުކުރުމާއި ޖަވާބުދިނުމަށް އިތުރު 10 މިނެޓްގެ ފުރުސަތެއް ދެވިދާނެއެވެ.
ކޮމިޓީއަށް ފާހަގަކުރެވުނު ކަންކަމުގެ ތެރޭގައި ހިމެނެނީ، ރައްޔިތުންގެ މަޖިލީހުގެ ގަވާއިދު 78 ވަނަ މާއްދާގެ (ށ) ގައި ބަޔާންކުރާ ގޮތުން ވަޒީރަކު ދޭ ޖަވާބަކާއި ގުޅިގެން އޭނާއާ އިތުރު ސުވާލުކުރުމާއި، ޖަވާބު ދިނުމުގެ ވަގުތު ކުރިއަށް ގެންދެވޭނީ ގިނަވެގެން 20 މިނެޓަށް ކަމަށެވެ. ނަމަވެސް 20 މިނެޓަކީ ވަޒީރަކާ ސުވާލުކޮށް ޖަވާބު ހޯދުމަށް އެކަށީގެންވާ ވަގުތެއް ނޫންކަމަށް ރައްޔިތުންގެ މަޖިލީހުގެ ގިނަ މެންބަރުން ފާހަގަކުރައްވައި ކަންބޮޑުވުން ފާޅުކުރައްވާ ކަމަށެވެ.
އެހެންކަމުން ރައްޔިތުންގެ މަޖިލީހުގެ ގަވާއިދުގެ 74 ވަނަ މާއްދާގެ ދަށުން ވަޒީރުންނާ ސުވާލުކުރުމުގެ ނޯޓިސް ފޮނުވާ ކުރާ ސުވާލަކަށް ވަޒީރަކު ދެއްވާ ޖަވާބު ނުވަތަ ކުރެވޭ ސުވާލަކާ ގުޅިގެން، މަޖިލީހުގެ ގަވާއިދުގެ 78 ވަނަ މާއްދާގެ ދަށުން މެންބަރުންނަށް ލިބިދޭ އިތުރު ސުވާލުކުރުމުގެ ފުރުސަތުގެ ދިގުމިނާ ގުޅިގެން މެންބަރުންގެ ކަންބޮޑުވުން ހައްލުކުރެވެން އޮތީ ރައްޔިތުންގެ މަޖިލީހުގެ ގަވާއިދުގެ 78 ވަނަ މާއްދާގެ (ށ) އިސްލާހުކޮށްގެން ކަމުގައި ކޮމިޓީއަށް ފާހަގަކުރެވުނު ކަމަށެވެ.
