ނޫރުގެ މަރުގެ މައްސަލައިގައި ދެމީހަކު އުމުރަށް ޖަލަށް

އައިޖީއެމްއެޗް ކައިރި ހުއްޓާ، ވަޅިއަކުން ހަމަލާދީގެން، ނޫރު އާދަމް ޙަސަންފުޅު މަރާލި މައްސަލައިގެ ދައުވާ އުފުލާފައިވާ 2 މީހަކު އުމުރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.

ނޫރު މަރާލާފައިވަނީ 2015 ވަނަ އަހަރުގެ މާރޗް މަހުގެ 28 ވަނަ ދުވަހުގެ ރޭ ގާތްގަނޑަކަށް 3:30 އެހާއިރުއެވެ.

މި މައްސަލައާ ގުޅިގެން ދައުވާ އުފުލާފައިވާ ފަރާތްތަކުގެ ތެރޭގައި ޏ.ފުވައްމުލައް، ޝައިނީ، މުޙައްމަދު ސަމީހާއި، އެރަށު ނޯވެލް، މުޙައްމަދު ޝަމްލު ހިމެނެއެވެ. އެ ދެމީހުންގެ މައްޗަށް އުުފުލާފައިވަނީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާއެވެ.

ކްރިމިނަލް ކޯޓުގައި އާދިއްތަ ދުވަހު ވަނީ މި މައްސަލައިގެ ޙުކުމް ކުރުމުގެ އަޑުއެހުން ކުރިއަށް ގެންގޮސްފައެވެ. އެގޮތުން އެ ކޯޓުގެ ގާޒީ ޙަސަން ސައީދު ކުރެއްވި ޙުކުމުގައި ވަނީ އެ ދެމީހުންގެ މައްޗަށް އުުފުލާފައިވާ ދައުވާ އެއްވެސް ޝައްކެއް ނެތް މިންވަރަށް ޝަރީއަތަށް ސާބިތުވާކަމަށް ކަނޑައަޅުއްވާފައެވެ.

ދައުލަތުން ވަނީ ޤާނޫނުގައި ބަޔާންކޮށްފައިވާ އެންމެ ބޮޑު އަދަބެއް އެ ދެމީހުންނަށް ދިނުމަށް އެދިފައެވެ. ސަބަބަކީ އެމީހުން ދިން ޙަމަލާތަކުގެ ސަބަބުން ނޫރު މަރުވެފައިވާތީއެވެ.

އެ ދެމީހުންގެ މައްޗަށް އުފުލާފައިވާ ދައުވާ ސާބިތުވުމާއެކު، ދެމީހުންވެސް އުމުރަށް ޖަލަށްލުމަށް މައްސަލަ ބެއްލެވި ގާޒީ ޙަސަން ސައީދު ވަނީ ޙުކުމްކުރައްވާފައެވެ. އެހެންނަމަވެސް، އެމީހުން ބަންދުގައި ތިބި މުއްދަތު ޙުކުމުން އުނިކުރުމުން އެމީހުންގެ މައްޗަށް އަންނާނެ އަދަބަކީ 17 އަހަރާއި، 9 މަހާއި 15 ދުވަހެވެ.