މަރުގެ ދައުވާލިބޭ އާބިދު: ހޫރާލެވުނީ ވަޅިއެއްކަން ނޭނގެ، އަމަލުކުރީ ނަފްސުގެ ދިފާއުގައި
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއު
ބަންގްލަދޭޝްގެ ވެއިޓަރަކަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދު
ހުޅުމާލޭގެ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރަކަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދުގެ މައްޗަށް ކުރާ ދައުވާގެ ފުރަތަމަ އަޑުއެހުން އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
އާދިއްތަ ދުވަހު ކުރިއަށް ގެންގޮސްފައިވަނީ މައްސަލައިގެ ފުރަތަމަ އަޑުއެހުމެވެ. މި އަޑުއެހުމުގައި އާބިދުގެ ދެ ވަކީލުންގެ ތެރެއިން އެއް ވަކީލަކު ވަނީ ބައިވެރިވެލައްވާފައެވެ.
މި އަޑުއެހުމުގައި އޭނާގެ ވަކީލު ވަނީ މައްސަަލައިގެ ލިއެކިއުންތައް ލިބިފައިވާކަން ފާހަގަ ކުރައްވާފައެވެ. ވުމާއެކު، ގާޒީ ޝަފީއު ވަނީ އިބްތިދާއީ މަރުޙަލާ ފައްޓަވައި، އޭނާއަށް ލިބިގެންވާ ޙައްޤުތައް ކިޔާދެއްވާފައެވެ.
އެއަށްފަހު ދައުލަތުން ވަނީ އޭނާގެ މައްޗަށް ދައުވާ އިއްވާފައެވެ. އެއީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގެ ކުށުގެ ދައުވާއެވެ. ދައުވާ ސާބިތުވެއްޖެނަމަ އަންނާނީ މަރުގެ އަދަބެވެ.
ކުށުގައި ބައިވެރިވެއްޖެކަން ސާބިތުވެއްޖެނަމަ 15 އަހަރާއި 25 އަހަރުގެ ޖަލު ޙުކުމެއް އަންނާނެއެވެ.
އާބިދު ވަނީ ދައުވާއަށް އިންކާރު ކޮށްފައެވެ. އޭނާ ބުނާ ގޮތުގައި އޭނާއާ ކައްކާއާ ދެމެދު ހިނގި ހަމަނުޖެހުމުގައި އޭނާ އަތް ހޫރާލީ ނަފްސުގެ ދިފާއުގައެވެ. އޭރު އެއީ ވަޅިއެއްކަންވެސް ނޭނގޭ ކަމަަށާއި، ޤަސްތު މަރުގެ ދައުވާއަށް އިންކާރު ކުރާކަމަށް އޭނާ ބުނެއެވެ.
އޭނާ ދައުވާއަށް އިންކާރު ކުރުމާއެކު ދައުލަތުން ވަނީ ހެކި ހާމަކޮށްފައެވެ.
މި މައްސަަލައާ ގުޅިގެން ދައުލަތުން ހެކި ރައްކާތެރި ކުރުމުގެ އަމުރެއްވެސް ހުށައަޅާފައިވެއެވެ. އެއީ މި މައްސަލައިގެ ސީން އޮފް ކްރައިމް އޮފިސަރސް ރިޕޯޓެވެ.
މި މައްސަލައިގައި ހިމެނޭ ގިނަ ހެކިންނަކީ ޕާކިސްތާނު އަދި ބަންގްލަދޭޝް ރައްޔިތުންކަން ފާހަގަކޮށް ދައުލަތުން ވަނީ ޝަރީއަތުގެ މަރުޙަލާ ފެށުމުގެ ކުރިން ހެކިބަސް ކުރީބައިގައި ނެގުމަށް އެދިފައެވެ. ވުމާއެކު، ގާޒީ ޝަފީއު ވަނީ 2 ޖުލައިން ފެށިގެން މި މައްސަލައިގައި ހިމެނޭ 11 މީހުންގެ ހެކިބަސް ނަގަން ފެށުމަށް ނިންމަވާފައެވެ. އެއީ ފަހަށް ރައްކާ ކުރެވޭ ގޮތަށް ޖިނާއީ އިޖުރާއަތުގެ ދަށުން ނަގާ ހެކިބަސްތަކެކެވެ.
ދެން މި މައްސަލައިގެ އަޑުއެހުންތައް ކުރިއަށްދާނީ ކޯޓަށް ހާޒިރުކޮށްގެންނެވެ.
