ރައްޒާބުގެ މެމޯރިއަލް ކަޕްގައި ހަޓް އެފްސީ ބަލިކޮށް، ޗެލެންޖަރސްއިން އެއްވަނައިގައި ތިން ޕޮއިންޓުގެ ލީޑެއް ހޯދައިފިއެވެ.

ހަޓް އެފްސީއާ ދެކޮޅަށް ނުކުންއިރު ވެސް އެއްވަނައިގައި އޮތީ ޗެލެންޖަރސްއެވެ. ނަމަވެސް އެއީ ފައިދާ ގޯލުގެ ތަފާތުންނެވެ. ޗެލެންޖަރސްއާއި އޯލް އެޓޭކަށް ލިބިފައި ވަނީ ހަތަރު ޕޮއިންޓެވެ.

ހޮނިހިރު ދުވަހުގެ ހަވީރު ހަޓް އެފްސީއާ ދެކޮޅަށް ކުޅުނު މެޗު ޗެލެންޖަރސްއިން ކާމިޔާބުކުރީ 4-0 ންނެވެ. މެޗުގައި ޗެލެންޖަރސްގެ ލަނޑުތައް ޖެހީ މުހައްމަދު ނާއިމް، އަލީ ޒާއިފް އަދި އަހުމަދު ނޫމާންގެ އިތުރުން މުހައްމަދު ޝަހީމްއެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނީ ޗެލެންޖަރސްގެ އަލީ ޒާއިފްއެވެ.

މެޗުން މޮޅުވެ ލިބުނު ތިން ޕޮއިންޓާއެކު ޖުމުލަ ހަތް ޕޮއިންޓު ހޯދައިގެން ޗެލެންޖަރސް އޮތީ ތާވަލްގެ އެއްވަނަ މަގާމުގައެވެ. ދެ ވަނަ މަގާމުގައި އޮތް އޯލް އެޓޭކަށް ލިބެނީ ހަތަރު ޕޮއިންޓެވެ. ތިންވަނަ އަދި ހަތަރުވަނައިގައި އޮތް އެކްސިޓޯ އާއި ސިކްސް އެކްސް އަށް ތިން ޕޮއިންޓު ލިބޭއިރު، ފައިދާ ގޯލުން ކުރި ލިބެނީ އެކްސިޓޯއަށެވެ. ކުޅުނު ތިން މެޗުން ވެސް ބަލިވެ ހަޓް އެފްސީ އޮތީ ފުލުގައެވެ.

މުބާރާތުގައި މިއަދު ހަވީރު ބައްދަލުކުރާނީ ސިކްސް އެކްސްއާއި އޯލް އެޓޭކެވެ. މެޗުން މޮޅުވެ ޕޮއިންޓުގެ ގޮތުން ޗެލެންޖަރސްއާ އެއްވަރުކުރުމުގެ ފުރުސަތު އޯލް އެޓޭކަށް އޮތްއިރު، މެޗުން މޮޅުވެ ދެވަނައަށް އެރުމުގެ ފުރުސަތު ސިކްސް އެކްސްއަށް އެބަ އޮތެވެ.