ސަލާހް ރެއާލް މެޑްރިޑަށް ހިނގައިދާނެ

ލިވަޕޫލްގެ ތަރި މުހައްމަދު ސަލާހް އެޓީމު ދޫކޮށް ރެއާލް މެޑްރިޑަށް ބަދަލުވުމަކީ މާ ދުރުގައި އޮތްކަމެއް ނޫންކަމަށް ރިޕޯޓުތައް ބުނެފިއެވެ.

ލިވަޕޫލާއެކު ސަލާހް ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުއެވެ. އެހެންކަމުން ލިވަޕޫލުން މަސައްކަތް ކުރަމުން އަންނަނީ ސަލާހްގެ ކޮންޓްރެކްޓް އައުކުރުމަށެވެ. ނަމަވެސް ސަލާހް ވަނީ އެއްބަސްވުން އައު ކުރުމުގައި އޭނާގެ މުސާރަ ބޮޑުކުރުމަށް ޑިމާންޑްކޮށްފައެވެ.

ސަލާހް ޑިމާންޑްކުރަމުން އަންނަނީ ހަފުތާއަކު 400،000 ޕައުންޑް ލިބޭ ގޮތަށް އެއްބަސްވުން އައުކުރުމަށެވެ. މިއީ މިހާރު އޭނާއަށް ލިބޭ މުސާރައިގެ ގާތްގަނޑަކަށް ދެގުނަ ބޮޑު މުސާރައެކެވެ. މިހާރު ސަލާހްއަށް ލިބެނީ ހަފުތާއެއްގެ މައްޗަށް 240،000 ޕައުންޑެވެ.

ސަލާހްގެ އެއްބަސްވުން އައުނުކޮށް އޮތްއިރު، ރެއާލް މެޑްރިޑުން އަންނަނީ އޭނާއަށް ފާރަލަމުންނެވެ. މިއަންނަ ސީޒަން ފެށެންވާއިރަށް ރެއާލްގެ އެންމެ ބޮޑު އަމާޒަކަށްވެފައި އޮތީ ޕީއެސްޖީގެ ތަރި ކީލިއަން އެމްބާޕޭ ފްރީ ޓްރާންސްފަރއެއްގައި ރެއާލްއަށް ގެންދިއުމެވެ. ނަމަވެސް ފަހު ވަގުތު އެމްބާޕޭ ނިންމީ ޕީއެސްޖީގައި މަޑުކުރާށެވެ. އެހާހިސާބުން އިތުރު ފޯވާޑެއް ހޯދުމުގެ ބަދަލުގައި ރެއާލްއިން ވަނީ މެދުތެރެއަށް ކުޅެމުން އަންނަ އޮޣޭލިއަން ޗުއަމެނީގެ ސޮއި ހޯދާފައެވެ.

ބައެއް ރިޕޯޓުތައް ބުނާ ގޮތުން ލިވަޕޫލަށް ކުޅެމުންއައި ސަޑިއޯ މާނޭ ކްލަބު ދޫކޮށްލަށް ލިވަޕޫލުން އެއްބަސްވި ގޮތަށް، ސަލާހް ކްލަބު ދޫކޮށްލަންވެސް ޓީމުން އެއްބަސްވުން އެކަށީގެންވެއެވެ. ނަމަވެސް ރެއާލްއަށް ސަލާހް ދޫކޮށްލަން ލިވަޕޫލުން އެއްބަސްވާނީ 60 މިލިއަން ޕައުންޑަށް ކަމަށްވެސް ރިޕޯޓުތައް ބުނެއެވެ.