ނޫސްވެރިޔާ އަހުމަދު ރިލްވާންގެ މައްސަލައިގެ ތުހުމަތުގައި މީހަކު ހައްޔަރުކޮށްފިއެވެ.
އެ މައްސަލައާއި ގުޅިގެން ހައްޔަރު ކޮށްފައިވަނީ އިސްމާއިލް އަބްދުލްރަހީމް (އިސޫ) ނަމަކަށް ކިޔާ މީހެކެވެ. އޭނާ ހައްޔަރުކުރީ ކާރނިވަލް ތެރެއިންކަމަށް މައުލޫމާތު ލިބެއެވެ.
މީގެ ކުރިންވެސް ހަރުކަށި ފިކުރުގެ ތުހުމަތުގައި އޭނާގެ ގެ މ. ލެގޫންވިއު ބަލައި ފާސްކޮށްފައިވެއެވެ.
ރިލްވާނު ގެއްލުވާލި މައްސަލަ ތަހުގީގު ކުރަމުންދާ މަރު ކޮމިޝަނުން ބުނެފައިވާ ގޮތުގައި ރިލްވާން ގެއްލުވާލުމުގެ ކުޑަ ދުވަސްކޮޅެއް ކުރިން އޭނާ ރިލްވާނަށް ފާރަ ލާފައިވެއެވެ. އެކަން ރިލްވާނުގެ ޓްވީޓުތަކުންވެސް އެނގޭކަމަށް މަރު ކޮމިޝަނުން ބުނެއެވެ.
މަރު ކޮމިޝަނުން އެކުލަވާލި ރިޕޯޓުގައި ފުރުޤާން މިސްކިތުގައި ޙަރަކާތްތެރިވާ ޖިހާދީ ފިކުރުގެ ޖަމާއަތުގެ މެމްބަރުންގެ ތެރޭގައި އޭނާ ހިމެނޭކަމަށް ވަނީ ބުނެފައެވެ.
އޭނާ މީގެ ކުރިން ވަނީ ސީރިއާއަށް ދިއުމަށް ތުރުކީ ބޯޑަރު ހުރަސްކުރަން އުޅެނިކޮށް ޑީޕޯޓު ކޮށްލާފައެވެ. އެ މައްސަލައިގައި އޭރު އޭނާގެ މައްޗަށް ދައުވާކުރިނަމަވެސް، ދައުވާ ބާތިލުކުރީ ސަރުކާރުގެ ލިއުމެއް ނުލިބިގެންނެވެ.
އޭގެ އިތުރުން، 2011 ޑިސެމްބަރު 10 ވަނަ ދުވަހު ދީނީ މިނިވަންކަމަށް ގޮވާލާ ބޭއްވި ސައިލެންޓް ޕްރޮޓެސްޓުގެ ބައިވެރިންނަށް ޙަމަލާ ދިނުމުގައިވެސް އޭނާ ބައިވެރިވެފައިވާ ކަމުގެ ތުހުމަތު ވަނީ ކުރެވިފައެވެ.
