އެއް ޖިންސުން ގުޅުންހިންގާ މަންޒަރު ފެންނަ ވީޑިއޯއެއް ލީކުވުމާއި ގުޅިގެން ޤާނޫނީ ވަކީލު ނާޒިމް އަބްދުއްސައްތާރުގެ ޕާސްޕޯޓު ހިފަހައްޓައިފިއެވެ.
ފުލުހުންގެ މީޑިއާ އޮފިޝަލު ވިދާޅުވީ، ކޯޓު އަމުރެއްގެ ދަށުން އޭނާގެ ޕާސްޕޯޓު ހިފަހައްޓާފައިވަނީ ރޭގެ ވަގުތެއްގައި ކަމަށެވެ. އޭނާ ފުރުން މަނާކޮށްފައިވާއިރު، އޭނާގެ މައްޗަށް ތަހުގީގު ހިންގަމުންދާކަމަށް ފުލުހުންގެ މީޑިއާ އޮފިޝަލު ވިދާޅުވިއެވެ.
އެކަމާ ގުޅިގެން ފުލުހުން މީގެ ކުރިން ބުނެފައިވަނީ ސޯޝަލް މީޑިއާގައި ދައުރުވަމުންދާ ވީޑިއޯގައި ހިމެނޭ މީހުންގެ މައްސަލަތައް ތަހުގީގު ކުރަމުންދާ ކަމަށެވެ. ހަމައެއާއެކު، ފުލުހުންނަށް ހުށައެޅިފައިވާ ބްލެކްމެއިލިންގ ގެ މައްސަލައެއްވެސް ތަހުގީގު ކުރަމުންދާކަން ވަނީ ފާހަގަކޮށްފައެވެ.
ސޯޝަލް މީޑިއާގައި ދައުރުވި ވީޑިއޯގައި ފެންނަނީ އޭނާ ނޫންކަމަށް ނާޒިމް ސައްތާރު ފުރަތަމަ ވިދާޅުވިއެވެ. އެ ވީޑިއޯގައި ފެންނަނީ ނާޒިމް ކަމަށް ބެލެވޭ މީހަކާއި އިތުރު ފިރިހެނަކު އެއް ޖިންސުން ގުޅުން ހިންގާ މަންޒަރެވެ. އެ ވީޑިއޯ އާންމުވުމާއި ގުޅިގެން ގިނަ ބަޔަކު ގެންދަނީ ނާޒިމް ހައްޔަރު ކުރުމަށްވެސް ގޮވާލަމުންނެވެ.
ނާޒިމް އަކީ ރައްޔިތުންގެ މަޖިލީހުގެ ރައީސް، މުޙައްމަދު ނަޝީދުގެ ކޮއްކޮއެވެ.
