ކުރިއަށްއޮތް 2022/2023 ވަނަ އަހަރުގެ ދިރާސީ އައު އަހަރުގެ ކިޔެވުން ފެށެން ވާއިރަށް ސްކޫލްތަކަށް ޓީޗަރުން ހަމަކުރުމުގެ މަސައްކަތް މިއަހަރުގެ ޖެނުއަރީ މަހު ފަށާފައިވާކަމަށް އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ އަހުމަދު މުޖާހިދު ވިދާޅުވެއްޖެއެވެ.

ދިރާސީ އައު އަހަރުގެ ކިޔެވުން ފެށޭއިރު ސްކޫލްތަކުގައި ބައެއް ޓީޗަރުން މަދުކަމުގެ ޝަކުވާއަކީ ބެލެނިވެރިން އަބަދުވެސް ކުރާ ޝަކުވާއެކެވެ. މިއަހަރުގެ ދިރާސީ އައު އަހަރު އޮގަސްޓު 7 ގައި ފެށޭއިރު އެޑިއުކޭޝަން މިނިސްޓްރީން ވަނީ ސްކޫލްތަކަށް ޓީޗަރުން ހަމަކުރުމުގެ މަސައްކަތް ދުރާލާ ފަށާފައެވެ. އޮގަސްޓު ދެވަނަ ދުވަހަކީ ޓީޗަރުން ރިޕޯޓުކުރަންޖެހޭ ދުވަހެވެ.

ސްކޫލްތަކަށް ޓީޗަރުން ހަމަކުރުމާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ އަހުމަދު މުޖާހިދު ވިދާޅުވީ ދިރާސީ އައު އަހަރެއްގެ ކިޔެވުން ފެށެން ވާއިރަށް މުވައްޒަފުން ހަމަކުރުމަކީ އެންމެ އިސްކަމެއް ދޭ އެއް ކަންތައް ކަމަށެވެ.

މުޖާހިދު ވިދާޅުވީ ފާއިތުވި ދެ އަހަރުގައި ކޮވިޑްގެ ތެރޭގައި ގިނަ ދުވަސްތަކެއް ހޭދަކުރަންޖެހުމާއި، ދަތުރުފަތުރު ކުރުމުގައި ދިމާވި ގޮންޖެހުންތަކާއި، ކަރަންޓީންވާންޖެހުމާއި، މި ކަންކަމާ ހެދި ކިޔެވުން ފެށޭ ދުވަހަށް ބައެއް ޓީޗަރުންނަށް ސްކޫލަށް ހާޒިރުނުވެވި ހުރެދާނެ ކަމަށެވެ. އެއީ ހާލަތުގެ ގޮތުން ދިމާވި ކަމެއް ކަމަށާއި، އެހެންނަމަވެސް އާންމުގޮތެއްގައި ސްކޫލެއްގައި ކިޔަވައިދިނުން ކުރިއަށް ނުގެންދެވޭ ވަރަށް ޓީޗަރުން ނެތި ނުދާނެ ކަމަށް މުޖާހިދު ވިދާޅުވިއެވެ.

މުޖާހިދު ވިދާޅުވީ އެޑިއުކޭޝަން މިނިސްޓްރީގެ ހިއުމަން ރިސޯސް ޑިވިޝަންގެ ފަރާތުން މިއަހަރުގެ ޖެނުއަރީ މަހުން ފެށިގެން ސްކޫލްތަކާ ބައްދަލުކޮށް އެ ސްކޫލެއްގެ މުވައްޒަފުންނާ ގުޅުންހުރި މައުލޫމާތުތައް ހޯދާ ބަލާ، އިތުރުކުރަންޖެހޭ މަގާމެއް ހުރިތޯ ބަލާފައިވާނެ ކަމަށެވެ. އަދި މިހާރުވެސް އެ މަގާމުތައް ފުރުމަށް މަސައްކަތްކުރަމުންދާއިރު، އިތުރު މުވައްޒަފުން ނެގުން ފަދަ މަސައްކަތްތައް ކުރިއަށްދާކަމަށް މުޖާހިދު ވިދާޅުވިއެވެ.

ސްކޫލް ހުޅުވެން ވާއިރަށް އެއްވެސް ސްކޫލެއްގައި މުވައްޒަފުން ނެތި ނުދާނެ ކަމުގެ ޔަގީންކަން އެބައޮތް ކަމަށް އޭނާ ވިދާޅުވިއެވެ. ކޮންމެ ސްކޫލެއްގައިވެސް ދިރާސީ އައު އަހަރު ފެށެން ވާއިރަށް ޓީޗަރުން ތިބޭނެކަމަށާއި، އެއްވެސް ކޫލެއްގައި ކިޔެވުން ކުރިއަށް ނުގެންދެވޭ ވަރަކަށް ޓީޗަރުން ނެތިއެއް ނުދާނެ ކަމަށް މުޖާހިދު ވިދާޅުވިއެވެ.

މުޖާހިދު އިތުރަށް ވިދާޅުވީ މުވައްޒަފުން ކެނޑުމާއި، އައު މުވައްޒަފުން ނެގުމަކީ ހުރިހާ އިދާރާއެއްގައިވެސް އާންމު ކަންކަން ކަމަށެވެ. މުވައްޒަފަކު ކެނޑޭ ހިސާބުން އައު މުވައްޒަފަކު ނެގުމާ ދޭތެރޭގައި ވަގުތުކޮޅެއް ނަގާ ފަދައިން ޓީޗަރަކު ވަޒީފާއިން ވަކިވުމުން އައު ޓީޗަރުން ނެގުމާ ދޭތެރޭގައިވެސް ވަގުތުކޮޅެއް ނަގާނެ ކަމަށް މުޖާހިދު ވިދާޅުވިއެވެ.